Lɔga Minase Ko Ga Ebhironi
48
1 Na kali kona Yoseb kèseyɛsɛ,
“Bare chogonu ilagawa.”
Na nɔng ibha erroa gɛnyɛ Minase ko Ebhiron na dhi kari na kɔgɔnyigi Yaykob.
2 Na hunaa Yaykob shikko bhɛa kunɛa :Yosebiye,
dhɔnga sabba na bana na liginu tunɔ.
3 Na sɛɛsɛ Yoseb,
“Tumu Komoruya Ɔana Lɔgɔ Kumulɔng annaa bere dhɔllaganyi rɛ Kananɔ ɔra kèe Loza na tuhonyi
4 na sennaganyi,
‘Ale kɛbhɛlliny na ashaa gunyu a gettoye mɛri.
Na ngabaya ale kajjɛ na sɛrɛɛ :yɔkku ko kingi.’
5 “Na mɛa eriya nanuye,
ngaerroya ku ramman bere irritton huna anye Gibsi ngani kùgoayo kèe Minase ko Ebhironde,
mɛa kugunyi ke erroa ganyu huna Robeli ko Simoni.
6 Na ale wurtɔ hunde irritton genaye,
any ke gunyu.
Na yɔk hunde ale sɛrɛɛ baye,
elinɛnɛ sara Minase ko ga Ebhironi.
7 Anye huna bere kowokkoni Bhadaramɔ,
mama nunu Ngarahel annaa rɛsa Kananɔ gɔra kènno kàdaktɛ Ibhirata jaa na koji ganggu dheyyɔ.”
(Sara ngaɔrronu kèe Ibhirataye gena keli Betelem)
8 Na hunaa Isirayel orro erroa Yosebiye,
ghinu na sɛɛsɛ,
“Ngagiya a erroye gigi?”
9 Na Yoseb sɛɛsɛ,
“A erroa ganyu bere ajjanyi :Tumu ngabaya.”
Na nɔng chɔgɔnɛ sɛɛsɛ,
“Dhigana ni,
na kùtuha.”
10 Nɔng Yaykob dha bere nyaga goore na bho shɛɛ ngaorro.
Na koo Yoseb dhiganɛsɛ erroa gɛnyɛ chɔgɔnɛ.
Na nɔng issau na ibhu na tuhu.
11 Na sɛɛsɛ Yoseb,
“Chɔɔ anye bere keni ale ngakorrinyo.
Na mɛa dhiganagany :Tumu na karra chɔɔ erroa gunyu.”
12 Na Yoseb ibha erro bhɛa boyɛa :babaa nɛnɛ kɔmma na yagu dheyyɔ na tɔgɔdhɛsɛ chɔgɔnɛ kɔmma.
13 Na koo ibha erroa gɛnyɛ ku ramman na gɔnydɛ ko Yaykob kawarɛ.
Na Ebhiron tɛa siyɔ sɛtɛna nɛnɛ na Minase tɛa siyɔ kangitɛna nɛnɛ.
Nɔng bhɛa Yaykobi Ebhiron dha bere i siyɔ kangitɛn na Minase i siyɔ sɛtɛn.
14 Na Yaykob abharganyisiu sɛnɔ na siya ku sɛtɛni tadhɛ eriya chinyo sabba.
Na na ku kangitɛni tadhɛ eriya ku aw.
15 Na koo tuhu Yoseb na seu,
“Tumu,
Komoruya bere kɔbhbhɛa :kokonginyaa ganyu
Awurahami ko Isaki,
na iwoonyi ngaoynyaya kihɛ basseyɔye kumulɔng
ko mɛa toye,
16 naa bere ibayseonyi lɔga gɛrsa kodokkoni kumulɔng,
mɛa any kutu ngaerroya.
Na yɔk any keliyɛy sara ganyu
ko ga babachina ganyu Awurahami ko Isaki.
Na kɛbhɛldɛ
na ashaa gɛ kɛtɛhɛtɛy ko ba.”
17 Na hunaa Yoseb orro siya chɔgɔnɛ ku sɛtɛn hunde tadhɛ Ebhironde,
hini kɔchɛɛ.
Na dhɔnga na katadhɛ sabbaa Minase.
18 Na seu,
“Babaye!
Nganga ngayo.
Na ku aw a Minase na maya siya ku sɛtɛni tadhɛ nɔng.”
19 Na nɔng chɔgɔnɛ tamaru na sɛɛsɛ,
“Kaggayɔ!
Kaggayɔ!
Hoya nanuye,
ko nɔng ale ashaa gɛnyɛ a mɛri na a gettoye bu.
Nɔng ale gɔynɛa chinyo bhɛa nɛnɛ a bu na ashaa gɛnyɛ a gettoye mɛri.”
20 Na tuhu yɔk na seu,
“Gettoa Isirayeli ale tuhɛ zugo sara gu na sennɛ,
‘Any kutuheny :Tumu damiya bere tuhɛa Ebhiron ko Minase.’”
Na ngadamita tuhɛye,
nɔng Ebhiron bhɛa Minase tɛhɛyɛ ko eriya ku aw.