Lɔga Hɛyɛa :Gochonginyaa Yosebi Gibsigiye
42
1 Na Yaykob hunaa shikko hunde liwa Gibsigiye ɛllɛye,
ghinu erroa gɛnyɛ na sɛɛsɛ,
“Ngangaye,
igge ɛllo bay na gunynɛno kawarɛ kɛ ɔng?
2 Wa kishikka se liwa Gibsigiye ɛllɛ.
Na mɛa banda ago na talda liwa gen.
Ngakèrgi hozzo.”
3 Na Yoseb gɔynggɛye ku tɔmmɔn ago Gibsigiye na katalda liwa.
4 Nɔng Yaykob dha bere Yoseb gɔynɛa kèe Biniyam ngani kekko ke ngaya ɛngɛrsɛ bhɛa senno eri ngakaddagay lɔkte gɛrsiye.
5 Na erroa Isirayeli dhi ko zug gena Gibsigiye na katalda liwa ke ngaya Kananɔ ba anɛ hozzoye.
6 Nɔng Yoseb dha bere a gulsaa Gibsi bo na a hira lɔma liwaa tallɛa :zuga honynyo ba kumulɔng.
Na Yoseb gɔynggɛ hunaa hɛa chɔɔ bhɛa nɛnɛye,
tɔgɔndɛ kawarɛ ba na tɔgɔndhɛsɛ kɔmma.
7 Na Yoseb aru gɔynggɛ na tagu.
Na ghinu tɔllɔng ke dɛmney huna zuga imagga na sɛɛsɛ,
“Anno zukte honynyo ori wa?”
Na yɔk seyɛsɛ,
“Kohonynyo Kananɔ na kenno kàtaldo liwa.”
8 Nɔng Yoseb dha bere gayɔ hunde a gɔynggɛye.
Na hunde a gɔynɛye,
yɔk imaggɛyɔ.
9 Na koo Yoseb kadha lɔga bere kunasɛsɛna gɔynggɛ na sɛɛsɛ,
“Igge anno rotoga!
Na honynyo na royo baa nayo na taga bhɛa zuga gayo anɛa tɔlgɔnyi.”
10 Na yɔk seyɛsɛ,
“Gulsaa nayoye,
agge rotoga ngakannoo.
Agge kanno zuga kagachinyi inye na kohonynyo na kataldo liwa.
11 Agge kumulɔng kanno erroa hira dhɔnɛna na kanno zuga challa.
Rotoga ngakannoo.”
12 Na nɔng Yoseb sɛɛsɛ,
“Ay,
itabhbhanyuyɔ!
Igge honynyo na royo baa nayo na argi tande ngakɛbhɛkkooye.”
13 Na yɔk seyɛsɛ,
“Agge kanno erroa hira dhɔnɛna bhakka Kanan kàgachinyi inye.
Na chɔɔ bere kanno tɔmmɔn ko ramman.
Na gochonga nayo chinyo ɛl ko chɔgɔnɛ ɔrɔ.
Na kona bere garra.”
14 Na Yoseb nɔng sɛɛsɛ,
“Ay,
kaggaunggɔ.
Anno rotoga chi!
15 Hunde anno zuga challa kɛ̀yɛbhbhunguye,
ga ago na dhiganda goonua chinyo.
Mɛa anye kibhiikkagung ngalɔkta buyna komoruya Gibsi na ko bhee kunɛ goonua chinyo,
igge bhee hɛyɛo ninggɛ dhul.
16 Na mɛa ga ibhta hir kona bhɛa nu na kara goonua chinyo,
na ko bhee kìdhigannanɛ nɔng,
igge reɛ doraa chibinuny ngaya na kàtagɛ bhɛa mɛziyɛo lɔga ku dhere.
Na yɔk hunde ngalɔkta te butomoye,
sara komoruny,
ngangaye,
dhaa anno rotoga chi!”
17 Na koo dhiganu kumulɔng na ɔgɛ doraa chibinuny na chɛbu ngonu ungo sizzi.
18 Na hunaa kɛ̀chɛbta ungo sizziye,
koo sɛɛsɛ :Yosebi,
“Anye kani hira kɛngɛrsi Tumu.
Na mɛa ga mesigi lɔkte koyokkogungge na ibaysi rɛhiya gu!
19 Hunde anno zuga challa kɛ̀yɛbhbhungu dhereye,
ga hir kona any kɛtɛ doraa chibinuny ngaya.
Na gena aytɛ liwa ɔrɔ na ayɛsɛ zuga gu dhakka :hozzo.
20 Na mɛa banda ago na dhiganda goonua nu chinyo na kàtagɛ ngalɔkta wa yokkonoye bhɛa anɛa dhere.
Hunde messo ngangaye,
ibayseo rɛhiya gu na ngarɛssoo.”
Na yɔk shiktɛ ko nɔng.
21 Na koo mɛzi kɛngɔ na se,
“Kèe agge annaa bere kùwassa goonaa na,
na aynde mɛa kɔ̀chɔllanɛnɛ ngangaye.
Agge bere kòrro chɔllaa nɛnɛ huna tɔllɔhagiy na sennagiy,
‘Ngakɔdhdhanyu’ na agge ngakìshikkoo.
Na a bhee mɛa kɔchɔllanɛnɛ :aggeu ngangaye.”
22 Na nɔng Robel seu,
“Anye annaa bere kennagungu ngatiranyɛo na ngashikkonyoo.
Na mɛa nyawaa gɛnyɛ kɔ̀lɔ :aggeu.”
23 Yɔk ngalɔkta dha bere mɛzɛɛ :yɔkkuye,
Yoseb shiktɔ na yɔk imaggɛyɔ ke ngaya dha bere lɔmɛ ɔkɔlayte.
24 Na bhɛa ɛlɛa kari sɛyɛ ko dheyyɔ na turu.
Na koo wagu na mɛzi sɛgɛn na kɛnga Simon dhɔnɛnɛ na chɛbɛsɛ gɔynggɛ kawarre gig gig.
25 Na Yoseb aynɛ gaymanyaa gɛnyɛ lɔgɔ na sɛɛsɛ,
“Togoytɛsɛ kammayiya ngazukta liwa na ibhta tomoga gɛ hɔla gaw dhandalaa bɔɔ honynyɛa na senno kataldɛ liwa na oytɛsɛ kammayiya gɛ tugi.
Na ayɛ galaa ammɛa gɔrɔ.”
Na hunaa gaymanya messa lɔga yogɛsɛna :Yosebi kumulɔng na tewa ushaye,
26 Yoseb gɔynggɛ ibhta kammayiya gɛ na chɛbtɛsɛ sigiriya na ago.
27 Na hunaa hɛa na bho barsa na senno kutunggioye,
kona bana na kadhamuyo liwa gee chichi na kaynɛ sigirɔ.
Na hunaa ɔkka kammaye,
aru tomoga hɔla gaw dhandala kammayɔ tugɔ.
28 Na sɛɛsɛ gɔynggɛ,
“Kèe dhaa anye tomoga ganyu hɔla kiyaktaganyɔ!
A giya ɛl kammayɔ tugɔye.”
Na yɔk dɛɛbɛ na kɛngi bhɛldɛ na bhariyi tik tik na se,
“Yee gɛrɛ gore hɛmmɛɛ!
Na dha kalda Tumu se kayiy lɔk giyong?”
29 Na hunaa hɛa chɔɔ Kanan na assanɛa chɔgɔnɛye,
kɔbhtɛsɛ lɔga bare dokkonɛa rang.
30 Na seyɛsɛ,
“Agge bare wologiyɔ :gulsaa Gibsi bo na seyagiyɔ,
‘Anno rotoga!
Na honynyo na royo ɔra nanu.’
31 Na agge keseyɛsɛo,
‘Kanno zuga challa kɛ̀yɛbhbhiy.
Na rotoga ngakannoo.
32 Chɔɔ kanno gɔynggɛ.
Na bere kanno tɔmmɔn ko ramman.
Na kona bere garra.
Na gochonga nayo chinyo ɛl ko chɔgɔnɛ Kananɔ.’
33 “Na gulsaa bo seyagiy,
‘Hunde anno zuga challa kɛ̀yɛbhbhunguye,
kona ga any kɔdhɔyɛ doraa chibinuny ngaya na igge gena ago ɔrɔ na ayɛsɛ zuga gu dhakka hozzo liwa.
34 Na ago dhigandaganyu gochonga nu chinyo na kàtagɛ bhɛa anɛo zuga challa kɛ̀yɛbhbhungu ko bhɛa rotoga ngaanɛoyo.
Na kɔ̀gagung gochonga nu na tɔ damite hinɛoye.’”
35 Na hunaa ngani ɔkkɛa kammayi na senno kɛrtɛsɛ liwa hayachinaye,
argi tomoga gɛ hɔla gaw dhandala kammay tugichinne hunde utudhdhanɛye.
Na yɔk dɛɛbɛ ko chɔgɔnɛ goore.
36 Na hunaa tewa ngangaye,
chɔgɔnɛ dɛbu na seu,
“Mɛa Yoseb ko Simon ninggɛ na igge mɔtao Biniyam sɛgɛn na anye kɛ̀tɛ bhichang!
Ngalɔkta kumulɔng kɔchɔllanɛn :anynyo chi!”
37 Na Robel sɛɛsɛ chɔgɔnɛ,
“Ga Biniyam any anye na kɛtɛ siya nanu na kìdhigan Gibsigiye.
Na hunde ngakidhigannanoye,
tɔgɔn ngaerroya gany may ku rammande.”
38 Na Yaykob nɔng sɛɛsɛ,
“Anye eriya nanu ko igge ngagɔrronu kari ngadhiyoo.
Gɔynɛ anna bere erra na mɛa dhɔynɛ :nɛa sɔng.
Na hunde dheo kari na dokkono lɔkte gɛrsiye,
ngahirra nyaggasany kɔlɔmi kurnugaye ale ajjanyu munyusey na kuru na kɛrɛsiyɔ.”