Lɔgɔ Sabba 37

Lɔga Kunasɛa :Yosebi

1 Na nɔng Yaykob bhagu Kanan baa bere bhakka :chɔgɔnɛ. 2 Na mɛa te lɔga bere Yaykobi ko erroa gɛnyɛ. Nɔng eriya nɛnɛ kènno Yoseb huna anna tɛgay na oynyaa gɛnyɛ anna tɔmmɔn ko issabbay, dha bere iwonɛ ko gɔynggɛa hudhukkonɛa :tɛrroa chɔgɔnɛ Ngabali ko Ngazeliba. Na kali kona shiga lɔkte gɛrɛ messɛ :gɔynggɛuye na koo yogɛsɛ chɔgɔnɛ.

3 Nɔng Isirayel bhɛa erroa gɛnyɛ kumulɔng, dha bere yel Yoseb goore ke ngaya irrittonɛ nyagayɔye, na dhagɛsɛ ruma bo rammaya ɛynya mɛra. 4 Na hunaa gɔynggɛ orrɛa baba nɛ hunde bhɛa nɛ yel Yoseb gooreye, hinisi ngɔ na tamara Yoseb na chɔɔ ngani ngaurrukkannɛo dhul.

5-7 Na kali kona barɔ Yoseb kunau. Na koo yogɛsɛ gɔynggɛ na sɛɛsɛ, “Ga kòyogogung lɔga bare kugunasɛi! Agge se kùsuni liwa. Na hunde kìchib tadhugoye, tadhugoya nanu chilu dib na ga gu oytɛsɛ na nanu kɛrghɛn na tɔgɔndɛsɛ kɔmma.” Na yɔk hunaa shikkɛaye, kɛ nɔng goore.

8 Na ghini :gɔynggɛu na seyɛsɛ, “Seni ale te komoruya nayo na alliyɛiy agge dha?” Na yɔk kɛ nɔng goore ke ngaya shigɛ ngalɔkta wa kunasɛ na yogɛsɛnde.

9 Na kali kona kunau sɛgɛn na koo sɛɛsɛ gɔynggɛ, “Ga shigitɔ! Wa kugunawa sɛgɛn na se su ko tagi ko munyunyde ku tɔmmɔn ko dhɔnɛ kɔdhdhaganyɛ anye kɔmma.”

10 Na koo yogɛsɛ chɔgɔnɛ. Na wologu :chɔgɔnɛ na sɛɛsɛ, “Nganda a kunaye kunɛnɛng? Seni anye ko mama nunu ko gounggu kɔ̀tɔgɔndaginy inye kɔmma chi dha?” 11 Na Yoseb gɔynggɛ hinisi kɔchiyɛ. Nɔng chɔgɔnɛ dha bere ɛsɛdh ngalɔkta wa kunasɛ :hoynɛye na lɔ hinisɔ.

Lɔga Kàtalnɛnɛa Yoseb

12 Na kali kona Yoseb gɔynggɛ tɔgɔ mɛdɛrniya chɔgɔnɛ Sekemɔ jaa bhokonnɔ. 13 Na tɛlda bhee chinyi na Isirayel sɛɛsɛ Yoseb, “Yosebe! Gounggu wa tɔkta mɛdɛrni Sekemɔ na keni kèginy na gɔnydɔ.” Na Yoseb igomu na seu, “Ee!”

14 Na sɛɛsɛ :chɔgɔnɛ, “Ok na gɔny gounggu ko mɛdɛrni hunde ɛl ɛnɛngge na waga na yogogonydɔ!” Na Yoseb bana hororiya Kibironi na ogu bhɛaa kègɛa.

Na hunaa dokko Sekembe, 15 aru :hir konnɔ hunde tanggil mogiyɔye. Na ghinu na sɛɛsɛ, “Ani hirre ngaya lami ɔng?”

16 Na nɔng yagɛsɛ na sɛɛsɛ, “Kalami gochonginyaa ganyu. Hunde iwonɛ oriye, wa arto oo ngani?”

17 Na yagɛsɛ :hiriyɔ na sɛɛsɛ, “Wa ayta. Ngaya ninggɛ. Na wa kishigi hunde mɛzɛɛ na sennɛ, ‘Kɔ̀tɔktɛ Dotanɔye.’”

Na Yoseb kɔbhu gɔynggɛ Dotanɔ na koo aru ngonu. 18 Na yɔk dhartɛsɛ Yoseb ko rɛna hunde ngani kunde, na daga go na kɔtɔgɔdhɔtɔ.

19 Na ɛsɛdhɛ lɔgɔ kɛngɔ na se, “Kunayogi wa kowa! 20 Ga kɔ̀gɔdhɔ na kùjuktɛsɛ ngabolkɛnda manyde kona na zugo kèseyɛsɛ, ‘Wa ussa :guchur!’ Na kàrgi kunaye nɛnde hunde ale i ɛnɛngge.”

21 Na Robel hunaa shikko ngalɔktaye, nɔng tɛhɛnɛsɛ Yoseb bassey na sɛɛsɛ gɔynggɛ, “Ay! Ngakɔ̀gɔdhi. 22 Ujuktɛsɛ ngabolkuya many i korugiye ngayaye hung na nyawa ngalɔmmo.” Nɔng dha bere bhee senɛ ngangaye, a ngaya hinɛsɛn gɔynɛ bassey na kidhiganɛsɛ chɔgɔnɛ ɔrɔye.

23 Na hunaa Yoseb kɔa na dokko bhɛa ɛlɛa :gɔynggɛuye, yɔk maga na bhuruyta ruma nɛnɛ malukko bo rammaya ɛynya mɛra. 24 Na ibhta nɔng na ujuktɛsɛ bolkua many toye. Nɔng dha bere ngabolkuonu toye ma ninggɛ.

25 Na hunaa ɛllanɛa bay na senno kusigi tilaye, dhartɛsɛ ngagaynyaa ku ashaa Ismayeli hunde tɔkkanɛ galisenya na hony Gɛladhagiyeye. Yɔk dha bere galisenyaa gɛ ittɛ ghimamunya ko dhɔllanga bo ɔngɔna hurhur ko na kèmessonɛa zibunya na hɛyɛ Gibsigiye.

26 Na koo Yuhudha sɛɛsɛ gɔynggɛ, “Mɛa hunde kɔ̀gɔdhɔ gochonga na na kɛ̀mɛsɛyɛ, anda bhee ku hologunde a inong? 27 Nɔng a gochonga na tull. Na ko bhee kìnisɛ, ga kɔ̀sɔnisiyo bolkugiye toye na kàtaldɛy bhɛa ngazukta Ismayeliye.” Na ɛsɛdhɛ ngalɔkta na shiktɛ. 28 Na ngagaynyaa bhora Midiya ku ashaa Ismayeli hunaa dokkɛa ngonuye, Yoseb gɔynggɛ obhonisiyo nɔng bolkugiye na talday tomoga hɔla gaw dhandala gee ku 20 na nɔng aytɛ :ngagaynyau Gibsigiye.

29 Na Robel hunaa kɔa na gunynyo Yoseb bolkugiye na dhaa garraye, munyuu na ɛrrɛyu ruma malukko. 30 Na ogo bhɛa gɔynggɛuny na sɛɛsɛ, “Ay! Na kèe eri ngonu ninggɛ! Na anye ngakalda kɔgɔ ori?”

31 Na yɔk koo dhumba tɔng kona na indi na ibhta ruma Yosebi na dhaktɛ nyawa. 32 Na koo ayɛsɛ chɔgɔnɛ na seyɛsɛ, “Ga tak ngarumba kɔjɔanoye. A ruma hoyonu oo a kona?”

33 Na nɔng tagu hunde a ruma Yosebiye, na seu, “Kèe anna Yosebi chi! Na kèe dha bare ussu :guchur na garu.” 34 Na munyuu na ɛrrɛyu ruma nɛnɛ na malugu ruma kìbhɛa duhu na ibhu hoynɛ duhu ungge mɛri. 35 Na erroa gɛnyɛ maya ko ga ngaha hunaa honynyo na kilalate, nɔng tamaru ilal na seu, “Ay! Kamari! Anye kuru eriya nanu na kìdhiyo kari.” Na ibhu duhu dirr. 36 Na yɔk ngagaynyaa bhora Midiya aytɛ Yoseb Gibsigiye na taldɛy bhɛa hira ku gulsaa chinyo kèe Bitibhara allinɛnɛa bholisa komoruya Gibsi.