Lɔga Wogɛa :Yaykobi Betelɔ
35
1 Na koo Tumu sɛɛsɛ Yaykob,
“Bana zɛg Betelɔ na bhak ngonu.
Na echeogony ngawu na eterrisanany anye hira bere kɔdhɔllaginyi rɛ dari kala bere jorɛi goonu Esau.”
2 Na Yaykob sɛɛsɛ zuga gɛnyɛ ko zuga ɛlla kari,
“Dhɔyɔ ngaahaya ibhbho ke barari bere honyɛo oriya bhorinyaa anaaye na ujugutɔ.
Na tonydo ridhingɛa na malugu ruminyaa challa gidhanggeyi ningginɛna.
3 Na banda kago Betelɔ,
na anye kèchɛɛsɛ Tumu ngawu.
Kala bere kɔchɔllanɛnɛi na karɛsɛni nɔng wuy,
annaa bere shikkonyi na kɛllo kari gɔrre kɔgɔyɛye kumulɔng.”
4 Na ibhta ahaa ibhbhɛa :yɔkku ke barari ko archumanyaa gɛ kumulɔng na ayɛ nɔng.
Na nɔng koo ɔgɛ na bhɔgu bhogoniya iho Sekemɔ sugumɔ.
5 Na Yaykob ko erroa gɛnyɛ banda na ago.
Na Tumu bhɛgu yɔk na aynɛ zuga ngaoreonu kumulɔng lɔgɔ na kɛtɛngɛrɛ bho na dɛɛbɛ na Yaykob ko zuga gɛnyɛ hun kon ngani ngamessɛo.
6 Na ago chɔɔ ɔra kèe Loza.
Nɔng Loza dha bere a ngaɔrra mɛa i Kananɔ kèe Betelde.
7 Na Yaykob echiu ngawu ngonu.
Na ngabaonu tɔgɔdhɛsɛ sarre kèe,
“El Betel”a ke ngaya anɛ bhɛa bere dhɔlɛsɛna :Tumu rɛ kala bere jorɛa gɔynɛye.
8 Nɔng tɛriya bere kachcha Ngaribika kèe Ngadibora dha bere rɛ ngonu na koy bhogoniya iho Betelɔ sugumɔ.
Na ngakɛtonu keli “Alo Baku.”b
9 Na hunaa Yaykob wokkono Badharamɔ na iho Betelɔye,
dhɔlɛsɛ :Tumu rɛ sɛgɛn na tuhu.
10 Na tɔgɔdhɛsɛ sarre kèe Isirayel na sɛɛsɛ,
“Inye ngakalda wurtɔ ‘Yaykob’ ngani ngakeliyenyo.
Keliyeny ‘Isirayel.’
11 “Komoruya Kɔani Lɔgɔ Kumulɔng,
kani anye.
Na inye bhɛlɛ na hoyaa gunyu kete mɛri.
Na bhorre ale lɔ komortɛnde mɛrte ko getto bhiy bhiyye,
ale irritton :inynyo.
12 Na mɛa baa bere kajjɛi Awuraham ko Isak kajjiny inye.
Na ale ngani kajjɛ ashaa gunyu sɛgɛn.”
13 Na hunaa Tumu alliyɛa ko Yaykob na tewa ushaye,
kendɛ na nɔng wagu tumɔ.
14 Na bhɛa allinɛnɛa ko Tumu imɛsɛ bɛa bo goore na kete na ale kàgadhdhanɛa ngalɔkta wa yogɛsɛn :Tumuye.
Na udhuyɛsɛ woyn ko mala bhɔrayny.
15 Na ngabaonu bere mɛzɛɛ ko Tumuye,
tɔgɔdhɛsɛ sarre kèe “Betel.”c
Lɔga Rɛsɛa :Ngaraheli Ko :Isaki
16 Na Yaykob ko zuga gɛnyɛ banda Betelɔ na ago.
Na hunaa hɛa na dokkɛa ɔra kèe Ibhirata jaaye,
dha bere Ngarahel se kuhudhugɛyɔ na ilagau gɔrɔ goore.
17 Na hunaa ngani ilagasaye,
tɛriya ibhbho nɔng ilalu na sɛɛsɛ,
“Nyimbɔ,
ngashurnɛni!
Dhaa se hudhugo lusi sɛgɛn.”
Na koo hudhugo lusi.
18 Na hunaa ilagawa goore na senno kereye,
eri tɔgɔdhɛsɛ sarre kèe “Binoni.”
d Na nɔng chɔgɔnɛ tɔgɔdhɛsɛ sarre kèe “Biniyam.”e
19 Na Ngarahel ere na koo kojjigi ganggua kɔa Ibhiratagiye dheyyɔ.
Nɔng dha bere Ibhirata a ngaɔrra mɛa keli Betelembe.
20 Na nɔng Yaykob imu bɛ igingeyɔ tundɔ na ale kàgatay nɔng.
Na ngabɛtonu ko mɛa toye ngani i ngonu.
21 Na Yaykobf ogo na koo tɔgɔdhu dukuwaa nɛnɛ bhee kèe Midal Eder ngatandonu.
22 Na hunaa ngani bhakka ngabaonuye,
nɔng Robel assa tɛriya chɔgɔnɛ chinyo ku gaymay kèe Ngabal na tunggi kari na shigu :chɔgɔnɛ Isirayeli.
Nɔng Isirayel erroa gɛnyɛ dha bere a tɔmmɔn ko ramman.
23 Na erroa gɛnyɛ irrittono bhɛa tɛriya kèe Ngaleya,
na ku aw keli Robel.
Na gɔynggɛa kɔbhbhanɛa nɔng keli Simon ko Lewi ko Yuhudha ko Isakor ko Zabilon.
24 Na yɔk ga irrittono bhɛa Ngaraheli a Yoseb ko Biniyam.
25 Na ga irrittono bhɛa gaymaya Ngaraheli kèe Ngabal a Dan ko Nibitalem.
26 Na ga irrittono bhɛa gaymaya Ngaleya kèe Ngazeliba a Aser ko Gad.
Ngaerroya kumulɔng agga bere irrittono :Yaykobi ihineya bere bhagɛa Badharam.