Lɔga Bhiigɛsɛna :Tumu Awuram Ko Ashaa Gɛnyɛ Kènno Kègendɛ Rɛhiya Maya
17
1 Na Awuram hunaa oynyaa gɛnyɛ anna 99de,
dhɔlɛsɛ ꞉Tumu rɛ na sɛɛsɛ,
“Anye kani ‘El Shaday,’
Komoruya Kɔani Lɔgɔ Kumulɔng.
Na igomogony anye na kali kali bhɛk lɔga ganyu ku dhere sɔng na te hira ridhing ningginɛna.
2 Na mɛa anye kubhugɛsɛn lɔga bere kìbhiikko ko inye na ale kɛbhɛlliny na ashaa gunyu a mɛri.”
3 Na Awuram tɔgɔdhu kɔmma na dhugumu.
Na hunaa ngani dhugummoye,
sɛɛsɛ ꞉Tumu,
4 “Lɔkte kìbhiik ko inyeye a ɛnɛnggeo,
inye ale kojjiny na ani kokonga bhorinyaa mɛra.
5 Na mɛa sara gunyu Awurama ale ngani ngakeliyenyo.
Na keliyeny Awurahamb ke ngaya ale kojjɛiny na anɛ kokonga bhorinyany kumulɔngge.
6 Na ale kɛbhɛlliny na ashaa gunyu a mɛri na komortɛn ale bansanɛ bhɛa bhorinyaa gunyu.
7 Na bhɛa nunu ko ashaa gunyu ko tenyiye ale ngani chillanɛye,
lɔga bere kìbhiikko ko inye ale kɔlɔmi dhul ko kingi na kani Komoruya nunu ko na ashaa gunyu.
8 Na mɛa ngabaya kèe Kanan bhagi kɔmɔnimoye ale kajjiny inye ko ashaa gunyu na kani Tumua nɛ dhul ko kingi.
9 “Na mɛa inye ko ashaye guny ale chillanɛ wurtɔye kumulɔng,
maya igomogonyu anye sɔng na bhɛkko lɔga bere kibhiikkaginyi.
10 Na lɔkte kìbhiikkagungge a ɛnɛnggeo,
zuga gunyu maya kumulɔng any kegedhigi rɛhiya maya
11 na kete tela kìbhiigɛa ko igge lɔgɔ.
12-13 Tenya mɛane ko tenyiye ale chillanɛ wurtɔye kumulɔng hunde ga maya hudhukkinya na ungo te isseyte,
any kegedhigi rɛhiya gɛ maya.
Na chɔɔ ko hunde kete zuga maya tallano oo kete ga irrittono ɛrchɛnne doriyoa gu,
any kegedhigi rɛhiya gɛ maya nganga sɛgɛn.
Ngatelda a tela kìbhiigɛa ko igge lɔgɔ na ale lɔmmo rɛhichinne dhul ko kingi.
14 Nɔng hira maya hunde rɛa nɛnɛ maya ngani kegedhoye,
ngangaye nɔng dha a hira lɔga bere kìbhiikko ko igge ngani kɛbhɛkkao na kɛnginya na ko zuga ganyu kari ngabhakkɛo.
15 Na mɛa tɛriya nunu eli sarre kèe Ngasara.
Ngasaray ngaelii.
16 Nɔng ale kutuhi na kajjɛ erite may.
Na ale kutuhi na a kaka bhorinyany.
Na komortɛna allinɛnɛa bhorinyaa mɛra ale bansanɛ bhɛa nɛnɛ.”
17 Na Awuraham tɔgɔdhu kɔmma na dhugumu na ɛsɛdhu lɔgɔ na chɛgu na seu,
“Ngangaye,
hira oynya ku 100 anda ale eri irrittono ɛnɛng?
Chɔɔ ko nɔng Ngasara aynda oynyaa gɛnyɛ dhaa te 90de na anda ale eri lɔmmana ɛnɛng?”
18 Na Awuraham yagɛsɛ Tumu na sɛɛsɛ,
“Hunde tuh Ismayel,
chali goore!”
19 Na sɛɛsɛ ꞉Tumu,
“Ay,
ale tɛriya nunu Ngasara hudhukkono erite may dhere.
Na ale kɔdhɛsɛn sarre kèe Isak.
Na lɔga ale kìbhiikko ko nɔng ko ashaa gɛnyɛ agga ɛlla dhul ko kingi.
20 Na yɔk lɔgaa ghinɛanyi na seni kàynɛ Ismayel wa kishikka.
Nɔng ale kutuhi na kɛbhɛli na ashaa gɛnyɛ a mɛri.
Na ale a babaa bhora bo lɔma komortɛnde ku tɔmmɔn ko ramman.
21 Na yɔk lɔga ganyu bere kìbhiikko ko inye ale kubhugɛsɛn erite ale hudhukkono :Ngasara kèe Isakte.
Nɔng ngaeritonu ale hudhukkinya rogonɔ oyogiye ngakoleya.”
22 Na hunaa Tumu yogɛsɛa Awuraham lɔgɔ na tewa ushaye,
kendɛ na nɔng ogo.
23-27 Na ngakaldonu Awuraham ibha eriya nɛnɛ Ismayel ko gaymanyaa maya kàtallana bhokonnɔ ko ga kìrrittono ɛrchɛnne doraa nɛnɛ ko zuga maya ɛlla doraa nɛnɛ kumulɔng na kedhu rɛhiya gɛ maya damiyaa yogɛsɛna ꞉Tumu.
Na Awuraham huna kègedhdho rɛa nɛnɛ maya,
oynyaa gɛnyɛ dha bere a 99.
Na eriya nɛnɛ Ismayel oynyaa gɛnyɛ a tɔmmɔn ko sizzi.
Yɔk dha bere Awuraham ko eriya nɛnɛ ko ngazuktonu kumulɔng rɛhiya maya kègen kala dhɔnɛna.