Lɔga Bhiigɛsɛna :Tumu Awuram
15
1 Na hunaa ngalɔktonu tewa ushaye,
Awuram kunau na sɛɛsɛ ꞉Tumu,
“Awurame,
bho ngaɛngɛrsi.
Anye kani goshua nunu na kɛɛnginy lɔga gɛrsa kumulɔng na kutuheny goore.”
2 Na nɔng yagɛsɛ na sɛɛsɛ,
“Komoru Tumuye,
seni tuhony na kème ɔng?
Kèe erite dhɔnɛ ninggɛnanyɔ na ale chɔɔ ahaa ganyu sɛrɛ ꞉hira Dɛmasko kènno Elezer.
3 Na chɔɔ inye erite dhɔnɛ ngani anynyo na ahaa ganyu ale sɛrɛ ꞉hira mesinɛna doraa nanu.”
4 Na koo shigu lɔga yogɛsɛna ꞉Tumu gee sennɛ,
“Ahaa gunyu ale sɛrɛ :eriya irrittoni :inynyo.
Hira mesinɛna doraa nunu kèe Elezer ngasɛrɛo.”
5 Na obhoniseo ꞉Tumu bho na sɛɛsɛ,
“Ga gɔny munyunyaa tumony.
Na hunde anda ɔande,
toyiyɔ.
Ale ashaa gunyu a nganga.”
6 Na Awuram yɛbhu Tumu.
Na yɛbhaa nɛnɛ gɔnyu ꞉Tumu na bhɛa nɛnɛ te hira bo hɔla ridhing ningginɛna.
7 Na sɛɛsɛ :Tumu,
“Na bere kobhoniseoninyi ɔra Kaladani kèe Ur na kajjinyi ngabaya na keni sɛrɛa,
kani anye Tumu.”
8 Na ghinu na sɛɛsɛ,
“Komoru Tumuye,
ngangaye anye ngabaya hunde ale kɛsɛrɛ ꞉anynyoye,
kagga ɛnɛng?”
9 Na sɛɛsɛ :Tumu,
“Ga ok na tɔgagany bosongi dhɔnɛ ko royɔ dhɔnɛ ko mɛdɛra ku ole dhɔnɛ ga oynyaa gɛ ku sizzi sizzi.
Na tɔrɛ yelay dhɔnɛ ko yikkay dhɔnɛ.”
10 Na Awuram tɔgɛsɛ ngaahaya kumulɔng.
Na koo inu na bhɛlu kɛngi na ngɛru bhiy bhiy na ojju kɔrgɔrɔ gaminya ramman sɛtɛn ko kangitɛn.
Na yɔk shɔa kedhu na ngani ngabhɛllo.
11 Na hunaa ayugɛna ngani ɛlla bayte,
dhongga ko shɔaa ammɛa ayuk gena hoya na kusigitɔ.
Na chɔu ꞉Awurami.
12 Na hunaa su senno kɔngɔye,
Awuram tungu ke rɛsɛ na mugura bo kɛ̀ngɛrsa dhiya ba tirr.
13 Na sɛɛsɛ ꞉Tumu,
“Ashaa gunyu taktɔ hunde ale a kɔmɔn na bhakkɛ ɔra anaa na kìtiranyɛ ke gaymanya oynya 400de.
14 Na yɔk bhorre ale tiranynyɛ ke gaymanyaye ale katiiyɔ.
Na ashaa gunyu ale mukkanɛ ahaye mɛri ngabaonu na honydɔ.
15 Na inye nɔng ale bhagi ba bɛrgunyaye mɛri na rɛsi na kòjjiny ke na bo challa hung.
16 Na ale ashaa gunyu ɛl tenyi sizzi na naa anɛa wush wokkonɛyɔ.
Bhee ale ɛlɛ ngonu tenyi wuyte,
a ngaya zuga Amora lɔga gɛ gɛrsa ngani kɔdhɔttɛoye.”
17 Na hunaa su ngɔa na bho tewa kɔrrɔye,
kargi samba rɛɛɔ hunde bhurruttɛye ko kalkay hunde walat na kòdhoyɛ ayugɛna kɛrghɛnde.
18 Na ngakaldonu Tumu bhiigɛsɛ Awuram lɔgɔ na sɛɛsɛ,
“Ngabaya kɔdhdhanɛ kidhoa Gibsi na dok kidhoa Ibiratisiye kumulɔng wa kaynɛu ashaa gunyu.
19 Na ale kajjɛ chɔɔ baa bhorinyaa Kenani ko na bhora Kenezani ko na Kadamoni
20 ko na Hitani ko na Bhɛrɛzani ko na Rɛbhani
21 ko na Amora ko na Kanani ko na Gergesani ko na Yabusani kumulɔng.”