Lɔga Kennɛnɛa :Awuram Ko :Lot
13
1 Na Awuram ibha tɛriya nɛnɛ ko ahaa gɛnyɛ na dhɔyu Gibsi na zɛgu Negebɔ.
Na ko nɔng Lot dha bere dhɛɛ kari.
2 Na nɔng Awuram bere anna hira bo lɔma ahaa mɛra,
beo ko tomoga hɔla gaw dhandalaa ko worginya.
3-4 Na bana Negebɔ na tɔyɛ ba ko bhee dogɛ Betel.
Na ngabaonu a bhɛa bere kɔdhdhɛa dukuwa sabbɔ na echisɛna Tumu ngawu iho Betelɔ ko Ayiyɔ kɛrghɛnɔ.
Na nɔng ngonu eterrisanu Tumu na tɔgɔdhɛsɛ kɔmma.
5 Na hira ziggɛa kari kèe Lot ko nɔng bere anna hira lɔma ahaa mɛra,
beo ko tenɔ ko mɛdɛrni ko dukuwachina.
6 Na yɔk ahaa gɛ te mɛri na bhɛa iwoyɛa beo na bhagɛa kari tɛu gɛrrɛng.
7 Na zuga iwoyɛa bea Awurami ko ga Loti dhaktɛy terri.
Ngabɛrguonu dha bere zuga bhora Kanani ko ga Bhɛrɛzani ko yɔk bhakkɛ ngabaonu.
8 Na koo Awuram sɛɛsɛ Lot,
“Agge kan gɔynggɛ na bhee kɛ̀kɛnyanɛnɛ kɛngɔ oo bhee ɛkɛnyanɛnɛ zuga ga iwonɛna ninggɛ.
9 Ba ngaanno bu?
Ga bɛra ba bhee hiniye.
Na inye hunde zigi kangitɛnde,
anye kɛ̀zɛg sɛtɛn.
Oo hunde inye zigi sɛtɛnde,
anye kɛ̀zɛg kangitɛn.”
10 Na Lot gɔnyu gɔra Zowari na dharɛsɛ baa Yordanosi hunde lɔ maye na seu,
“Yee,
baa hɛtta ko dara bere Tumu ko baa Gibsi a nganda.”
Nɔng ngakaldonu oriya kènno Sodom ko Gomora dha bere Tumu ngani kidhito.
11 Na nɔng Lot bɛra mogiya Yordanosi iho ray kumulɔng.
Na kendɛ na Lot zɛgu yalɔ.
12 Na nɔng Awuram bhagu Kanan.
Na Lot nɔng bhagu oriya ɛlla mogiyɔ kɛrghɛnɔ na tɔgɔdhu dukuwachina gɛnyɛ Sodomɔ jaa.
13 Na zuga Sodomi bere anna zuga ku kuhuyaga messɛa lɔga bo gɛrsa munyusɛɛna chɔɔ ꞉Tumu.
14 Na hunaa Lot zɛgaye,
Tumu sɛɛsɛ Awuram,
“Ga gɔny ba kumulɔng.b
15 Ngabaya mɛa gunyiye kumulɔng ale kajjiny inye ko ashaa gunyuyec na anna nu dhul ko kingi.
16 Na kɛbhɛlliny na ashaa gunyu hɛ ko kasaya bany.
Na damiya kòtoyiyɛa kasay na ngakɔ̀anɛayo,
ko yɔk ale ashaa gunyu a mɛri na toyi rɛkkiytɔ.
17 Na ga bana tɔyɛ ngabaya wa kɔdhɔllaginyde kumulɔng na kainyɔ.”
18 Na Awuram bolio dukuwachina gɛnyɛ na zɛgu Kibironɔ bhogonaa hira kèe Mamirɛ bibiyo jaa na bhagu ngonu.
Na koo echɛɛsɛ Tumu ngawu.