Doraa Ku Bɛ Rammaya Kèe Babilon
11
1 Na bere zuga bhakkɛa ba kumulɔng mɛziyɛa tukte dhɔnɛ.
2 Na banda yalɔ na ago na dakta mogi kona Sinarɔ na bhaga ngonu.
3 Na muktiyaa na daga go na se,
“Kètegenye digir na kòtobo na kete dhandali.”
Na hunaa ɛsɛdhdhɛa ngangaye,
dhumba simbiliya kɔrra dhuhana ba toye senno kibhtɛ digiraa tobbɛa.a
4 Na se,
“Kɔ̀tɔgɔdhɔ ɔr.
Na kɔ̀tɔgɔdhɔ doraa bo rammaya kɔdhdha tumu na ngakabhasanɛ.
Na kàbhaga bhee dhɔnɛ na kòtoyiyɛytɔ.”
5 Na koo Tumu gɔnyub ngaɔrra kɔdhdhɛ ꞉zuguye ko ngadoriya se kɔgɔn tumuye
6 na seu,
“Ngazukta a dhɔnɛ na mɛzɛɛ tukte dhɔnɛ.
Na mɛa wa tɔgɔndayɛa ngalɔkta se kemesigite.
Na ngalɔkta ɛsɛdhdhɛ na se kemesigi :yɔkkuye kumulɔng,
ale messɛyɔ ke ngaya hirre kanyɛ yɔk ninggɛye.
7 Na ga banda kàgo bay na kàchaya tugiya gɛ na kɛmɛzi tugi genne bhiy bhiy na kɛngɔ ngashiginɛ.”
8 Na bhasayɛsɛ ꞉Tumu ba kumulɔng na doraa senno kɔgɔdhɔyɛ dhɔyɔyɛ.
9 Na ngaɔrronu kɔ̀tɔgɔndɛsɛ sarre kèe Babilon ke ngaya Tumu ngɛrɛ tugiya zugonyde.
Na ibha zugo na bhasayɛsɛ ba kumulɔng.
Ashaa Semi Bhɛlnɛna Na Hɛa Na Dokkɛa Bɛrgua Awurami
10 Na mɛa te lɔga hira bere shuranɛa maa dhittɛa ba kènno Sem ko ashaa gɛnyɛ.
Na huna maa dhittɛa ba ushurronɛa,
dha bere oynyaa Semi a 98.
Na tɛu oynya ramman na irriyo Arbakasa.
11 Na hunaa irriyoa Arbakasaye,
bhagu ba oynya 500 na irriyo lusa ko sedhdhe gen.
12 Na nɔng Arbakasa hunaa oynyaa gɛnyɛ anna 35ye,
irriyo Shela.
13 Na hunaa irriyoa Shelaye,
bhagu ba oynya 403 na irriyo lusa ko sedhdhe gen.
14 Na nɔng Shela hunaa oynyaa gɛnyɛ anna 30de,
irriyo Eberi.
15 Na hunaa irriyoa Eberiye,
bhagu ba oynya 403 na irriyo lusa ko sedhdhe gen.
16 Na nɔng Eberi hunaa oynyaa gɛnyɛ anna 34te,
irriyo Bhilak.
17 Na hunaa irriyoa Bhilakte,
bhagu ba oynya 430 na irriyo lusa ko sedhdhe gen.
18 Na nɔng Bhilak hunaa oynyaa gɛnyɛ anna 30de,
irriyo Rawun.
19 Na hunaa irriyoa Rawunde,
bhagu ba oynya 209 na irriyo lusa ko sedhdhe gen.
20 Na nɔng Rawun hunaa oynyaa gɛnyɛ anna 32de,
irriyo Seruk.
21 Na hunaa irriyoa Serukte,
bhagu ba oynya 207 na irriyo lusa ko sedhdhe gen.
22 Na nɔng Seruk hunaa oynyaa gɛnyɛ anna 30de,
irriyo Nakor.
23 Na hunaa irriyoa Nakorte,
bhagu ba oynya 200 na irriyo lusa ko sedhdhe gen.
24 Na nɔng Nakor hunaa oynyaa gɛnyɛ anna 29de,
irriyo Taran.
25 Na hunaa irriyoa Tarande,
bhagu ba oynya 119 na irriyo lusa ko sedhdhe gen.
26 Na nɔng Taran hunaa oynyaa gɛnyɛ anna 70de,
irriyo Awuram ko Nakor ko Haran.
27 Mɛa kago lɔga bere Tarani ko ashaa gɛnyɛ.
Nɔng Taran dha bere irrittono Awuram ko Nakor ko Haran.
Na nɔng Haran irriyo Lot.
28 Na koo Haran ere ɔra bere irrittinyanɛa kèe Ur huna chɔgɔnɛ ngani ihɛa basseyɔ.
Na ngabaonu kèe Urte i baa Kaladani.
29 Na Awuram ko Nakor dhumba tɛrro kari.
Tɛriya Awurami keli Ngasaray.
Na na Nakori keli Ngamilka.
Na yɔk Ngamilka ko ngɔnɛa kèleo Ngayisika a sedhdhea Harani kari.
30 Na nɔng Ngasaray dha bere wo hɔlɔng.
Eri ninggɛ.
31 Na nɔng Taran ibha eriya nɛnɛ Awuram ko mɛrɛya nɛnɛ Ngasaray ko ashaya nɛnɛ bere irrittono :Harani kènno Lot na dhɔyɔ ɔra nɛ kèe Ur iho baa Kaladani na zɛgɛ Kananɔ.
Na hunaa ziggɛaye,
daga Karan na bhaga ngonu.
32 Na Taran hunaa oynyaa gɛnyɛ anna 205ye,
ere Karanɔ.