Sɔli yi bɔ Yezu cɛladana lɛ
9
1 Yi waan nɔ, Sɔli y'a tasɛrɛ m'á n sa Dana fu cɛladanan tɔ ma, a ni ǹ jɛ ǹ ni gin. A ya wɔrɔ a kanbɔlɛ cidan ji, 2 a n sɛbɛ si Damasinɛn fu Zuwifun fu cilo cin mun tɔ ma; cina m'á gulɛn nkǝ lɔn ye Dana fu zɛ la, á ni ǹ gun á ni ǹ yɛrɛ á n da kə ǹ nɔ Zeruzalɛmu.3 Sɔli y'a zɛ la wulɛ, a ya jɛsɔ kɔ Damasi ma. A lo jɛnɛ, fulen gɔ ya bɔ len, a n da ka a ma. 4 Sɔli ya bɔ a n məna turu, a ya lɛsɛ gɔ lɛ ma sɛ prɛ á ji:
— Sɔli, Sɔli, kɔn ya ń yi mə kukwere?
5 Sɔli tǝ landa:
— Dana, je yi kə ńcɛn?
A lɛsɛ ni pɛn:
— Ma yi Yezu lɛ, ń ni mə kukwere. 6 Fo, sa ń wɔ a cuuri, ń bɛ narɛ ma ń sɛ kəna zanɛ, ǹ da yi pɛn ń nɛ.
7 Sɔli munu zɛ tɔwulen ya gɔn dreeɲi, ǹ y'a sɛ prɛ marɛ, fo ǹ yɛɛ bə mu zɛɛn la ba. 8 Sɔli ya sa, a yɛɛ jin yi cɛlɛ, fo ǹ bǝ fɔ zɛɛn ye ba. Ǹ munun n'a gun a wɔn ma, ǹ ni wɔ wɔ k'a nɔ Damasi cuuri. 9 A ya gura yɛɛcinibra nɔ lɛmɛ cɔw, a bə fɔ barɛ ba, a dɔ bə fɔ minre ba.
10 Yezu cɛladana gɔ yi Damasi cuuri, a tɔ mə̀ Ananiyasi. Dana n'ácɛn ɲa a nɛ a ni pɛn:
— Ananiyasi!
A ni lɛsi:
— Mə bɛ, Dana.
11 Dana t'a pɛn a nɛ:
— «Wɔrɔ a zɛ la, ǹ bɛ a zɛ kəna beere mə̀ zɛ telere, ń wɔ Zudasi lɛ ń landa Sɔli ji, Tarisina ya. A yi Laa ɲɔnɔ ma ci waa ci nɔ. 12 Gulɛ gɔ ya mə ni ɲa a nɛ a fu Laa ɲɔnɔ nɔ, a tɔ n kə Ananiyasi, yi n wɔrɛ cin, a n'á wɔn darɛ a la, cina a yɛɛ n jɛn ye.
13 Ananiyasi ni lɛsi:
— Dana, a gulɛ ci bɛ sɛ bubu kəna tuma zan ń fu mun nɛ Zeruzalɛmu, mə ya yin ma mu mɔnlɛ lɛ nɔ. 14 A kanbɔlɛn cidan ya gɔɔn kɔ a la, a n da cina a ni ń tɔ dokɔlɛn tuman gun.
15 Fo, Dana ni pɛn a nɛ:
— Wɔrɔ, a buru a gulɛ ce ya mə ni yɛɛ yɔ, cina a ni ma tɔ pɛn tɔyɛn silan nkǝ ǹ fu ciin nkǝ Isirayɛli mun nɛ. 16 A bɛ da kukweye kəna tuma ye ma tɔ ma, macɛn da yi ɲa a nɛ.
17 Ananiyasi tǝ wɔrɔ, a ya wɔ a cin a n'á wɔn da Sɔli la a ni pɛn:
— Mə nanɛ Sɔli, Dana Yezu kəna bɛ n'ácɛn ɲa ń nɛ a ni ń kura a zɛ la darɛ, aci ni mə ja mə̀ mə da mə wɔn da ń la, cina ń yɛɛ n jɛn ye, nkə Ɲile Sɔbɛ n jise ń la.
18 A lo jɛnɛ, fɔ fɔn ya bɔ a yɛɛ lɛ ǹ ni məna, a yɛɛ dɔ n jɛn ye. A tə sa a n'á batise. 19 A tə bɛɛrɛ barɛ a n gɔɔn ye.
Sɔli yi Bure nina prɛ Damasi cuuri
Sɔli ya lɛmɛ dansisini zan k'a cɛladananɔ Damasi. 20 A ya dɔ a ma a ni pɛn Zuwifun fu cilo cin nɔ, mə̀ Yezu yi Laa fu Nɛ lɛ. 21 Kǝnan tuman bɛ a lɛ marɛ, yin yi kabarɛ mǝ̀ ǹ n'a prɛ:
— A gulɛ ci bǝ gura Yezu fu mun kukweye Zeruzalɛmu cuu ba? A bə da cina n jɛnɛ, cina a n da ǹ gun a n wɔ ǹ kɔ a kanbɔlɛn cidan la ba?
22 Fo, Sɔli yi sɛ prɛ kǝ fɔtiinbra m'a n Damasi fu Zuwifun yii wuɲarɛ, a y'a prɛ mǝ̀ Yezu yi Krista lɛ.
23 Lɛmɛn n kɔn kanlɛ cɛrɛ, a Zuwifun ni ǹ ɲɛ ye ǹ ni darɛ a ɲile bɔ. 24 Fo Sɔli ya yi ma; ǹ ya gura a cuu cɛnlilɛn kole pini n bɔ nkǝ jinci, cina ǹ n'a jɛ. 25 Jinci gɔ ji, a cɛladanan tə Sɔli da dɔ nɔ ǹ n'a jise kǝ kisi a cuu cɛ ji.
Sɔli n'á beere a n wɔ Zeruzalɛmu
26 Sɔli bɛ dɔ Zeruzalɛmu, a ya ga a ji, a n wɔ wɔ a cɛladanan ji. Fo ǹ tuman yi ɲiri a nɛ, a buru ǹ bǝ la a la m'a ya bɔ cɛladana lɛ sɔbɛ ba. 27 Barinabasi t'a gun a ni da á ji, a n wɔ k'a nɔ a jajimawulen ji. Dana bɛ sɛ pɛn Sɔli ji a zɛ la kəna giri, nk'a bɛ Bure nina kəna pɛn Damasi kə fɔtiinbra Yezu tɔ paan nɔ, Barinabasi ya yi pɛn ǹ nɛ. 28 A n gun yi ma, Sɔli yi wulɛ a n da ǹ ji Zeruzalɛmu, a yi Bure nina prɛ kǝ fɔtiinbra Yezu tɔ ma. 29 Zuwifun kǝnan bɛ girɛki lɛsɛ prɛ, a yi suun wɔ kə yin dɔ n nɔ; fo yin yi garɛ ji ǹ n'a jɛ. 30 Nanɛn bɛ ni yi ma, ǹ ya wɔ k'a nɔ Sezare cuuri, ǹ tǝ ǹ kura yi jɛnɛ ǹ n'a ja Tarisi.
31 Yi waa ce nɔ, Krista fu zama kənan bɛ Zude nkə Galile nkə Samari, yin ya gura laɲɔtɔ nɔ. Ǹ yi ǹ ɲɛ fɔtiin kɔrɛ, mə̀ ǹ ni yɛɛkomanabra Dana fu ɲii yɛɛ nɛ nɔ. Fɔ yi da ǹ ji Ɲile Sɔbɛ paan nɔ.
Ene fu kerence kɔ sɛrɛ
32 Piyɛri ya gura yɔɔrɛ a gana jɛn tuman nɔ. Gɔ pini, a ya wɔ bɔ Krista fu cɛladanan ji Lida gana nɔ. 33 A ya da gulɛ gɔ yira bi, a tɔ n kə Ene. A cɛ cigisi yi kə ce, a n waature karigata la, a buru a yi bɔlɔgɔ lɛ. 34 Piyɛri ni pɛn a nɛ:
— Ene, Yezu Krista ni ń kerence kɔ. Sa, ń ni ń fu karigata sa.
Tabita yɛɛ cira sɛrɛ
36 Krista cɛladana lɔna gɔ ya gura Zope cuuri, a tɔ n kə Tabita; girɛki lɛsɛ nɔ Dɔrikasi ya, yi buru mǝ̀ «Burɔ.» A yi sisɛ zanlɛ, nkə dɔ a yi waan jamarɛ. 37 Yi waa wulɛ nɔ, a ya məna kə busu fantan a n gin. Ǹ t'a jii zɔrɔ ǹ ni wɔrɔ a da a sangaso nɔ. 38 Cɛladanan kənan bɛ Zope cuuri, yin n'a ma mə̀ Piyɛri yi bi Lidi cuuri, a buru yi gana pra yi jɛsɔ ǹ ɲɛ ma. Ǹ tə mu pra ja, mǝ̀ ǹ ni wɔrɔ a pɛn Piyɛri nɛ, m'a n da ǹ ji sisa baarɛ.
39 Piyɛri ya wɔ ǹ cɛ la á lo jɛnɛ. A bɛ dɔ, ǹ ya wɔ wɔ k'a nɔ a sangaso nɔ. A jɔlɔn tuman ni ǹ mɔrɔ a ma, ǹ yi wu pɛɛrɛ mǝ̀ ǹ ni Dɔrikasi fu minɛ tan ɲarɛ a nɛ, a bɛ yin kənan tan a ni yɛɛkoma kura. 40 Piyɛri ni a mun tuman ka cɛlɛ, a tə kunkuro a n Laa ɲɔnɔ. Yi cɛrɛ, a n'á tele a jii la a ni pɛn:
— Tabita, sa.
A n'á yɛɛ mɛ, a bɛ Piyɛri ye, a ya sa a n jina turu. 41 Piyɛri ni gun a wɔn ma a ni a sa len. A t'a cɛladanan nk'a jɔlɔn bǝri a n Tabita ɲa ǹ nɛ, a yɛɛ n ko.