Ecɛni y'á lɛsɛ prɛ
7
1 A kanbɔlɛ cida do ya landa Ecɛni la:— Ǹ bɛ kəna prɛ, caan ya?
2 Ecɛni ni lɛsi:
— Mə nanɛn nkǝ mǝ yaanɔ, kə kə tɔkɔ mə ji. Zaanbradana Laa n'ácɛn ɲa wu yilo Abrahamu nɛ, a ni a kura Mezopotami gana nɔ, a tə jina a n da Karan gana nɔ. 3 A ni pɛn a nɛ: «Sɔrɔ ń ni ń fu gana nkə ń fu sun dala, mə bɛ da gana kəna ɲa ń nɛ, ń wɔ yi nɔ.» 4 Abrahamu tǝ sɔ Salde gana nɔ, a n wɔ jina Aran. Ǹ yaa jɛ cɛrɛ, Laa t'a bɔ yi jɛnɛ, a n da k'a nɔ cina, kə bɛ jɛn kəna jɛn sisa. 5 Laa bə jɛn zɛɛn kɔ Abrahamu la cina ba, haalɛ gɔn da jɛn cɛnɛ, a b'a kɔ a la ba. Fo, a n'á lɛkanɛ a nɛ, m'á da a kɔ a la a n gura a fu nɛ ɲaan fu bra nɔ. Da yira dɔ, nɛ bə Abrahamu ji ba. 6 Laa ni pɛn a nɛ: «Ń fu nɛ ɲaan fu nɛ ɲaan da bɔ yiran lɛ gana sila nɔ, ǹ da ǹ kukweye fantan cɛ baan sii. 7 Fo, gana kəna mun bɛ da ǹ bɔ yiran lɛ, ma da citi kan yin la. Yi cɛrɛ, ǹ da sɔrɔ ǹ ni da mə dokɔ cina n jɛnɛ.» 8 Yi lɛkan wɔ cinsi yi kə ce: nɛ gulɛnan dɔkan sɛrɛ. Yi tɔ ma ya, Abrahamu n'á fu nɛ Izaki kanɛ a ye lɛmɛ cigisi n funa pini. Izaki dɔ n'á fu nɛ Zakɔbu kanɛ, Zakɔbu dɔ n'á fu nɛ ɲaa fulepra n kanɛ, ǹcin kǝnan bɛ wu yilon lɛ.
9 Wu yilon fɔ ya kaan Zozɛfu ji, ǹ t'a san Ezipiti gana wɔwulen la. Fo, Laa ya gura a ji, 10 a ni a bɔ lwa tuma nɔ. A ya yiidanabra nkə sisɛ kɔ a la Ezipiti cii Farɔn yɛɛ lo. Yi t'a da Ezipiti gana nk'á fu sun ɲiin lo. 11 Bɔɔ do ya da a n da wɔ Ezipiti nkǝ Kanaa gana tuma nɔ. A lwa lɛ ya do kɔ, wu yilon lɛ bǝ kan dɔ ba. 12 Zakɔbu t'a ma mǝ̀ bɛɛrɛ yi bi Ezipiti gana nɔ, a tə wu yilon ja a bile ma. 13 Ǹ fu wɔ pra n funa ji, Zozɛfu n'ácɛn ɲa á nanɛn nɛ. Yi bɔsɛ ji ya Farɔn ni a bɔ jɛn dɔn. 14 Zozɛfu tǝ mun ja á yaa Zakɔbu nk'á kɔrɔn cɛ la ǹ ni da kə ǹ nɔ, ǹ tuman karɛ á ɲɛ ji ya dɔ mu bafobaa kə nɛ sɔɔ nɔ. 15 Zakɔbu ya da Ezipiti, aci nkə wu yilon tuman ya gin yi jɛnɛ. 16 Abrahamu bɛ jiin bə jɛn kəna pɛɛ kə pan Amɔru fu nɛ ɲaan ji Sisɛmu, ǹ ni ǹ jiin sa ǹ ni wɔ ǹ bə yi jɛnɛ.
17 Laa bɛ lɛkan kəna wɔ Abrahamu nɛ, yi lɛ pan waa ya jɛsɔ kɔ. Wa mun ya bɔbɔ Ezipiti gana nɔ. 18 Fo waa gɔ waa ya da dɔ, cii sila ni gɔɔn sa, kəna bɛ bə Zozɛfu dɔn ba. 19 Yi cii ci ya bubu kɔ wu yilon ma. A ni ǹ da ǹ fu nɛzɔn dəra ma gɔɔn ma, cina ǹ bə ra la ba. 20 Yi waa ce ya Moyizi ya ye. A yi nɛ zaan lɛ, Laa dɔ y'a nanlɛ. A ya tɔrɛ á yaa fu sun nɔ muli cɔɔw, 21 ǹ tə wɔrɔ a dəra. A cii fu nɛ lɔna ni a ye, a ni a sa, a ni a tɔrɛ ácɛn fubra nɔ. 22 Ǹ ya Moyizi jije Ezipiti mun fu sɛdɔn tuma ma, gɔɔn nkə sɛprɛ y'a wɔn nɔ.
23 A bɛ dɔ cɛ pusi, a ya sa a n wɔ bɔ á nanɛn Isirayɛli nɛn ji. 24 A ya wɔ kaɲa Ezipitina gɔ ma á nanɛ gɔ lwarɛ, a ya wɔ á nanɛ ji, a ni a Ezipitina jɛ a n gin. 25 A yii rɔ tɔn á nanɛn da a dɔn mə̀ Laa da kanɛ áci ji, a ni ǹ ɲile kana, fo ǹ bə yi dɔn ba. 26 A lɛmɛrɛ, a ya wɔ Isirayɛli nɛ pra yira ǹ ɲɛ jɛrɛ. A tə ǹ bɔ ǹ ɲɛ ma a ni pɛn: «Mə tɔnɔ, kɔn ya zanɛ kǝ yi kə ɲɛ jɛrɛ kə dɔ yi gɔrɔ?» 27 Fo kəna gɔɔn bɛ la á munu nɛ, yi ya Moyizi ɲina a ni pɛn a nɛ: «Je ni ń da wucɛn ɲiin lo mə̀ ń citi kan wu la? 28 Ń y'a ji ń ni ma dɔ jɛ, tɔn ń bɛ ni a Ezipitina jɛ gunu kǝna giri?» 29 Moyizi bɛ yi ma, a ni ya, a n wɔrɔ á dunu Madiɲan gana nɔ. A ni a kura yi jɛnɛ, a ya nɛ gulɛna pra ye.
30 Cɛ pusi kanlɛ cɛrɛ, len jipɛlɛ gɔ n'ácɛn ɲa a nɛ Sinayi tutun la a din bə rɔ cɛ ninɛ nɔ. 31 Moyizi bɛ yi ye, a ya kaba. A y'a ji á n'á mɔrɔ á ni ye a zaan ma. A tə Dana lɛ ma a prɛ: 32 «Ma yi ń yilon fu Laa lɛ, mə yi Abrahamu nkə Izaki nkə Zakɔbu n fu Laa lɛ.» Moyizi yi bəbɛnrɛ, a yɛɛ bə wɔrɛ a n garɛ a ma ba. 33 Dana t'a pɛn a nɛ: «Ń fu kɔsɛn bɔ, a buru ń yi gɔnlɛ jɛn sɔbɛ nɔ. 34 Mə ni ma zaman fu lwa ye Ezipiti gana nɔ, mə ni ǹ fu jini lɛ ma. Mə ya jise mə n da ǹ bɔ yi nɔ. Wɔrɔ, ma yi ń ja Ezipiti gana nɔ bɛɛnɛ.»
35 Moyizi kəna bɛ Isirayɛli nɛn ni ǹ ban a nɛ, ǹ n'a pɛn mə̀ je ni a da ǹcin ɲiin lo, a n citi kan ǹ la; aci wulɛ ya Laa ni ja yɛdana nkə mɛbɔlɛ lɛ, a len jipɛlɛ fu cɛn ɲa nɛ ji a danɛ nɔ.» 36 Aci wulɛ ya sɔ kǝ Isirayɛli nɛn nɔ Ezipiti gana nɔ. Ezipiti gana nɔ woo, a taa taan nɔ woo, a din bə rɔ woo, a ya kabada sɛ nkə cinsi sɛn zanɛ fantan cɛ pusi. 37 Aci wulɛ dɔ ni pɛn Isirayɛli nɛn nɛ, mə̀ Laa da á munu tu la jipɛlɛ gɔ bɔ ǹcɛn jire a ni kɔ ǹ la.» 38 A ni ǹ kura a din bə rɔ Sinayi tutun la, aci wulɛ ya gura wu yilon nk'a len jipɛlɛ jire. A yi yɛɛkomanabra sɛprɛ sire Laa ji m'a ni prɛ ǹ nɛ.
39 Fo, wu yilon b'a lɛsɛ si ba, ǹ ni ǹ ban a nɛ, ǹ yii rɔ mə̀ ǹ ni ǹ beere ǹ ni wɔ Ezipiti gana nɔ. 40 Ǹ t'a pɛn Arɔn nɛ: «Laan dɔ ń ni ǹ kɔ wu la, kǝnan bɛ da wu yɛɛ gun. A buru ce Moyizi kəna bə sɔ kə wu nɔ Ezipiti gana nɔ, wu b'a dɔn a ya bɔ fɔ kəna lɛ ba.» 41 Ǹ ya dənɛ cigi zanɛ ǹ n'a gɔrɛ. Ǹcɛn fu fɔ zanlɛ ci ya ǹ n'a dokɔ kǝ fɔninabra. 42 Yi ni kura Laa n'á labɔ ǹ nɛ, ǹ tə gura mə̀ ǹ ni len yiyɔn dokɔrɛ. Yi sɛbɛ y'a tu la jipɛlɛn fu sɛbɛn nɔ ci giri:
«Isirayɛli nɛnɔ, kə bɛ tuban kənan jɛ, kə kan kənan bɔ a din bə rɔ cɛ pusi, kə ya yin zan ma nɛ?
43 Ayii, Mɔlɔki nkə Refan fu minɛ cin ya kə ni ǹ gun,
kə ya yi fɔ cin fu laan dɔ kə ni ǹ dokɔ.
Yi tɔ ma, mǝ da a kura ǹ ni kǝ guro
ǹ ni wɔ kə kə nɔ fantan Babilɔni cɛ ji.»
44 Laa fu Minɛ Cin ya gura wu yilon wɔn nɔ a din bə rɔ. Moyizi ni a dɔ a n kaɲa kə Laa fu prɛ, a bɛ kəna giri ye zilɛ, a ni dɔ yi giri. 45 Laa bɛ tɔyɛn kənan gula Zoze gɔn la, wu yaan n'a minɛ cin sa ǹ ni wɔ k'a nɔ yin fu ganan nɔ. Yi cɛrɛ, a ya gura yi jɛnɛ fantan a n wɔ dɔ Davidi fu waa ma. 46 Yi Davidi ci ya nina kɔ Laa nɛ. A t'a ɲɔnɔ Laa ji m'á da Cin Sɔbɛ dɔ, á ni kɔ a la, aci kəna bɛ Zakɔbu fu Laa nɛ. 47 Fo Salomɔn ya yi cin ci dɔ Laa nɛ. 48 Yi nk'á ma, Len Laa bǝ jina mucininɛn fu cin dɔ nɔ ba. Laa fu tu la jipɛlɛ ya yi pɛn ci giri:
49 «Len yi ma cibra yoo lɛ,
tu yi ma gɔn da jɛn lɛ.
Cin kəna n gɔ ya kə da zoo k'a dɔ ma fu lɛ?
Jɛn kəna n gɔ yi bi mə n da zoo mə ni mə suso bi?
50 Macɛn bǝ yi tunu zan ba?»
51 Ecɛni mǝ̀ ǹ nɛ: «Kə tɔ tiinra nkǝ kə fɔlagaran cin nɔ! Kǝ yi gɔnlɛ gɔɔnma Ɲile Sɔbɛ lo barabara, kə nkə kə yaan tuman yi gɔrɔ. 52 Laa fu tu la jipɛlɛ kəna n gɔ yi bi mǝ̀ kǝ yaan b'a lwa ba? Mun kǝnan bɛ gura a Mu Tətele ci da prɛ, ǹ ya yin jɛ ǹ ni gin. Sisa bɛɛnɛ, kǝcɛn dɔ n ya yi Mu Tətele ci kɔ, k'a ɲile bɔ. 53 Laa ya kan len jipɛlɛn ji, a n'á fu dula kɔ kǝ la, fo kǝ bə yi dula ci cisa ba.»
Ecɛni jɛɛ sɛrɛ
54 A ciiwɔlɛn bɛ ni yi ma, ǹ ni ǹ yɛɛ sana. Ǹ yi ǹ lɛ susɔnrɛ, a buru ǹ fɔtana y'a ji. 55 Fo Ecɛni pan bɛ kə Ɲile Sɔbɛ, a ya ga laa rɔ, a n Laa fu zaanbra ye, Yezu n gɔnlɛ Laa jan sin ji. 56 A t'a pɛn:
— A bɛ, mǝ yɛɛ yi len lɛ mɛ la, mu fu Nɛ gulɛna yi gɔnlɛ Laa jan sin ji.
57 Ǹ ya caa kanɛ ǹ ni ǹ tɔ tan, ǹ ni yɛ ka zigi ǹ ni da kɔ Ecɛni lɛ. 58 Ǹ n'a ɲiɲina ǹ ni sɔ k'a nɔ a cuuri, ǹ ni dɔ a ma ǹ n'a jɛ kǝ jɛn nɔ. A sɛɛrɛn ni ǹ fu minɛn kura mu tɔra gɔ ji, a tɔ mə̀ Sɔli. 59 Ǹ bɛ jɛn zure Ecɛni ma, a ya Laa ɲɔnɔ ci giri:
— Dana Yezu, mǝ ɲile si.
60 Yi cɛrɛ, a n'á musin dwa turu a ni a pɛn k'á sɔbɛ:
— Dana, a sɛ bubu ce kura ǹ nɛ.
Yi pɛn cɛrɛ, a ya gin.