Mun kənan bɛ gura tuure Yezu ma
8
1 Yi cɛrɛ Yezu ya wɔ gana dǝdan nk'a ɲiɲalɔn nɔ m'a n Laa fu cibra bure nina prɛ. A bɛ mu fulepra kəna yɛɛ yɔ, yin ya gura a ji,
2 nkə dɔ, a bɛ lɔn kənan fu pataran gula, nkə a n kənan kərence kɔ, yin dɔn ya gura a ji. Ǹ tɔn yi kə ce: Magadalana Maari, patara ciso ya gula aci cɛrɛ;
3 cii Erɔdi fu sun ji yɛ gule Kuza fu lɔ Zaani; nkə Suzaani, nkə lɔ mɔnlɛ silan nɔ. Yin tuman ya gura ǹ dɔ Yezu nk'á cɛladanan lɛ kə ǹ wɔn nɔ fɔn nɔ.
Fɔ tɔɔ pasɛwule fu dɔɔnɛ
(Maco 13.1-9; Marki 4.1-9)
4 Zama mɔnlɛ ya bɔ cuu tuman nɔ ǹ ni da cilo Yezu ji, a tə dɔɔn gɔ jɛ ǹ nɛ:
5 «Gulɛ gɔ ya sɔrɔ a n wɔ fɔ tɔ pasɛ. A bɛ fɔ tɔ pasɛrɛ, gɔn ya mǝna za lɛ ma: mun ya tutɔn ǹ la, banɛn ni ǹ tuman muni.
6 Gɔn dɔn tə mǝna jɛ jɛnɛ, ǹ ya jiri ǹ ni laga, a buru tu ɲɛlɛ bǝ ǹ ma ba.
7 Silan dɔn ya mǝna sanɛn jire. Ǹ bɛ ji kə ǹ ɲɛ nɔ, a san ya sa ǹ ni ǹ gun.
8 Talan tǝ mǝna jɛn zaan nɔ, ǹ ya jiri ǹ ni nɛ kɔ, fo nɛ bafuro.» Yezu t'a pɛn dɔ: «Tɔ bɛ mu kəna ji, yi dana n'á tɔ kɔ a ni bu ma!»
Yezu fu dɔɔn jɛ buru
(Maco 13.10-17; Marki 4.10-12)
9 Yezu cɛladanan ya landa a la a dɔɔn bu ji.
10 A ni ǹ lɛ si: «Laa fu cibra sɛn yi sɛ dunun lɛ mə ni ɲa kə nɛ. Fo, mə y'a prɛ mun talan nɛ dɔɔn ji, cina ǹ ni ga, fo, ǹ yɛɛ bǝ ra fɔ ye ba, ǹ n'a ma, fo, ǹ bǝ ra a bu ma ba.»
Yezu y'a dɔɔn bu prɛ ǹ nɛ
(Maco 13.18-23; Marki 4.13-20)
11 A dɔɔn bu yi kə ce: «A fɔ tɔ yi Laa fu sɛ prɛ lɛ.
12 Mun talan yi ǹ jɔrɛ a za lɛ ma ma, a fɔ tɔ n məna bi. Ǹ y'a sɛ prɛ marɛ, fo, Suntana yi darɛ a bɔ ǹ nɔ, cina ǹ bǝ ra la a la ǹ ni ɲile kana ye ba.
13 Mun talan dɔn yi ǹ jɔrɛ a jɛ jɛn ma. Ǹ y'a sɛ prɛ marɛ ǹ n'a si kə fɔninabra. Fo, ǹ b'a kurarɛ a n wɔ ǹ nɔ tɔn da gɔn bɛ wɔ tu kəna giri ba. Ǹ fu la Laa la bǝ miɲa ba, mə̀ sɛ yi danan cin ye ǹ yi ǹ fu la Laa la dalarɛ.
14 A fɔ tɔ kənan bɛ mǝna sanɛn jire, yi yi mun lɛ kənan bɛ a sɛ prɛ marɛ, fo tasɛ nkə wɔn nɔ fɔn nkə mɛ ɲɛ sɛn n y'a zanlɛ ǹ bǝ nɛ kɔrɛ ǹ ni ma ba.
15 A fɔ tɔ kənan bɛ mǝna jɛn zaan nɔ, yi yi mun lɛ kənan bɛ a sɛ prɛ marɛ, ǹ n'a si, ǹ n'a gun ǹ fɔ rɔ a zaan ma. Yi danan yi bɔ lɛ sɛdanan lɛ, a sɛ prɛ ci n nɛ kɔ.
Pintana fu dɔɔnɛ
(Marki 4.21-25)
16 Yezu mə̀ ǹ nɛ dɔ: «Mun zɛɛn bǝ pintana lɛ sarɛ a n dɔɔ kuro a ma yi ba a ni a da kariga lo ba. Fo ǹ y'a da pintana da jɛnɛ, cina mə̀ mun kəna n wɔrɛ a cin, a yɛɛ n jɛn ye.
17 Sɛ dunu zɛɛn ban ba kəna ba sɔ cɛ ba. Sɛ prɛ dunu tuma da ma cɛ fwaan.
18 Yi tɔ ma, kə yii ye kə tɔ kɔ gɔn ji. A buru fɔ bɛ mun kəna ji, sila da da yi n dana fu ji, mun kəna bɛ fɔ zɛɛn b'a ji ba, haalɛ ɲalɔ cɛn kəna bɛ a ji, yi da yɔ a nɛ.»
Yezu fu sun nɔ mun tantan yi jen lɛ?
(Maco 12.46-50; Marki 3.31-35)
19 Yezu n nan nkə ǹ dan ya da a ji, fo a zama tɔ ma, ǹ bǝ zoo ǹ ni dɔ ji ba.
20 Mun t'a pɛn nɛ: «Ń nan nkə ǹ dan yi gɔnlɛ ń ji cɛlɛ.»
21 Yezu tə ǹ lɛ si: «Mun kənan bɛ Laa fu sɛ prɛ marɛ ǹ n'a si, yin yi mə nan nkə mə nanɛn lɛ.»
Yezu yi pilɛ do lɛ gure
(Maco 8.23-27; Marki 4.35-41)
22 Gɔ pini, Yezu ya wɔ koo nɔ k'á cɛladanan nɔ. A ni pɛn ǹ nɛ: «Kə wu ta a taa cɛrɛ.» Ǹ tǝ wɔrɔ.
23 Ǹ bɛ a taa kanlɛ wulɛrɛ, ɲɛ ya kan kə Yezu. Pilɛ do gɔ ya sa ǹ ma a mu la. A mu yi ka ǹ ji a n darɛ a koo pan. Ǹ n'a ye mə̀ ǹ lɛ ba bɔ nɔ ba.
24 Ǹ tǝ dɔ Yezu ji ǹ n'a yɛɛ cira ǹ n'a pɛn nɛ: «Yɛdana, Yɛdana, a mu da wu barɛ!» Yezu ya sa a n pǝtara a pilɛ nk'a taa mu la. A pilɛ woo, a taa mu woo, ǹ tuman ya gɔn siɲɛɛ.
25 A t'a pɛn ǹ nɛ: «Ka la Laa la mǝna?» Ɲikura ni ǹ gun, ǹ ya kaba mə̀ ǹ n'a prɛ ǹ ɲɛ nɛ: «Kɔn mu yi kə ce? A yi sɛ prɛ pilɛ nkə mu ji, ǹ dɔ n y'a lɛsɛ sire sɔbɛ!»
Yezu yi gulɛ gɔ fu pataran gularɛ
(Maco 8.28-34; Marki 5.1-20)
26 Yezu nk'á cɛladanan ya da dɔ Geraza gana nɔ, Galile yete ji.
27 Yezu bə jise turu, a cuu gulɛ gɔ ya da tra a lɛ. Pataran y'a cɛrɛ, haalɛ zizi a bǝ minɛ wɔ ba, a dɔ bǝ jina sun nɔ ba, fo jiin yɛ rɔ.
28 A bɛ Yezu ye, a ya kukuro a lo a n caa kan kɔsɛkɔsɛ, a ni pɛn: «Laa dodo fu Nɛ Yezu, ń y'a ji ń kɔn zan mə nɛ? Mə yi ń ɲɔnɔrɛ ń bǝ ra mə yɛɛ kukwe ba.»
29 A buru, Yezu y'a pataran gularɛ mə̀ ǹ n'a gulɛ kura bi. Gɔn yɛ mɔnlɛ nɔ a pataran y'a jɛrɛ, mun n'a da tekun nɔ ǹ n'a wɔn yɛɛ kə zɔɔnɛ. Fo a yi yin tuman kəkanlɛ, a pataran yi gurarɛ mə̀ ǹ ni wulɛ k'a nɔ din bǝ rɔ.
30 Yezu tə landa a la: «N tɔ mə̀ je?» A ni pɛn: «Mə tɔ mə̀ “zama dolo”». A buru patara mɔnlɛ y'a cɛrɛ.
31 A pataran ya Yezu ɲɔnɔ m'a bǝ ra ǹcin ja a yɛɛ kukwe yɛ zuzu ci nɔ ba.
32 Yi ya da yira bərin mɔnlɛ yi fɔ barɛ tutun gɔ la. A pataran ya Yezu ɲɔnɔ m'a ni kura ǹcin ni wɔ wɔ a bǝrin nɔ. Yezu tə za kɔ ǹ la.
33 A pataran n'a gulɛ kura bi ǹ ni wɔ wɔ a bǝrin nɔ. A tuba dungu ci ya bɔ tutun la kə bra ǹ ni wɔ k'a taa mu ji, a mu ni ǹ barɛ.
34 A bǝrin jíjéwulen bɛ ni yi ye, ǹ ni ǹ mɔ kə bra ǹ ni wɔrɔ pɛn a cuu mun nk'a cuu lenji mun nɛ.
35 Mun ya sɔrɔ ǹ ni da ga yi sɛ zanlɛ ma. Ǹ ya da a gulɛ yira Yezu ji, a pataran n'a dala, minɛ ni ma a n mu yɛɛ telemana lɛ. Ɲikura ni ǹ gun.
36 A pataran bɛ n'a gulɛ dala mun kənan yɛɛ ma gɔn kəna giri, yin y'a kɔɔ prɛ a mun nɛ.
37 Yi tɔ ma, ɲikura ya Geraza cuu mu tuma gun tantan. Ǹ ya Yezu ɲɔnɔ m'a n wɔrɔ a n'á bɔ ǹ fu gana nɔ. Yezu tǝ wɔ koo nɔ a n wɔrɔ.
38 A gulɛ kəna bɛ a pataran n'a dala, yi ya Yezu ɲɔnɔ m'a ni kura a n wɔrɔ a cɛ la. Fo, Yezu b'á lɛ kɔ ba, a t'a pɛn nɛ:
39 «Laa bɛ sɛ kəna tuma zan ń nɛ, ń ɲina ń wɔ yi kɔɔ pɛn paa.» A gulɛ tǝ wɔrɔ. Yezu bɛ sɛ kəna zanɛ a nɛ, a ya wɔ yi da dan lɛ a cuu mu tuma nɛ.
Zayirusu fu nɛ lɔna yɛɛ ya cira
(Maco 9.18-26; Marki 5.21-43)
40 Yezu bɛ bɔ a taa cɛrɛ a n da, zaman ya tra a lɛ, a buru ǹ y'a danarɛ.
41 Gulɛ gɔ ya dɔ, a tɔ mə̀ Zayirusu, Zuwifun fu cilo cin yɛdana ya. A ya məna tu Yezu lo a ni ɲɔnɔ m'a n da á lɛ,
42 A buru, m'á fu nɛ lɔna gɔrɔ toto cɛ fule prana yi da gin. Yezu bɛ wulɛ, a zama ni da jire tɛntɛn.
43 Lɔ gɔ dɔ ya gura yi jɛnɛ, lɔn fu miɲa kaa busun y'a ma a n cɛ fule pra bɔrɛ. A n'á wɔn nɔ fɔ tuman ziza ɲisɛ dawulen ma, fo ǹ zɛɛn bǝ zoo ǹ n'a kərence kɔ ba.
44 A ya da á mɔ Yezu cɛrɛ a n zɔngɔ a fu minɛ lɛ ma. A lo jɛnɛ, a miɲa n'á lɛ gun.
45 Yezu tə landa: «Je n dana n'á wɔn da mə ma?» Zɛɛn bə na nɔ a ni pɛn m'aci yi ba, Piyɛri t'a lɛ si: «Yɛdana, ń yɛɛ ya zama la ń ni da jire.»
46 Fo, Yezu ni pɛn: «Mu n'á wɔn da mə ma, a buru mə ni dɔn mǝ gɔɔn ya sɔ mə nɔ.»
47 A lɔ ni dɔn m'a ya bɔ á fu sɛ waa ma. A tə da kunkuro Yezu lo m'a n bəbɛnrɛ. A bɛ n'á wɔn da ma bɔsɛ kəna ji, nk'a fu busun bɛ ɲa á lo jɛn kəna giri, a ya yi pɛn mu tuma yɛɛ ma.
48 Yezu t'a pɛn nɛ: «Lɔ, ń fu la Laa la ni ń ɲile kana. Wɔ la ɲɔtɔ nɔ.»
49 A n Yezu kura yi prɛ ma, ji pɛlɛ gɔ ya bɔ Zayirusu fu sun nɔ, a n da a pɛn nɛ: «Ń fu nɛ lɔna ya gin, ń bǝ ra Yɛdana lwa dɔ ba.»
50 Fo, Yezu bɛ yi ma, a ni pɛn Zayirusu nɛ: «Ń fɔ bǝ ra ba kan ba, la a la jinɛnɛ, ń fu nɛ lɔna ɲile da kana.»
51 Yezu bɛ dɔ Zayirusu lɛ, a bǝ na nɔ mu zɛɛn wɔ a cin á ji ba, a n bɔ Piyɛri nkə Zaan nkə Zaki, nk'a nɛ n yaa nkə n nan jinɛn nɔ.
52 Mu tuma ya gura wu pɛɛrɛ mə̀ ǹ ni ǹcɛn jɛrɛ a nɛ ji. Yezu t'a pɛn ǹ nɛ: «Kə bǝ ra wu pɛ ba, a nɛ bǝ gin ba, a yi ɲɛ rɔ.»
53 Mun yi yira sure Yezu ma, a buru ǹ y'a dɔn m'a nɛ ya gin sɔbɛ.
54 Fo, Yezu ni a nɛ wɔn gun, a ni pɛn: «Nɛ, sa!»
55 A ɲile n'á ɲina a n da wɔ a nɔ a n sa ka cicɔw. Yezu mə̀ ǹ ni bɛɛrɛ kɔ a la a ni barɛ.
56 A nɛ yewulen ya kaba tantan; fo sɛ kəna bɛ zanɛ, Yezu ni tiin kɔ ǹ ma mə̀ ǹ bǝ ra a pɛn mu zɛɛn nɛ ba.