Yezu ya gulɛ bɔlɔgɔ gɔ kerence kɔ
(Maco 9.1-8; Luka 5.17-26)
2
1 Lɛmɛ dansini cɛrɛ, Yezu n'á ɲina a n da Kapɛrinamu, mun n'a ma mə̀ a yi bi paa. 2 Zama ya da pan k'a cɛnlilɛ yɛ tuma fo gɔn wɔ yɛlɛ cɛn ban ba. Laa fu bure nina ya Yezu ni prɛ ǹ nɛ. 3 Mun ya da kə bɔlɔgɔ gɔrɔ, gulɛ mu sii ni a gure. 4 Fo ǹ bə zo ǹ ni dɔ kə a nɔ Yezu ji ba, a buru a zama ni a zɛ tan. Yezu bə cin kəna nɔ, ǹ ya yi cɛ la pangɔ labɔ, ǹ n'a bɔlɔgɔ kura a pɛɛ la ǹ ni a jise Yezu lɛ lo kə yi yɛlɛ wulɛ. 5 Yezu bɛ ni a mun cin fu la Laa la ye, a ni pɛn a bɔlɔgɔ nɛ:— Ma nɛ, ń fu sɛ bubun ya kura ń nɛ.
6 A dula yɛ ɲawulen kənan yɛɛ ma bɛ, yin n'a tasɛ ǹcɛn nɔ ci giri: 7 Kɔn ya zanɛ a gulɛ ci yi ci prɛ? A yi Laa tɔ zarɛ! Je yi zoore a n mun fu sɛ bubun kura ǹ nɛ mə̀ Laa bə ba?»
8 A lo jɛnɛ Yezu ni ǹ tasɛ dɔn, a t'a pɛn ǹ nɛ:
— Kɔn ya zanɛ a tasɛn cin yi kə nɔ? 9 M'a pɛn a bɔlɔgɔ nɛ m'a fu sɛ bubun ya kura a nɛ, yi ba m'a pɛn a nɛ m'a ni 'á fu pɛɛ sa a n tɔ, kəna gɔ pɛn yi nana? 10 Sɔbɛ ya, cina k'a dɔn mə̀ gɔɔn yi mu fu Nɛ gulɛna ji ci cɛ ci nɔ a n mun fu sɛ bubun kura ǹ nɛ,
a ni pɛn a bɔlɔgɔ nɛ:
11 — Sa, ń ni ń fu pɛɛ sa ń wɔ paa.
12 A bɔlɔgɔ ya sa ka cicɔ a n'á fu pɛɛ sa, a n sɔrɔ a mun yɛɛ ma. A zama fu kaba bubu tɔ ma, ǹ ya Laa tɔ bɔ ǹ n'a pɛn:
— Wu bile bǝ ci giri ye paɲiin ba.
Yezu yi Levi beere
(Maco 9.9-13; Luka 5.27-32)
13 Yezu n'á ɲina a n wɔ Galile taa lɛ ma, a zama yi darɛ a ji m'a ni ǹ jijere. 14 A bɛ kanlɛ, a ya Alife fu nɛ gulɛna Levi ye turu a wusuru saa jɛnɛ. Yezu t'a pɛn nɛ:
— Sa ń tuu mə ma.
Levi ya sa a lo jɛnɛ a n tuuru a ma.
15 Yi cɛrɛ, Yezu nk'a cɛladanan ya wɔ bɛɛrɛ ba Levi lɛ, wusurusilen nkə sɛ bubu zanwulen mɔnlɛ dɔ n ya da jina ǹ ji. A buru yi giri mun wulɛn yi tuure Yezu ma. 16 A Farizɛn fu dula yɛ ɲawulen bɛ ni Yezu ye a bɛɛrɛ barɛ k'a mun tɔ zɛrɛnan nk'a wusurusilen nɔ, ǹ ya landa a cɛladanan la:
— A bɔ lɔn a yi bɛɛrɛ barɛ k'a wusurusilen nk'a mun tɔ zɛrɛnan nɔ?
17 Yezu tɔ bɛ ka yi nɔ, a ni pɛn ǹ nɛ:
— Mun kerəncen ji bə ɲisɛ dawule ma ba, fo busudanan jinɛn nɔ. Mə bə da mu tətelen bə ba, fo mə ya da sɛ bubu zanwulen bəri.
Lɛ yɛ sɛrɛ
(Maco 9.14-17; Luka 5.33-39)
18 Gɔ pini, Zaan nk'a Farizɛn fu cɛladanan ya gura ǹ lɛ yɛrɛ. Ǹ tə da a pɛn Yezu nɛ:
— Kɔn ya Zaan nk'a Farizɛn fu cɛladanan yi ǹ lɛ yɛrɛ, fo nci fu n bə ǹ lɛ yɛrɛ ba?
19 Yezu tə ǹ lɛ si:
— Lɔ da n zini tɔn yi zoore ǹ ni ǹ lɛ yɛrɛ m'a lɔ da n bi a lɔ dabra cin? A ni lɔ da n zini kura ǹ jire ǹ bə zoore ǹ ni ǹ lɛ yɛ ba. 20 Fo lɛmɛ da dɔ, ǹ da a lɔ da n zini bɔ ǹ jire, yi pini ǹ da ǹ lɛ yɛrɛ.
21 — Mu zɛɛn bǝ kaa kanlɛ minɛ zii lɛ kə minɛ da ba, a buru a minɛ da ci da a minɛ zii ci tɔrɛ a n la wɔ a yɛ lɛ dobra ji.
22 — Mu zɛɛn dɔ bǝ duvɛn da ka dɔɔ zii nɔ ba, mə yi zanɛ, a duvɛn da dɛrɛ a n ma a ni a dɔɔ yu. A duvɛn woo, a dɔɔ woo, ǹ tuman da bɔ koo lɛ. Duvɛn da yi ka dɔɔ da nɔ.
Suso pini fu sɛrɛ
(Maco 12.1-8; Luka 6.1-5)
23 Suso pini gɔ ji, Yezu nk'á cɛladanan ya bile wun bə wɔsɔ ǹ ni kanlɛ. A cɛladanan ni ǹ kura ǹ lɛ ma ǹ n'a bile swa ǹ wɔn nɔ ǹ n'a sɔn. 24 A Farizɛn t'a pɛn Yezu nɛ:
— Sɛ kəna bɛ bə narɛ a ma a n zan suso pini ba, kɔn ya ǹ yi yi zanlɛ?
25 Yezu t'a pɛn ǹ nɛ:
— Kə bile bə Davidi nk'á cɛ la mun fu sɛ zanlɛ ci kala ba? Bɔɔ ni aci nk'á cɛ la mun jɛ gɔ pini, bɛɛrɛ dɔ ban ba. 26 A ya wɔ Laa fu cin, a cida do Abiyatari gɔn la ya, ǹ bɛ a buurun kənan darɛ a kan bɔ jɛnɛ, a ya yi wulɛn sa a ni ǹ sɔn, a n'a cɛladanan dɔn gɔ k'a nɔ. Da yira mun zɛɛn bǝ narɛ a ma a n yi buurun cin sɔn ba, a n bɔ a kanbɔlɛn jinɛn nɔ.
27 Yezu t'a pɛn a Farizɛn nɛ: