3
Ketiso wanda:halima: pea:pa:peke haumanu
1 Nakana:ma: mo naka: wanda:halina: hone u tiatiki pika:na:ta: ikana:ma: mo ika: kapomani haliweki oto nane make ikana:ma: telipaala: e handeteke haleme haliweki oto nane make hao hapa:peke lapeke. Mo haliwekina: kakema: homo hata: hau paeyao epeke tupa: puluekema: tikitiki yao hapa:peke lapeke. 2 Ikana:ma: ma:nda: pa:ta: hoke pimanu na leketa: a:nda: pelia ta:ma:ni pea hata: hoto paeyaota: paeyao pa:ta: yopu a:ta:ma: homolo hata: hapa:peke lapeke.
3 Amba: niki make hone wopu na wiki pi tunkulu make pu ata:ka: peaoma:me. Nika: lokena: hone pa:la: hau manuma: make nika: lokena: ta:na:ma: homaasa: haumanu make koto hau paeyaoma: nika: hone handeteke haena: loma:me. Kutupa nate paeyao mineke panka: tiake pimanu lo make ma:nda:ma: epeke ale pa:ta: make leke polopao haoma:me. Mandane wanda:halima: niki honditi pimikita: iki make honditi pu haoma:me.
4 Kutu puma:pate mo hande nika: da:taasa: Koda:na: a:ta:ma: homa:la:eki make pukima: homa:la:eki make peneme yaalo epeke pita:ma:ta: 5 ipikana:ma: niki pa:ta:la tamba: miekeme. Pa nikana:ma: nika: epeke hau pumeke handa na pieke yekepate pa mo ipika: a:ta:ma: homeeke ekina: niki tamba: miekeme. Kutu piekeeki manuta: niki panake weki tupa: da:ta hamono Koda:ma: ipika: Holi Sipitidi pa:ta: yama: tanda pa:la:me. 6 Koda:ma: nika: Da:taasa: Hali Yesu Ketiso pa:ta: yama: ipika: Holi Sipitidi niki pa:ta: anekema: wopu tapaeyekeme. 7 Kutu pieke ekima:ta: mo Ketiso ipika: a:ta:ma: homeeke ekina: niki Koda:na: leke popelekena: tikitiki pea make nika: hone puaasoma: deto hala:eki make miomono piekeme. Do ala: pita: ota: pie.
8 Koda: pa:ta: hone tulaaseme wanda:halima:ta: mo ika: epeke piteme hau manuma: mo mandane wanda:hali tamba: muluekema: hone witolo hata: waleke hala:tiki pina:ma: nakana:ma: do wapena: alo pimanu iki pa:ta: ota: wopu la: moneao hapeke.
9 Kutu pulu pa:la:pate mo epe na piki ape apemanu make mo atekena: ateke hatiki epeeke ekina: biki eleke eleke moka:lao haleme ekimanu make mo pi yokaalu alu pita:la: ekimanu make mo hande Diu wanda:halina: lo pimanu wiekeeki dupa ula:me laa ape ape lo halemeeki make kota: hau paeyao paka:lao pu hapeke. Kota: hau manuma:ta: niki epeaapeke ana: na pa:la:me.
10 Mo Ketiso tapake tekili paaluekema: taapa:la: somema: hoto homeke o yaapo tekili peaapeke lea:ka:na:ta: hoto yaapo sa:sa: pilipipate pi na opiki pa tepo peao paa pia:ka:na:ta: kota: koto someta: nika: tapake some dia:me laa hoki wala:peke. 11 Naka: handeleme. Kutu piki hau pita:la: someta: ipika: hoke hau manuma: kone mea hoeyao keaasa:me.
12 I̱ma: Atemasi o Tikikasi yaapo homeke a:nda: neke pa:ta: epena: tapaowa:ka:na:ta: kota: neketa: mo I̱ yopua halua: Nikopolisi da nane pota:manu weiya a:pa:peke. I̱ma: mo hande koa ki dina:ta: koto Nikopolisi da pa:ta: halueke loa: ekita: nakana:ma: hone wilime. 13 Mo Kapomanina: pi ula:eki tikitiki yao hala: hali Senasi make mo hande Apolosi kota: hali yaapo ipilika: pi walo polo pelepeeki kini pina: nakana:ma: epeke tamba: muluekema: taapa:peke. Ipilika: mea polo pelepe ale manuta: ana:na: mea wilipipe laa handa: handa:peke.
14 Nika: Ketiso tapakema: a:pa:la: haumanu puluekema: ikana:ma: mo ika: nate leke epeke tupa: handeteke hata: pina: moka:la: tiatiki pea:pa:peke alee. Kutupa make mo wanda:halina: ka:nda:ma: homa:la:eki handa: peteluekema: ikana:ma: mo napeke na pitiki epe na piki haumanu leke na pea:peke ya:la:me.
15 Do I̱ ame̱le̱ mandake haloma: tapakema: neke pa:ta: a:taloe pi la:neaasememe. Kutupa mo neke ame̱le̱ haleme Ketiso yankeketonu pa:ta: tonka:na: a:taloe pi aloma:me laa la hala:peke. Koda:na: a:ta:ma: homo tamba: mina:la: ekita: iki taapuna: hao haena:e.