2
Keileke wanda:halina: mana: pimanu
1 Koto pa:la:pate nakana:ma: ota: mo mana: pi ula: tupa: tolu walo hapeke. 2 Keileke haliweki pa:ta: Mo hoke ikali naa keaapeke na ya:la:me laata: ikana:ma: epeke hau pa:ta: tikitiki piki hone witolo make mo ika: hone wopu handeteke hata: ika: hone tulalemeeki make pukima: homelemeeki make kutupa mo ika: puki taka:laasa: hau pitolo pitolo haleme hau make kota: hau paeyaona: ala:ta: na ta̱lena: leke epeke tupa: hapa:peke laa wala:peke.
3 Mo keileke wanda:weki pa:ta: make koto tupa: kone alota: Iki make yako piki wanda:weki hapeke ya:la: tupa: hapa:peke la alota: mo hande keileke wanda:weki pa:ta: ikana:ma: laasa: hau na pu make mo waini ikalima: ika: hone hoeyaama:na: wopu na neke hata: make ikana:ma: mo panake wanda:weki pa:ta: epeke hau pita:la: ekimanu wala: tiaapa:peke la wala:peke. 4 Kutu pimika:na:ta: ikana:ma: mo panake wanda:weki pa:ta: ika: haliki wekiwandiki pa:ta: pukima: homolo hata: make 5 ika: hone handeteke hata: make ika: halemeeki ala:ta: na ta̱lena: leke hata: make epeke da handeteke hala: wanda:weki hata: ika: haliki tonu oto pa:ta: hao hapa:peke laa walena: walo hapeke. Koto panake wanda:wekima: kutupiki haumanu pimika:na:ta: kota: mo pa wanda:halima: Koda:na: pimanu pa:ta: hoke pi lapeke waleke na wilieke.
6 Kota: tupa: kone mo panake haliweki ika: honemanu wopu handeteke haena:ma: nakana:ma: ika: hone u tiaapeke. 7 Naka: kone naka: pilipi hau paeyaota: wanda:halima: handaa honda:mea pu haena: epeke hau seliapomanu pu hapeke. Naka: pi wala:la: hauna: hone wopu wia mo hapeke pitiki pimanu homeke walo hapeke. 8 Naka: lolo pele pi manuta: mandane wanda:halima: la la pu hoeyaama:na:ma: ala:ta: na ta̱leke pi manuma: walo hapeke. Mo naka: a:nda: tunkuliki wanda:halima: koto hau handaata: ikana:ma: nika: pitoloma: ekina: hokeeki ma:nda: na handemeka:na:ta: pi ma:nda: lapeke na ya:la:me hone witolo yaala:ma: homilimikie.
E pokaasa: halina: mana: pi
9 Mo pa hameke e pokaasa: haliweki pa:ta:ta: dupiki pi lapeke. Ika: e pokemeeki paeyaoma: mo ika: handeteke hala: haliwekina: pi oto pa:ta: hata: ika: epeke e pokeme ekima: iki ta:na:ma: homaapa:peke. Kutu pimika:na:ta: mo iki handeteke hala: haliwekina: pi eto eto na lao make 10 mo ika: ala:ta: ala:ta: make pake na napa:peke. Kotoeki na pikita: ki na hake epeke e poka:la: hali hala:me hone wina: ika: e pokeleme ekima: lena: lapa:peke. Dupiki haumanu pimika:na:ta: koto ika: hau paeyaoma:ta: nika: Da:taasa: Koda:na: mana: pimanu yeiya: la walieke.
Ketisona: epolo pa:la: nate
11 Koda:na: a:ta:ma: homo tamba: mina:la: ekita: kenke wanda:hali paeyao mea da:taaluekema: peneme ya:la:eki handoloma:me. 12 Koto a:ta:ma: homo tamba: mina:la: ekima: walota: pa nikana:ma: Koda: hoki nane yao nika: hoke hone pa:la: haumanu pitoloma:eki make do kenkena: hoke hone pa:la: haumanu pitoloma:eki make kiaamono pa:la:me. Koto pa:la: ekina:ta: ame do kenkena: hata:ta: nika: hone handeteke hata: make tondepe pea hata: make Koda:na: hau hone witolo hata: make kutu pitolo hata: 13 mo hande ota: ipilie nate opolo epena:e laa hone tulaasa: hata: yu wia haloma:me. Koto epolo pa:la: nateta: mo nika: Koda: tieke make da:taala: hali Yesu Ketiso make ipilika: pa̱a̱ tieke peneme yaasa:eki opolo ipilieke. 14 Ketiso ipikita: nikina: homeekeme. Kutu pieke ekima:ta: nikita: mo hoke hau pa:ta: haomeke yoka: muluekema: make ipika: epeke hauna: puawee hone pa:la: yako piki wanda:hali homeke hamono yeke piekeme.
15 Do mana: pimanu walo hapeke. Kutu puluekema:ta: naka: pi opita:la: wanda:halina: hone u tia tia puluekema: make hoke haumanu peaama:na: sa:sa: pulu pika:na: make naka: biki ula: ekina: hata: pea:peke.