5
Tekehalina: epolo pa:la: ekina: tikitiki yao hamana:
1 Kametitio. Mo hande haumanu pulu pa:la: hau manuna: di o natemanu iki hone wilimi ekina: I̱ma: iki pa:ta: wape pea la kia:peke na ya:la:me. 2 Hande Tekehali ipika: epolo pa:la: Nateta: pake nala: hali timba ipu hala: tupa: opolo epolo pa:la: ekita: ika: kone opua hone wopu witelememe. 3 Wanda:halima: alota: Ameta: ekia:nda: pea:pekeeki niki dia:yalo hata: homu pea haloma:me lemeka:na:ta: kota: mo hoeyaalo pa:la: alemanu iki pa:ta: ota: koto kone ipilieke. Weki hoki nala: wanda: pa:ta: ipula: tanda leke iki pa:ta: make epea:ka:na:ta: wendia pua:peke na yelieke. 4 Kametitio. Kutu piliepate ikita: timba ala:eki pa:ta: na haleme ekina: mo hande Nate epolo pa:la: ekita: hande pake nala: halima: a:pa penkilipaasa: tupa: iki pa:ta: na ipilieke. 5 Iki paeyaota: nate pa̱a̱ pa:la: ekina: wanda:hali halememe. Nikita: timba: pa:ta: na haloma:me. 6 Koto ekina:ta: u̱ pelieleme wanda:hali leke na hake tialiao epeke hone wia hamana: pea:pa:peke aleo. 7 Timbata: wanda:halina: u̱ pelieleme die. Kutupa timba kone wanda:halima: hoke ikali naa keaaseme die. 8 Kutu pu halemepate nikita: pa̱a̱ pita:la: ekina: wanda:hali haloma:me. Koto ekina:ta: epeke hone wia hamana: pea:pa:peke aleo. Nika: hone tulaasoma:eki pita: pukima: homoloma: ekita: *hakoko a:mbaasa: hanka: leke pambaota: Koda:ma: niki mea da:taalo pa:la: ekina: hone puaasoma: ekita: nika: a:nda: pita:la: you aka: leke pambamana:e. 9 Koda:ma: ipika: mineke panka:la:eki niki pa:ta: epena:yeke niki na talopu mea hamono lea:pate pa Tekehali Yesuma: niki mea da:taowaena: leekeme. 10 Yesuma:ta: ipiki ame̱le̱ hao hamonoyeke nika:eki peaaso homeekeme. Koto ekina: Yesu paa epea:ka:na:ta: amba: homeme wanda:hali pita: pa haloma: wanda:hali make ala:ta: ma:nda: dia:ma: pa ipiki ame̱le̱ da:taa halumeke. 11 Koto ekina:ta: ame do piteleme tupa: ika: ika: kone sa:tia alualu pea tamba: mu alualu pitolo hapa:peke.
Paeyaaso mana: pi make pelia:pa:peke la:la:eki make
12 Kametitio. Ika: pota:manu tondepeao iki waleleme haliwekita: Tekehalima: mea haena: leekeme. Iki ame̱le̱ hata: pokeleme ekina: ikana:ma: iki pa:ta: panda:pea hamina:yeke honke aloma:me. 13 Koto e poko haleme ekina: iki pa:ta: pukima: homa hata: hone wopu u hapa:peke. Ika: ika: kone homu pea puki homeke wia hapa:peke. 14 Kametitio. Iki sutiaasoma:me dupa. Pa pitu haleme wanda:halita: mana: laka:na: mo pututuma: homeleme wanda:hali sa:tiaaso hata: mo damakopiki wanda:hali pa:ta:la: mea:tiki pea iki paeyao wotu handeteke hatiki pea:pa:peke. 15 Mandane wanda:halima: iki pa:ta: hoke hau pimika:na:ta: ikana:ma: paa na hombo peaapa:peke. Hoto paeyaota: ika: ika: kone epea alualu pea hata: wanda:hali paeyao make epeaaluekema: hone wopu wia:pa:peke.
16 Nate paeyao ta:na:ma: homo hapa:peke. 17 Hoto paeyao make yeni pu hapa:peke. 18 Kutupa eki a:nda: paeyaona: make Koda: pa:ta: keiyae pi lo hapa:peke. Do haumanu ikana:ma: Yesu *Ketiso ame̱le̱ ta:ma:ni pea hata: puemena:yeke Koda:ma: hone pa:la:me.
19 Hande Holi Sipitidina: ti uleke na honiapa:peke. 20 Koda:na: pi la: mea hala: halina: wala:la: pita: ikana:ma: hoki walo honditi na pea:pa:peke. 21 Hau paeyao pea handaata: mo a:pa:la: haumanu miniki hata: 22 kutupa hokeeki paeyao handa paka:laapa:peke.
23 Nika: puki lopawao hala: Koda:ma: ikita: ika: haumanu paeyao pa:ta: yako pina: lawaena:e alome. Kota: nika: Tekehali Yesu Ketisona: epolo pa:la: nateta: ipula:me. Koto nate opolo epea:ka:na:ta: ikita: ata:ka: na piki wanda:hali hamina: Koda:ma: ika: temoko make a̱o̱a̱o̱ make loke make paeyaota: ana:na: handeteke hao haena:e alome. 24 Do ekina: loa:me. Iki wi la:la: halima: ipika: pulueke laa la: ula: ekita: ota: pealieke.
25 Kametitio. Niki pa:ta: tonka:na: yeni peao hapa:peke.
26 Hande Ketiso wanda:halima: pu haloma: tupa: ika: yankeketiti paeyao ame̱le̱ hopula alualu pea:pa:peke.
27 I̱ma: mo Tekehalina: bikina: iki sutiaaso hata: dupa alome. Ika: yankeketiti paeyao pa:ta: do wape yata:pa:peke.
28 Nika: Tekehali Yesu Ketiso ipika: pa hameke a:ta:ma: homa:la:eki iki ame̱le̱ haena:e.