Poloma: Kolosi Siosi pa:ta: tapaeyeke wapee
1
1 I̱ta: Poloma: mo hande Koda:na: hone pa:la: ekina: Yesu Ketisona: *aposolo hali hata: make nika: kame Timodi dikana:ma: do tameiya: a:paasopa:me. 2 Mo Kolosi nane haleme Koda:na: wanda:hali Ketiso pa:ta: hata: ki hone na wiki pa putia pu haleme kametonu iki pa:ta: tapaasopa:me. Nika: Apa: Koda:ma: iki pa:ta: a:ta:ma: homolo tamba: mina:la:eki make puki lopa:niaasa:eki make kina:e.
Keiyae alo yeni pita:la:eki
3 Nikana:ma: ikina: yeni peaasota: nika: Tekehali Yesu Ketisona: Ateke Koda: pa:ta: hoto paeyao keiyae lo haloma:me. 4 Pa ekipeke. Ikana:ma: Yesu Ketiso pa:ta: hone tulalemeeki make mo Koda:na: wanda:hali paeyao pa:ta: pukima: homo halemeeki opu hao loma:me. 5 Mo hande ota: pita: hande Epeke Pi Seliapo iki pa:ta: titina: epea: dina: kone mo pima: kulu pa:la: hone ti laala: ekita: opimime. Koto ekina:ta: ika: hone tulaalemeeki pita: pukima: homelemeeki yaapona: teketa: mo ika: hone ti laalemeeki pa:ta: ula:me. Kutupa do ika: hone ti laaleme ekita: oli hepeni nane amu pea wiawala:me.
6 Mo Pi Seliapoma:ta: mo kenke honiki honiki paeyao pa:ta: putupolo hata: kiliki a:etolo ombu hala:me. Do homeke Pi Seliapota: ikana:ma: Koda:na: a:ta:ma: homolo tamba: mina:la:eki titina: opimi natena: pia: tupa: kone kini pea a:pa ame do teke handa: wilimi natena: make pa a:etolo ombu hala:me. 7 Ikana:ma: Koda:na: a:ta:ma: homolo tamba: mina:la: ekina: pita: nika: mandake e pokaasa: hali Epa:petasi pa:ta: mimime. Ipikita: diki tamba: minolo hata: kima: na homeke Ketisona: e epeke tupa: pokaasa: halie. 8 Ipikana:ma: mo Sipitidima: iki pa:ta: ka:la: pukima: homa:la: ekita: niki pa:ta: la ka:la:me.
9 Do ekina: yeke ikina: ota: opua mupa: natena: kone kini pea a:pa ame make hoto paeyao yeni peao ombu halopa:me. Koda:na: hone pa:la: tupa: hone wita:la: ekita: ipika: Sipitidima: ku hala: hone lenkena: pea wita:la:eki pita: hone wopu wita:la:eki yaapona: hau paeyao pa:ta: yama: iki pa:ta: tumbaena:yeke Koda: pa:ta: yeni peaatiki pu halopa:me. 10 Kutu pia:ka:na:ta: ikita: mo Koda: ipika: hone pa:la: tupa: hata: hoto paeyao ipiki ta:na:ma: homa:tiaasa: hau homeke pu halimikie. Ika: halimi pa:ta:ta: epeke haumanu opolo ipulu hata: ikita: Koda: hone wopu witelemeeki pa:ta: daelimikie. 11-12 Kutupa ikita: ipika: ota: pa̱a̱ piki wele pa:ta: ipula: honkopu ana:na: kone haemeka:na:ta: mo hau paeyao pa:ta:ta: homu pea yu wia hata: da̱o̱la hamena:e laa honke alopa:me. Kutupa ta:na: lulu hata: Apa: pa:ta: keiyae lapa:peke. Ipikana:ma: oli pa̱a̱na: kilu tumbuao hala:eki pa:ta: ipika: wanda:hali mina:yeke wiala: ekina: putupiliki ma:nda: muemena:yeke iki ana: pealeke loa:me. 13 Ipikana:ma: niki timba: leke ekina: honkopu pa:ta: haoma:eki pa:ta: pa:ta:la: mea a:pa mo ipika: Eiyekena: kilu tumbuao hala:eki pa:ta: hatuku epea:me. 14 Ipikana:ma:ta: niki ka:la:pa: tapaala:me. Kotota: nika: hoke hau paeyawala:me laa loa:me.
Ketisona: e poka:la:eki pita: hala:eki yaapo
15 Ketisota: mo na handa:peke Koda:ma: handeke nono pa:la: hali konee. Ipikita: mupeke weki hata: Koda:ma: wa:pa:la: ale paeyaota: ipikana:ma: lu tumbaala:me. 16 Kutupa oli ya do kenke yaapo pa:ta: handoloma: ale pita: na handoloma: alemanu paeyao make mo wele wopupiki temokomanu make kini haliweki make kapomani haliweki make handeteke hala: haliweki make paeyao tapaota: Koda:ma: Ketiso pa:ta: yama: wepiekeme. Koda:ma: do ale paeyao Ketiso ipika:eki wina:e laa ipiki pa:ta: yama: wepiekeme. 17 Ketisota: ale paeyao a̱i̱ na wepiki haena: kone pa hayekeme. Kutupa ipiki ame̱le̱ mo ale paeyao ika: da panda: mina: la:la:me.
18 Ipikita: ipika: lokena: you halie. Mo siosina: loa:me. Ipikita: mo lokena: da:ta:la: ekina: tekee. Ipikita: mupeke weki hata: homeekepate paa mea tiaeyeke ekita: ipiki homeke mo ale paeyaona: titina: hali haena:yeke piekeme. 19 Koda: ipika: hone pieke ekina: kone mo Eiyeketa: ota: Koda: ipikima: kone handena: leekeme. 20 Eiyeke pa:ta: yama: Koda:ma: mo do kenkena: oli ya nane ula: alemanu paeyao paa la:ka:la ipiki ame̱le̱ a:pa ta:ma:ni pina: hone wiekeme. Koda:ma: a:nda: peliayeke ekita: ipika: Eiyeketa: a:ka:tei wape piki ti manda homena: leeke ekima: oli ya do kenke nane ula: alemanu paeyao paa la:ka:la ipiki ame̱le̱ a:pa ta:ma:ni pina: leekeme.
21 Amba: a:nda:ta: ika: pimi hoke hau manuma: make wimi hoke hone manuma: make ikita: Koda: teke pa:ta: na hake ipika: a:nda: tunkuliki wanda:hali haememe. 22 Pate ameta: ipika: Eiyeke kenke hali tupa: homa:la: ekima:ta: Koda:ma: ikita: ipika: yankeke tonu hamena: la:la:me. Ikita: ipika: leke popelekena: eki a:nda: na piki wanda:hali leke hake peao yako pealuekema: pa:la:me. 23 Koto pa:la:pate ikana:ma:ta: mo da̱o̱la pelia hala: ekina: hata: honkopu hao kima: na homeke pa putia pua:pa:peke. Kutupa ikita: ika: mo hande waloma: Pi Seliapo opimi natena: mimi hone ti laasemeeki pa:ta:ta: aleta: ma:nda:ma: iki wato baena: waleke na hala:pa:peke. I̱ Polota: do Pi Seliapona: pa hameke e pokaasa: hali haowa:me. Do Pi Seliapota: mo kenke honiki paeyao pa:ta: haleme wanda:hali pa:ta: wala:la: pina: loa:me.
Polota: Siosina: pa hameke e pokaasa: hali
24 Koto ekina: ameta: I̱ta: mo ikina: tanda minolo ekina: ta:na:ma: homolome. Yaka lokema: tanda minolo ekita: mo hande Ketisoma: ipika: loke mo siosina:eki peaaso mieke tanda putupiliki u pelia hala: ekita: I̱ma: paeyaaluekema: tamba: minolo loa:me. 25 Kutupa Koda:ma: I̱ta: siosina: pa hameke e pokaaso hali hano laa ipikana:ma: dupiki e ika: epeke hauna: peano la:la:me. Do eta: mo hande ipika: pi anekema: walawano ala:ekie. 26 Do pita: amba: hatia epemeke wanda:hali paeyao pa:ta:ta: a:mbao wiekepate ameta: ipika: wanda:hali pa:ta: peneme yaala:me. 27 Koda:na: pulueke hone ula: ekita: ipika: a:mbao ula: ekita: ipika: wanda:halima: hone wina:e hone wita:la:me. Do napeke wia seliapo piki a:mbao ula: ekita: paeyaoma: hone wina: ula: ekina: loa:me. Do a:mbao ula: ekita: Ketisota: iki pa:ta: hala:me. Koto ekina:ta: ikita: Koda:na: pa̱a̱ pa:ta: pua halimikie la ala:me. 28 Doeki tekena:ta: nikana:ma:ta: paeyao pa:ta: Ketiso walo haloma:me. Nika: hone u lenkena: pea witoloma:eki manuma:ta: mo wanda:hali pa:ta: kinki pitolo hata: walo haloma:me. Dupuluekema: yeketa: nikana:ma:ta: iki paeyao siki homeke homeke lo ku hata: Ketiso yaapo ta:ma:ni pea Koda:na: leke popelekena: hatuku ipuluekema: pitoloma:me. 29 Doeki pu paeyaaluekema: a: yeketa: do I̱ pa:ta: e poka:la: Ketisoma: kita:la: wele wopu piki honkopuma:ta: kima: na homeke a:ka:li apa:la: mea baatia pulu honkopu hao e poko halome.