5
1 Koto ekina:ta: nikana:ma: dupa hone uluma:me. Do nika: haloma: palai data: nika: kenke loke yalo hata: leisiya:ka:na:ta: kota: Koda:ma: niki hao hapeke da oli hepeni wialieke. Mo data: ota: ipika: kone a:eyaata: hoto paeyao pa hao halieke. 2 Kutupa ameta: nika: we pamba:la: ekita: oli hepeni nanema: ipula: data: niki manda wina:e laa hone wotu witoloma:me. 3 Mo ekima: dau leke yamoma:ka:na:ta: nikita: loke dia:ya:la: wanda:hali na halumeke. 4 Niki do kenkena: palai da pa:ta: hata:ta: ka:nda:ma: homolo hata: wese lo haloma:me. Do ekita: mo nika: kenke loke mea baaluekema: dia:ya:la:pate nika: hone pa:la: ekita: mo hepenina:eki nikina: pambaena:yeke loma:me. Pa ekipeke mo homo hala: ekita: da:ta:la: ekima: da panda: meaka:na: bepolalieke. 5 Dupiki topo pulu pa:la: ekina:ta: Koda:ma: niki tikitiki yaasa:me. Kutupa ipika: Sipitidita: mo wetepena: niki kulu pa:la: alena: peneme yaasa: tombo ula:eki ka:la:me.
6 Koto ekina:ta: nikita: hoto paeyao hali au la hata: honkopu hao haloma:me. Nikita: do nika: lokena: da pa:ta: pa hata: kone mo Koda:na: da papate haloma:me laa hone uluma:me. 7 Pa ekipeke nika: da:ta:la: ekita: lekema: handa:la: ekima: dia:ya:la:pate hone tulaasa: ekima: homekee. 8 Nikita: hali au la hata: honkopu hao haloma: ekima:ta: nika: honema: do nika: lokena: data: mina:pa:lao mo Tekehali ame̱le̱ oli da pua hao hawee hone uluma:me. 9 Pate nika: hone pa:la: hau paeyaona: titina: hau homeketa: dupae. Ame do haloma: da pa:ta: make oli polo poloma: da pa:ta: make mo Tekehali ta:na:ma: homaapeke hau homeke puluekema: taapo haloma:me. 10 Pa ekipeke niki paeyaota: ipikana:ma: pi yokaalu pina: Ketisona: leke popelekena: pua hapeke ya:lieke. Homeke homekema: ipika: mea:peke ya:la: ekita: ota: milieke. Ipika: kenke lokema: epekeeki o hokeeki pa:la:eki paeyao sikina: ana:na: kone milieke.
Ketiso pa:ta: yama: Koda:na: yankeke hasa:eki
11 Koda: paala:ma: homa:peke ya:la: ekita: nikana:ma: hone uluma:me. Koto ekina:ta: nikana:ma:ta: mandane wanda:hali hone la:ka:laluekema: taapo haloma:me. Koda:ma:ta: nika: hau paeyaosiki hone wopu ula:eki yalo yaka honema:ta: ikana:ma: make ika: temokoma: I̱ make hone witolo pelememe. 12 Nikana:ma:ta: ikana:ma: nika: biki paa mina:liamena: loluekema: na taapoloma:pate pa ikana:ma: wanda:halina: leke popelekena: nikina: ta:na:ma: homolo hata: epeke pimanu la haloemena: yeke taapoloma:me. Dupiki hauta: mo halina: ota: hau mina:pa:lao pa manda lokena: epeke hau handolo biki mina:liaasa: wanda:hali pa:ta: ana:na: hombo pealo peleme ekina: loa:me. 13 Nikita: kea tikitiki puma:ka:na:ta: kota: Koda:na:eki kone peaaso pitoloma:me. Make nika: honema: kesema: puma:ka:na:ta: kota: ika:eki kone peaaso pitoloma:me. 14 Ketisona: pukima: homa:la: ekima:ta: niki handeteke hala:me. Pa ekipeke nikana:ma: hone witolota: hali homekema:ta: paeyaona: homaeyekeme. Koto hauma:ta: paeyaoma: ipika: homa:la:eki putu pelememe. 15 Ipikita: paeyaona: homeeke ekita: pa mo da:ta haleme wanda:halita: ika: kone na halo pelemepate pa ikina: mo homa paa tiao da:ta:la: hali pa:ta: haena:yeke pa:la:me.
16 Koto ekina:ta: ameta: ma:nda:na: manda hauna: dupiki somee dupiki somee pi na aloma:me. Kenke hali tupa: mo nate ma:nda:na: Ketisota: dupiki somee o mukutu piki somee loma: ekita: ameta: kotoeki ota: pa na aloma:me. 17 Ma:nda: epita: Ketiso pa:ta: tunaeya:ka:na:ta: kota: ipikita: panake some hala:me. Amba: ekita: pulu hata: panakeeki a:pa:la:me.
18 Doeki paeyaota: Koda:ma: peala:me. Kotota: ipikana:ma: Ketiso pa:ta: yama: nikita: ipika: a:nda: tunkuliki wanda:hali topo pea yankekemanu hamono la:la:me. Kutupa nikana:ma: mandane wanda:hali ipika: yankeke au laamono koto e tieke ka:la:me. 19 Nikana:ma: waloloma: ekita: Koda:ma:ta: wanda:hali paeyaota: Ketiso pa:ta: yama: ipika: yankeke au laala: ekina: aloma:me. Koda:ma:ta: iki pi yokaalu puluekema: ika: hoke hau na yata:pea:me. Kutupa ipikana:ma:ta: mo wanda:hali ipika: yankekemanu au lao hala: pita: niki pa:ta: la kia:me. 20 Koto ekina: ameta: niki do Ketisona: pi lawaaso handa:e. Koda: niki pa:ta: yama: ipika: homu toluma: wi la:la:eki kone peneme yaasa:me. Nikana:ma:ta: Ketisona: pi laaso hata: wi aloma: ekita: dupae. Koda:ma: iki a:nda: tunkuliki wanda:hali halemeeki topo peao ipika: yankeke au laena: lapee lo haloma:me. 21 Ketiso pa:ta: hoke hau ma:nda: na wia:pate kone nika: epeke hau peaaso hata: Koda:ma: ipikita: nika: hoke hau putupa: mina: leekeme. Pa ekipeke nikana:ma: ipiki ame̱le̱ tunaasota: mo Koda:na: tikitiki pa:la:eki putu pomono yeke pa:la:me.