4
Kanake pa:ta: ti teke pambo ula:eki
1 Koda:ma: a:ta:ma: homa tamba: mina:la: hali hata: niki do e pokomono ka:la:me. Koto ekina:ta: do e pa:ta:ta: ka:nda:manu ipula:pate niki ki hone na uluma:me. 2 Nikana:ma:ta: mo a:mbaasa: haumanu make yaala:piki haumanu make hoe nane wina: loloma:me. Nikana:ma:ta: makeaasa: haumanu na pu haloma:me. Kutupa Koda:na: pi walolo hata:ta: ata:ka: peake tupa: na walo haloma:me. Nikana:ma:ta: Koda:na: leke popelekena: hata: mo ota: pita: wanda:halima: opitolo hata:ta: epeke tupa: walelememe alo haena: peneme yao walo haloma:me. 3 Nikana:ma: peneme yao waloloma: Pi Seliapota: ma:nda: pa:ta: a:mbao wia:ka:na:ta: kota: mo alupa:la: pota:na: polo peleme wanda:hali pa:ta: homeke a:mbao ula:me. 4 Ikana:ma: hone na tulaasememe. Pa ekipeke do kenkena: hoke koda:ma:ta: ika: hone manuta: timba: la: pambaena: hala:me. Ipikana:ma:ta: mo ikina: pa̱a̱ peaapeke pa̱a̱ta: handaama:na: yeke sa:sa: pita:la:me. Mo Ketiso ota: Koda:ma: handeke halina: pa̱a̱na: mo Pi Seliapo pa:ta: yama: ipula:eki handaama:na: yeke pita:la:me. 5 Nikana:ma:ta: nikina: na waloloma:pate pa Yesu Ketisota: Tekehalie laa nikita: waloloma:me. Kutupa Yesuna: hone pa:la: ekina: ika: pa hameke e pokaasoma: haliwekie laa waloloma:me. 6 Mo amba: hande Koda:ma: alota: Mo timba: la: pamba:la: pa:ta:ta: mo pa̱a̱ pa:la: ekima: pa̱a̱ pina:e leeke homeke Koda:ma: kone mo pa̱a̱ta: nika: pukina: pa̱a̱ peaya:me. Kota: pa:la: ekita: Koda:ma: ipika: pa̱a̱ta: Ketisona: leke popelekena: nikana:ma: hone wiomonoyeke pa̱a̱ peaala:me.
7 Koto pa:la:pate kone do hande ota: epeke ti teke wita:la: ekita: pa nikita: mo hande pa baasa: kanake pa:ta: kone pamba ula:me. Kutu pieke hauna: teketa: mo honkopu tieketa: nika:eki dia:ya:la:pate Koda:na: ekie laa waluekema: pia:me. 8 Nikita: hoto ma:nda: nina:ta: ka:nda:ma: homo haloma:pate ota: lu tumbaaso dia:me. Hoto ma:nda: nina:ta: hone eleke eleke u haloma:pate nika: hone pua doka:tiki yaala: dina:ta: pa pina:e hone na u haloma:me. 9 A:nda: tunkuliki hali wopu halemepate nikita: yankeke ame̱le̱ ombu haloma:me. Kutupa nate ma:nda: nina:ta: oni kenkena: lu lopao halemepate nikita: ota: na hoyo haloma:me. 10 Hoto paeyaota: nika: kenke lokena:ta: mo Yesuna: homeekeeki meatia pomu haloma:me. Pa ekipeke nika: loke pa:ta:ta: ipiki da:ta hala:eki handena:yeke loa:me. 11 Yesuna: ekina: nika: hatia puluma: ale pa:ta: manuta: homa:la:eki teke pa:ta: hao haloma:me. Pa ekipeke ipika: deto hala: ekita: nika: do kenke loke pa:ta: handena:yeke pitoloma:me. 12 Koto ekina:ta: homa:la: ekita: niki pa:ta: e poka:la:pate pa da:ta:la: ekita: iki pa:ta: e poka:la:me.
13 Mo Baiboloma: alota: I̱ma: pi loa: ekina: teketa: I̱ma: hone tulaowa: ekina: pua:me la:la:me. Nikana:ma: make homeke hone tulaasa: hauma: dupa aloma:me. Mo loma:eki manuna: teketa: nika: hone tulaoma: ekina: puma:me. 14 Mo hande Tekehali Yesu mea da:taeya: Koda:ma:ta: niki make Yesu taapu mea da:taalieke hone uluma:me. Kutupa iki ame̱le̱ mandakena: ipiki hala: alena: hatuku pelieke. 15 Doeki paeyaota: ika: ekina: peaasa:me. Kutupa Koda: ipika: a:ta:ma: homa tamba: mina:la: ekima: wanda:hali paeyao pa:ta: pulu hata:ta: ikana:ma: make Koda: pata: pa̱a̱ wopu mina: keiyae ala: yenimanu haka:ta:pao pu halimikie.
Hone tulaasa:eki pa:ta: hala:eki
16 Koto ekina:ta: niki pa:ta: ka:nda:manu epena: kone ki hone na uluma:me. Nika: manda loketa: koke yomo yomo pita:la:pate nika: temokota: hoto paeyao wamo pea:tiki pu hala:me. 17 Kutupa do hosiki pa ta:ka:li minoloma: ka:nda: manuma:ta: koto ka:nda: ota: lombeipiki pa u halopa:la: seliapo piki pa̱a̱ mea ipilieke. 18 Nikana:ma:ta: nika: leke wia haloma:eki manuta: mo lekema: handa:peke ale manuna: dia:ya:la:pate pa mo lekema: na handa:peke ya:la: ale manuna: pu haloma:me. Mo lekema: handa:peke ale manuta: nate leke hosiki sikina: ulu pa:la:pate pa mo lekema: na handa:peke ya:la: ale manuta: hoto paeyao ota: pa u halieke.