16
Ketiso tapakemanu tamba: mina:la: mani
1 Ikana:ma: mo mandane Diutuseleme haleme Koda:na: wanda:hali tamba: muluekema: mani amu pulu peleme ekita: I̱ma: mo *Ka:leisia kenke nane haleme siosimanu pa:ta: Dupa:pe laa loa: tupa: ikana:ma: make pea:pa:peke. 2 Sande paeyaona: iki paeyaona: homeke homeke lo amba: pulana: melemeeki dimina handaata: ana:na: putupa pa mandaneeki ika: da pa:ta: wia:tiki pu hapa:peke. Koto ekina: wetepena: I̱ epoa:ka:na:ta: ikana:ma: mani weiyaama:na: yeke loa:me. 3 I̱ opolo epoa:ka:na:ta: mo ikana:ma: tiki tiki yao wimi manita: mo talopu mea haena: leleme haliwekima:ta: Diutuseleme nane mea puaena:yeke I̱ma: pasemanu wape pea halaata: tapaalueke. 4 I̱ make polueke hone ua:ka:na:ta: kota: niki mandakena: polumeke.
Poloma: wetepena: pulu piekeeki
5 I̱ma: *Ma:sedonia nanema: laala: puata: iki haleme alena: opolo ipulueke. Ma:sedonia nane amba:la pua:peke ya:la:me loa:me. 6 Iki ame̱le̱ hosiki hao haluekema: hone witolopate pa mata:la:me. Mo kosa: ki paeyaona: haluma:pe. Kutupa wetepena: da ma:nda: nane poa:ka:na:ta: ikana:ma: pota: I̱ tapaamina:e hone witolome. 7 Iki ame̱le̱ pa ta:ka:li hamana: hone na witolome. Tekehalima: hone pia:ka:na:ta: kota: iki ame̱le̱ nate wopu haluekema: loa:me. 8 Kutu pulu polopateta: hande *Pendikosi nate epena: do Epesese da pa:ta: handeteke halueke. 9 Do ekina:yeke loa:me. Do pa:ta:ta: pota: lomba:pa ula:me. Kutupa epeke epeke e tieke tieke pokaapeke ya:la:me. Kutu pulu polopate pa mo pota: sa:sa: pulu peleme haliweki wotu make halememe.
10 Timodi iki pa:ta: a:pa haya:ka:na:ta: ikana:ma: ipiki epeke tupa: handa: mea epeke tupa: handeteke hapa:peke. Ipikana:ma: make I̱ma: pitolo tupa: mo Tekehalina: e pokaasa: ekina: loa:me. 11 Kutupa hali homeke a:nda:ma: ipiki pa:ta: honditi hone na wia:pa:peke. Ikana:ma: ipiki I̱ pa:ta: epena: alo hata: ta:na:ma: homolo hata: tapaapa:peke. Ipikana:ma: mandane Ketiso yankeketiti ame̱le̱ do ane epena:yeke handeteke halome.
12 I̱ma: nika: kame Apolosita: mo mandane kametiti ame̱le̱ iki handolo pena:yeke hoto eleke eleke sutiaatiki pua:pate pa ipika: honema:ta: ame do kone a̱i̱ handolo pua:peke na ya:la:me. Wetepena: nate ana: pia:ka:na:ta: iki handolo pelieke.
Paeyaaso pimanu
13 Ikana:ma: kokele pea hata: hone tulaaso hata: make da̱o̱la hao hapa:peke. Kutupa puki hana: noka:pa hata: honkopu hao hapa:peke. 14 Koto ekina: ika: piteleme haumanu paeyaota: pukima: homolo hata: pu hapa:peke.
15 Some ma:nda: Sitepanisita: ipika: weki wanda: tonka:na: ikana:ma: handelememe. Koto tapaketa: mo *Akaya Potobinisi nane hata:ta: ota: amba: titina: pi mea hata: pa Koda:na: wanda:halina: e pokaatiki pitelememe. Koto ekina: ya kametiti iki pa:ta: honke alo hata: dupa alome. 16 Ikana:ma: koto tapake make mo ika: mandake e pokaaseme wanda:hali make iki oto pa:ta: homu pea hao hapa:peke.
17 Mo tepo halita: Sitepanisi Potunatasi Akaikusi ikana:ma: I̱ pa:ta: epeleme ekina: I̱ma:ta: ta:na:ma: homolome. Iki paeyaota: a:pa:peke na yea:pate do hali tepota: iki epolo pimi tupa: epelememe. 18 Koto haliwekima: iki ta:na: peaala: tupa: I̱ make ta:na: peaasememe. Kutu piki haliweki manuta: ika: pi laapa:peke.
19 Mo *Eisia Potobinisi nane haleme siosi manuma: iki pa:ta: mo keiyae pi la:niaasememe. Hande Akuila Pisila toolima: make ipilika: da pa:ta: mombolo haleme siosi ikana:ma: tonka:na: ika: keiyae pi make la:niaasememe. 20 Do pa:ta: haloma: kametitima: make iki pa:ta: mo keiyae pi la:niaasememe. Mombelemeka:na:ta: kota: iki paeyaoma: ika: ika: kone hopula alu alu pea:pa:peke.
21 Yaka kikima: kone I̱ta: Poloma: iki pa:ta: keiyae pi la:niaasome laa do wape pea polome. 22 Tekehali pa:ta: pukima: na homeke pa kiaasa: hali epita: ota: hoeyaena:e. Nika: Tekehalio. Epoe. 23 Mo Tekehali Yesuna: pa a:ta:ma: homa tamba: mina:la: ekita: iki pa:ta: haena:e. 24 I̱ma: Yesu *Ketiso pa:ta: ta:ma:ni pea hata:ta: iki paeyao pa:ta: pukima: homolome.