Poloma: Loma: Ketiso tapake pa:ta: tapaeyeke wapee
1
1 Do wapeta: I̱ Poloma: pua:me. Yesu *Ketiso ipika: e pokaaso hali halome. Koda: ipika: Pi Seliapo walonoyeke ipikana:ma: I̱ wi la: meaata: *aposolo hali hano la:la:me.
2 Do hande Pi Seliapota: Koda:ma: amba: kiake pi la: witolo hata: ipika: pi la: mea halo haemeke potopede haliweki pa:ta: la halaata: yakopiki *Baibolo bukana: make wape pina: leekeme. 3 Do Pi Seliapota: ipika: Eiyeke hande nika: Tekehali Yesu Ketisoma: pulu pieke ekina: eki loa:me. Ipikita: kenke hali leke hayeke ekita: *Deipidina: tapake hali hayekeme. 4 Kutu piekepate ipikita: Koda: yaapo hao a:pa yakopiki hali hayeke ekita: kota: Koda:ma: wele wotu pitolo hata: ipikita: Koda:na: Eiyekee laa peneme yaluekema: homeeke pa:ta: kone paa mea tiaeyekeme. 5 Koda:ma: Yesu Ketiso pa:ta: hone witolo hata: I̱ aposolo hali halo pua:eki kia:me. Kutupa Ketisona: bikina: kenke ta:ta: ta:ta: pa:ta:manu haeme wanda:hali paeyao hatuku pua ipika: pi hone tulao opua pina:yeke kia:me. 6 Loma: wanda:halio. Do alo ekita: iki pa:ta: make alome. Iki make Yesu Ketiso pa:ta: hamina:yeke Koda:ma: wi la:la:me.
7 Koto pa:la: ekina: Koda:ma: pukima: homaata: ota: ipika: wanda:hali hamina: wi la:la: Loma: wanda:halio. Iki paeyao pa:ta: wape do pitolome.
Nika: Apa: Koda:ma: make pa Tekehali Yesu Ketisoma: make iki pa:ta: a:ta:ma: homolo hata: ika: puki lopao hamina: lepeka:na:ta: epelieke.
Poloma: Koda: pa:ta: keiyae pi ala:eki
8 Do pi kini pitolo hata: doeki alome. Ika: Yesu Ketiso pa:ta: hone tulaasemeeki kenke wanda:hali paeyaoma: opiteleme ekina: I̱ma: iki paeyao pa:ta: hone wia Yesu Ketisona: bikina: yaka Koda: pa:ta: keiyae pi alome. 9 Do alo ekita: ota: pi aloeki Koda:ma: handa:la:me. Do Koda:ta: ipika: Eiyekena: Pi Seliapo walolo hata: yaka tieke pukima: ipika: e pokao halome. Hoto paeyao iki pa:ta: hone witolo hata: 10 I̱ma: yeni pu haloeki Koda:ma: handa:la:me. Koda:ma: hone pia:ka:na:ta: I̱ta: ame iki pa:ta: a:pa hosiki haluekema: Koda:ma: peaena:yeke honke alome. 11 Iki handuluekema: I̱ma: hone wotu pa:la:me. Mo hande Holi Sipitidina: epeaasa:eki ma:nda: iki pa:ta: teli teli pealuekema: ika: puki taka:lao hamina:yeke loa:me. 12 Do alo ekita: dupae. Yaka hone tulaalo ekima: iki tamba: mina: make ika: hone tulaaleme ekima: I̱ tamba: mina: make niki paeyaoma: tamba: mu alualu pumana:yeke loa:me.
13 Yaka kame titio doeki hone wia:pa:peke. I̱ta: iki ame̱le̱ hosiki halo ipuluekema: hoto elekeeleke pua:pate ale ma:nda:ma: yaka pota: sa:sa: pu hala:me. Iki ame̱le̱ haleme mandane wanda:halima: pi mina: puki la:ka:laluekema: mo mandane *Diendaili wanda:hali pa:ta: pua: tupa: puluekema: I̱ma: hone pa:la:me. 14 Kapomanina: pita:la: hau handeleme wanda:hali pa:ta: make na handeleme wanda:hali pa:ta: make wape handeleme wanda:hali pa:ta: make wape na handeleme wanda:hali pa:ta: make paeyao pa:ta: I̱ma: pi wala:peke ya:la:me. 15 Koto ekina: Loma: wanda:hali iki pa:ta: make mo Pi Seliapo waluekema: tiki tiki hao halome.
Mo Pi Seliapona: wele pa:la:eki
16 Mo hande Pi Seliapoma: Koda:ma:ta: ipiki pa:ta: hone tulaaseme wanda:halita: Diu wanda:hali amba:la Diendaili wanda:hali wetepena: paeyao ipikana:ma: wele pitolo hata: da:taapeke ya:la:me. Koto ekina: mo Pi Seliapo pa:ta: I̱ta: ota: ti lao halome. 17 Mo hande Pi Seliapoma: doeki wala:leke handa loa:me. Koda:ma: wanda:hali ipiki pa:ta: tiki tiki haena: ala:eki wala:la:me. Mo Koda:ma: do pita:la: ekita: wanda:halima: hone tulao hatiki puo pu hao paeyaalo pulu make pilieke. Mo Baibolo bukana: wape pea ula: tupa: Hali epima: Koda: pa:ta: hone tulao haya:ka:na:ta: Koda:ma: ipiki pa:ta: mo hali tiki tiki haena: lelieke. Kutupa mo halita: da:ta halieke.
Wanda:hali paeyao pa:ta: hoke haumanu ula:eki
18 Kutupa Koda:ma:ta: wanda:hali paeyaoma: ipikita: hoki nane yao ika: hoke hau paeyao pimiki ekina: ipikana:ma: mineke pankolo hata: iki ame̱le̱ pi yokaalu pulu pelemeeki make wala:la:me. Kutu piki wanda:halima: ika: hoke hau piteleme ekina: mandane wanda:halima: Koda:na: ota: hala:eki handaama:na: sa:sa: pu halememe. 19 Kutupiki wanda:halita: Koda:ma: panisi peaalieke. Do ekina:yeke loa:me. Koda: hala: ekita: wanda:hali paeyao pa:ta: na a:mbala:me. Ikana:ma: handa:pa:peke ya:la:me. Pa ekipeke Koda:ma: kone iki pa:ta: peneme yaala:me. 20 Koda:ma: kenke ala:ta: ala:ta: paeyao wepia wina: la:la: dina: kini pu mea a:pa ame haloma: pa:ta: kone wanda:hali paeyaoma:ta: Koda: ota: hala:eki make ipika: wele pu hao halo pa:la:eki make hone epeke tupa: wia:pa:peke ya:la:me. Koto Koda:na: hau yaapota: lekema: peneme handa:pa:peke na ya:la:pate pa hone wia:pa:peke ya:la:me. Wanda:hali paeyaoma:ta: Koda:ma: wepia wina: la:la: ekimanu lekema: handolo hata: hone wia:pa:peke ya:la:me. Koto ekina: wanda:hali paeyaoma: pi ma:nda: lapa:peke na ya:la:me. 21 Iki paeyaoma:ta: Koda: hala:eki hone witelemepate ipiki pa:ta: Neketa: ota: Koda: haleme pi na leke ipika: pi laaluekema: make kiao halememe. Kutupa ipiki pa:ta: keiyae pi make na lo halememe. Kutu pu haleme ekina: iki hone wopu na wiki hata: ika: hone teke pa:ta: timba: lo pamba:la:eki tumbulu baena: halememe. 22 Ikana:ma: alota: Nikita: hone wopu uluma: wanda:hali haloma:me laa lo halemepate ikita: hone na wiki wanda:hali hata:ta: 23 hande na homeke pa hao hala: Koda: pa:ta: panda:puniao yeni na piki pa mo wanda:halima: wa:pa:la: alemanu pa:ta: kone panda:puniao yeni pu halememe. Koto ale manuta: mo homa:la:eki pila: halima: make ba titima: make kenkena: pomineleme ale manuma: make kutupiki ekima: handeke ekimanu pa:ta: panda:puniao yeni pu halememe.
Hoke hau ta:ta: ta:ta: pita:la:eki
24 Hone na wiki kutupiki haliweki haleme ekina: Koda:ma: kiao ika: hone pa:la: suseke haasa: haumanu pa putia pena: ala:me. Kutupa ikana:ma: yaala: piki haumanu pu alualu pu halememe. 25 Kutu piki haliwekima:ta: Koda: ota: hala: ekita: na miki pa topo pea yayapikieki melememe. Kutupa Koda:ma: pa wepia wina: la:la: alemanu pa:ta: panda:puniao yeni pu hata: ika: hau peao halemepateta: hande ala:ta: ala:ta: paeyao wepia wina: la:la: Koda: pa:ta:ta: na pitelememe. Koto Koda:ta: wanda:halima: ipika: pi laatiki pu hapa:peke ya:la:me. Ota: loa:me.
26 Kutupu haemeke ekina: Koda:ma:ta: ika: yaala: piki haumanu pa putia pena: la:la:me. Wanda:wekima: kone haliweki pa:ta: hone na wiki pa ika: wanda: yankeke pa:ta: ana: na piki haumanu pu halememe. 27 Koto tupa: kone mo haliwekima: make wanda:weki pa:ta: hone na wiki ika: hali yankeke pa:ta: kone ana: na piki haumanu pu alualu puluekema: puki pa:ta: ti leke talo hata: pu halememe. Mo haliwekima:ta: ika: kone yaala:piki haumanu pu alualu pu haleme ekina: Koda:ma: ika: ana: na piki hauna: yenkita: hokeeki kone halo hala:me.
28 Mo haliwekima:ta: Koda: ota: hala:eki hone ma:nda: uluekema: kiaasemeke ekina:ta: Koda:ma: ika: kone hone u hoeyao pa haena: la:la:me. Koto pa:la: ekina: mo haliwekima: ana: na piki haumanu pu halememe. 29 Koto wanda:halita: hoke hau manuma: make pasa:tei hau manuma: make ma:nda: pa:ta: hokeeki puluekema: hone witelemeeki manuma: make ta:ta: ta:ta: pikieki manuma: tumbulu bao halememe. Soka:la: pita:la: ekima: make hali luekema: pita:la: ekima: make a:nda: lita:la: ekima: make yayapiki hau pita:la: ekima: make ma:nda: pa:ta: hoke hone wita:la: ekima: make tumbulu bao hata: pa pimanu la:tiki pu halo hata: 30 ika: ika: kone pi la la pu alualu pia:tiki pu halememe. Koda: hoki wala leke pa:ta: sa:take pu hambiliki hoepitolo make tanda pea hatiki pu halememe. Hakoko litolo hata: Koda:na: pi kone la:tiki pitolo hata: hoke ekimanu puluekema: panake pota:manu weiya:tiki pu halememe. Kutupa ateke inkiki yaapona: pi tunkula:tiki pu halememe. 31 Ikana:ma: ya:la:ma: na homolo hata: ika: la: wimiki pimanu pa tunkula:tiki pu pitolo hata: make ma:nda: pa:ta: epeke hone na wiki pa a:ta:ma: na homa:tiki pu halememe. 32 Koda:na: pi ula: ekima: alota: Mo kutu piki haumanu pu haleme wanda:halita: homa:la:eki mea:pa:peke ya:la:me laa la:la:me. Koto la:la: pi mo wanda:halima: opitelemepate ika: hande hoke ekimanu paa pia:tiki pu hao kutupa make mandane wanda:halima: koto hande hoke ekimanu pimika:na:ta: a:pa:la:ma: pa pipe laa lo halememe.