18
Hepenina: *Kilu Tombuao Hala: tumiki halita: epipe
1 Koto toma:na:ta: mo *disaipolo haliwekima: Yesu pa:ta: a:pa lota: pitolo alota: Mo hepenina: Kilu Tombuao Hala:eki pa:ta: epita: ota: tieke hala:pe lemekeme.
2 Koto lemeketa: Yesuma: weki siki homeke wila: meaata: ika: puki nanema: mea haena: leekeme. 3 Kutaa ipikana:ma: iki pa:ta: alota: I̱ma: iki pa:ta: ota: pi alome. Ikana:ma: ika: hone topo pina: lena: laata: mo weki siki leke na haemeka:na:ta: kota: ikana:ma: hepenina: Kilu Tombuao Hala: pa:ta: ota: na honda: pambilimikie. 4 Epima: ipika: kone panda: puniaaso hata: homu pea do weki siki leke hala: halita: mo hepenina: Kilu Tombuao Hala: ekina: tumiki hali hala:me.
5 Ma:nda: epima: dupiki weki siki ya bikina: ta:na:ma: homolo hata: handa: mia:ka:na:ta: kota: I̱ make ta:na:ma: homaa handa: milieke.
6 Hali epima: do I̱ pa:ta: hone tulaaseme wekiwandiki sunu homeke ma:nda:ma: hoke hau pina:yeke pu tiaena: lea:ka:na:ta: kota: koto halina: make pa:ta: toopi hombeleke mea endiata: homena: mo dawala noka: pa:ta: mea lopaena: lea:ka:na: yoluta: epolo pia:me.
7 A:pei. Do kenke pa:ta: I̱ paala:e. Wanda:halima: hoke hau pina:yeke ula: hoke haumanu ula:me. Dupiki haumanu a:pa:peke yolo pa:la:pate a:pa:e mo hau epena: ala: halita: ota: hoke yenki milieke.
8 Koto ekina:ta: naka: kikima: o naka: ankema: hoke hau puelena: lea:ka:na:ta: kota: koto kiki o koto anke tunkulu baapeke. Kiki homeke o anke homeke homeke hata: deto hala:eki mika:na:ta: kota: ota: epelieke. Pate neketa: naka: kiki yaapo pa haena: lo o anke yaapo pa haena: lo pea haeka:na:ta: ikana:ma: neke mo na paeke ti to hala: ale pa:ta: mea lopaemeka:na:ta: kota: ota: hoelieke. 9 Naka: lekema: hoke hau puelena: lea:ka:na:ta: kota: koto leke yoka: mea baapeke. Leke homeke homeke hata: deto hala:eki mika:na:ta: kota: ota: epelieke. Leke yaapo pa haena: lo pea haeka:na:ta: ikana:ma: neke mo ti to hala: ale pa:ta: mea lopaemeka:na:ta: kota: ota: hoelieke.
Sipisipi alu pieke onkoluma: pi
10 Ikana:ma: dupiki wekiwandiki sunu pa:ta: pa alema: handali mina:ma: wopu handeteke hapa:peke alome. Pa ekipeke. Mo wekiwandiki ika: hepeni hala: enisolo tonuma: mo ya hepeni hala: Apa:na: leke popelekena: teke pa:ta: hata: handeteke hao halememe alome. 11 [Wanda:halina: Eiyekema: mo alu peleme wanda:hali weiya handa: wia da:taaluekema: a:pa hala:me.]
12 Ika: honema:ta: hali epima: ipika: 100 sipisipi ma:na: handeteke halia:pate homeke hondo alupia:ka:na:ta: eki pilieke hone witemepe. Ipikana:ma: pa halia: 99 sipisipimanu mo peiyene tea:na: mea haena: laata: mo alupia:eki weilu pelieke. 13 I̱ma: iki pa:ta: ota: pi alome. Mo alupia: sipisipi ma:na: handa: wia:ka:na:ta: kota: ipikana:ma: mo na alu piki pa haleme ekimanu pa:ta: ta:na:ma: homiliepate pa mo handa: wiekeeki pa:ta:ta: ta:na: ota: wopu homilieke. 14 Pa do mandake tupa: kone mo naka: hepeni hala: Apa:ma: make do wekiwandiki sunu homeke ma:nda: alu pina: hone na pa:la:me alome leekeme.
Hoke hau pilie kame epeaapekeeki
15 Naka: kamema: neke hoeyaasa: hoke hau pia:ka:na:ta: kota: ipiki teke pa:ta: puaata: ipika: pia: hokeeki wala:peke. Pate peneme na piki ipilika: honema: pea:pa:peke. Ipikana:ma: naka: pi opua telia pia:ka:na:ta: kota: mo kameta: neke nane epena: lelipikie. 16 Pate naka: pi na opia:ka:na:ta: kota: pa pua hali homeke o yaapo ma:nda: hatuku ipiki pa:ta: paa pua:pa:peke. Kutu pika:na:ta: mo nakana:ma: titina: ipiki pa:ta: le pi alupaama:na: handa: ula: hali yaapo o tepona: pima: hone u tiatiki pina: lelieke. 17 Kutu pilimipate iki paeyaona: pi na opia:ka:na:ta: kota: mo ipika: pia: hau paeyao siosi wanda:hali mombilimi ale pa:ta: la hala:peke. Kutaa ipikana:ma: mo siosi wanda:hali paeyaona: pi na opia:ka:na:ta: kota: nakana:ma: koto someta: mo Koda: mataasa: hali o a:nda: tunkuliki wanda:halina: tamba: mina:la: hali tupa: haena: lapeke leekeme.
18 I̱ma: iki pa:ta: dupa alome. Ikana:ma: do kenke nane ala:ta: o hau ma:nda: pi wimika:na:ta: kota: koto pi wita:la: ekita: oli hepeni nane make pi wilieke. Koto tupa: kone ikana:ma: do kenke nane ala:ta: o hau ma:nda: pi na wimika:na:ta: kota: hepeni nane make pi na wilieke.
19 Pa ameta: do pi make apa:taaso iki pa:ta: alome. Iki paeyao tukiki pa:ta: epi yaapo a:nda:ma: mo pea:peke hau homeke a:nda: do pate puluekema: epena:e laa homeke hone wia hata: yeni pipika:na:ta: kota: oli ya hepeni hala: Apa:ma: opua ipilika: hone pa:la: ekita: ota: peawalieke. 20 Pa ekipeke wanda:hali yaapo o tepoma: ale ma:nda: pa:ta: yaka bikina: mombelemeka:na:ta: kota: I̱ma: koto pa:ta: iki ame̱le̱ mandake halueke leekeme.
Hoke hau hone na yonka:laasa: halina: onkoluma: pi
21 Koto toma:na:ta: Pidama: Yesu pa:ta: a:pa lota: pitolo alota: Tekehalio. Yaka kamema: I̱ pa:ta: hoke hau pea:tiki pu haya:ka:na:ta: kota: I̱ma: tana: ekipu paeyaaluepe. Tana: wataake hata: ana: pa:la:pe laa lota: piekepate 22 Yesuma: hombo peaaso alota: Dia:me. Hoto wataake hata: ana: na pa:la:me. Pa hoto paeyao ota: pa paeyaaso paeyaaso pu hapeke.
23 Pa ekipeke. Mo hepenina: Kilu Tombuao Hala: ekita: do tupa: ya:la:me. Kini hali homekema: ipika: e poka:la: haliwekina: tondiki manuta: tikitiki yaalueke hone wiekeme. 24 Kotoeki kini pu mea pokuluekema: haena: ipika: e pokaeyeke hali homeke hatuku epemekeme. Koto halima:ta: mo Kini halina: 10 milioni kina tondiki mea hayekeme. 25 Kutupa koto ipika: tondiki paeyaapeke mani na wieke handaata: mo Kini halima: iki pa:ta: alota: Do hali ipika: wekiwanda: make ipika: wia hayeke alemanu paeyao make mo tondiki paeyaena:yeke mani muluekema: iki paeyao ma:nda:na: pahameke e pokaasa: tapake haena: hambena: tapaapa:peke leekeme. 26 Koto leekeeki opuaata: mo e pokaeyeke halima: ipika: Kinina: leke popelekena: tumiki yotuao panda: puniaaso honke alo alota: Tekehalio. I̱ pa:ta: a:ta:ma: homolo hata: waleke kika:na:ta: mo tondiki paeyao ana:na: epeao kulueke laa honke leekeme. 27 Koto leekeeki opitolo hata: mo Kini halima: ipiki pa:ta: a:ta:ma: homolo hata: pa pina:e laa Paota: pa mo hande tondiki tieke make pina: laa kiao hone yonka:lao ipiki paa tapaeyekeme.
28 Kutu pieke mo hande somema: mo ipika: Kini hali mina:pa:lao hama peekeme. Kutu pitolo hata:ta: ipika: 100 kina tondiki miono leeke haleeke mo Kini halina: e mandake pokaepeke hali ma:nda: manda:hande piekeme. Ipikana:ma: koto e mandake pokaepeke somena: make da:ka:pa: mina ipika: pendoko teke yoka: minolo hata: alota: Mo ya neke pa:ta: kolo tondikita: ma:nda: pa na mina:pa:lake ota: paeyao kima leekeme.
29 Mo e mandake pokaepeke some ipika: leke popelekena: panda: puniaaso honke alo alota: Kameo. I̱ pa:ta: a:ta:ma: homolo hata: waleke kika:na:ta: mo tondiki paeyao ana:na: kulueke leekeme. 30 Koto leekepate ipikana:ma:ta: koto pi tombuao a:ta:ma: na homeke mo somema: ipika: tondiki paeyao ana:na: kone pa kina: alo hata: pa dipula mea lopaeyekeme.
31 Kutu pieke hauta: mo hande Kini halina: e pokaemeke mandane haliwekima: handaata: ikana:ma: ka:nda:ma: homolo hata: ika: Kini hali pa:ta: mo hau paeyao pua la haleekeme. 32 Mo Kini halima: koto pi opuaata: mo hande hali epena: wi leekeme. Kutupa ipiki pa:ta: alota: Neketa: ota: hoke hau piki e pokaasa: halie. Nakana:ma: I̱ pa:ta: A:ta:ma: homee laa honke leeki homeke homekena:ta: mo hande naka: tondiki tieke paeyao I̱ma: pa paeyaowa:me. 33 Kota: I̱ma: neke pa:ta: pa a:ta:ma: homoa: tupa: nakana:ma: naka: e mandake pokaepe some pa:ta: make koto tupa: kone a:ta:ma: homa:peke alee laata: 34 mo Kini halima: mineke tieke pankolo hata: mo hande somema: ipika: mieke tondiki ota: paeyao ana:na: kone epeao paeyaena: handeteke hata: panisi pina: dipula mea lopaeyekeme. 35 Yesuma: do onkoluma: pi lo a:mbolo hata: alota: Ikana:ma: ika: yankekena: hoke hau pimiki ekimanu ika: pukima: ota: hone na yonka:laemeka:na:ta: kota: yaka hepeni hala: Apa:ma: mo hande Kini halima: pieke tupa: kone iki paeyao pa:ta: make koto mandake tupa: kone pilieke leekeme.