Okokora amangʼana amaiya
3
Uhiitökinga abhakumya igha,
bhasookenga na ukwighwera abhatangati na abha ubhwera.
Bhabhe na eteemo iya okokora amangʼana amaiya.
2 Obhatëëbhi igha,
bhatakaatoka ömöntö wowonswe oora,
bhatakaabha abhatindi,
kasi bhabhe abhahaabhu,
na abhaihöötu ko-bhantö bhonswe igho.
3 Kora bhëëtö bhonswe kare hayö,
hano waanyöörrë totaraakumya Yëësu,
m-bakangi twaarë,
abhatëëyu,
kora ntwaangʼainirwë,
tokabha abhaghorwa abha oronamba,
na amangʼana amaaru agha ko-kebhara kono,
ghano ghaaturutanga.
Tokabha abhantö abhaghogho na abha orongʼeera.
Tokabha abhantö abha okoreghana na abhantö abhandë.
4 Kasi Waryobha Ömötöörya uwëëtö,
akatokorra öbhöntö ubhwa heene,
kora akatwörökya righonshe iryaye,
akatötöörya.
5 Ti-igha öbhöntö ubhwa heene ubhwëtö,
mbo bhwaaghërrë akatokorra ghayö,
kasi n-ko okoghera iya ikyabhera ikyaye,
nkyo kyaaghërrë akatokorra igho.
Atosaabhuurrë obhoghogho ubhwëtö,
kuyö nko ukwebhorwa bhohya.
Ghwiki atohaayë öbhöhöru bhohya okohetera ku-Mwika Ömöhörëëru.
6 Waryobha yaatöhömërrëëyë bhököngʼu Umwika Ömöhörëëru,
ko okohetera ku-Yëësu Kiristo Ömötöörya uwëëtö.
7 Ni-igho Waryobha yaakörrë,
kora akatokora tobhe abhantö abha heene,
kö örööbhö urwaye,
okore toraaghere umwandö ughwa öbhöhöru ubhwa amakora ghonswe igho,
kya bhono tukwitengʼera.
8 Amangʼana ghayö nkötëëbhëri,
na-agha obhoheene.
Nkutuna ndë igha oghakangʼasërri ko-bhantö,
okore bhano bhonswe igho bhakukumya Waryobha,
bhaghanaghi,
na bhaiköngʼërri okokora amangʼana amaiya.
Amangʼana ghayö m-maiya,
kora ngaana ubhwera ko-bhantö bhonswe igho.
9 Hamwë na ghayö ghonswe igho,
ni-igha wihëënëri-ho senkaani isya ekekangi,
amariina agha abhakörö,
ubhutindi na senkaani ko amangʼana agha amaraghërryö agha Mosa.
Amangʼana ghayö ghonswe igho teghaana ubhwera hë.
10 Ömöntö ono akösëëghërrya abhantö,
omokaani,
hano oraamokaani urwa kabhërë,
unyoore igha takwighwa hë,
tighana nawe këmwë.
11 Nomanyirë igha ömöntö kya uyö,
yaatigha obhoheene,
ku bhuyö ëbhëbhë ibhyaye,
bhyamara okomobhotorra ikiina igha,
m-mosarya.
Amangʼana agha okomarërrya na okoragha
12 Ndööshë igha ngende Niköpöri,
nikare-yo enkaagha iya embeho.
Kasi nendaatome Aritema handë Tikiiko ku-uwe hayö.
Hano ömwë uwaabho arihika hayö,
wuushe ukwangoha tomaahane Niköpöri eera.
13 Wiköngʼërri ökötöörrya umushaasha oora Zeena omomanyi uwa amaraghërryö.
Apöörö wonswe ömötöörri.
Obhahaane ëbhëntö bhyonswe igho,
bheno bheraabhatöörri ko-roghendo urwabho.
Bhatakaasuuhwa na kyokyonswe keno bhakutuna.
14 Abhakumya bharikyëtö bhonswe,
bheeghe okokora amangʼana amaiya,
okore bhatöörri abhahabhë.
Hano bharaakorenga igho,
mbaraabhe abhantö abha ubhwera tebhahete bhosa igho hë.
15 Abhantö bhonswe igho bhano bharëngë hamwë na öni hano,
bharakökëërya.
Bhoono na uwe wonswe,
ötökëërri abhaghonshe abhëëtö bhonswe igho.
Örööbhö urwa Waryobha,
robhe hamwë na bhëënyu bhonswe igho.