Amëëghyö agha obhoheene
2
Kasi bhoono uwe Tiito,
wëëghinga abhantö amëëghyö agha obhoheene.
2 Ötëëbhi abhaghaaka igha,
bhagheerenga ngʼora amangʼana,
bhaisooke,
bhairebherre,
bhabhe na umukumo ughwa obhoheene,
bhaghömërringa,
kora bhabhe na righonshe.
3 Abhakungu bhonswe bhakorenga kya igho,
obhatëëbhi igha,
bhabhe na eteemo eno ëkötöönia Waryobha.
Bhatakaabha abhaghambi abha abhantö,
bhatakaabha abharëëbhi,
kasi bhatönibhwi ukwörökërrya abhantö eteemo inshiiya,
4 okore bhëëghinga abhakari abhaana abhake bhahanshe abhashaasha abhaabho na abhaana abhaabho.
5 Ghwiki ni-igha,
abhakari abhaana abhake,
bhagheerenga ngʼora amangʼana,
bhabhe abharöngë,
bhanaghi bhuuya,
amangʼana agha mu-sinyumba isyabho,
bhabhe abhantö abha heene,
bhano bhakosooka bhashaasha abhaabho.
Obhatëëbhi bhakore igho,
okore engʼana iya Waryobha etakaaserwa.
6 Kora abhamura bhonswe obhakaani,
okore bhagheere ngʼora amangʼana ghonswe igho.
7 Uwe Tiito,
ko amangʼana ghonswe igho,
obhe ëkërëngyö ikya abhantö ökörëngya okokora amangʼana amaiya.
Obhe ömöntö uwa obhoheene na ono onaghirë kö-mëëghyö aghaaho.
8 Amëëghyö aghaaho ghabhe agha heene,
ghano ghatakotemwa amasoro na abhantö.
Nyoore abhantö bharatuna okoghanyeera senkaani,
bhasooke ko bhoora mbaraabhorwe engʼana,
iya okotoghamba obhoghogho.
9 Ötëëbhinga abhaghorwa igha,
bhasookenga abhanene abhaabho na okobhakorra amangʼana ghonswe igho bhuuya,
bhatakaabhanyeera senkaani.
10 Bhatakaabheebheranga,
kasi bhabhe abhantö abha heene,
okore eteemo iyaabho irute abhantö,
bhashomerwe na amëëghyö agha Waryobha Ömötöörya uwëëtö.
11 Wëëghinga abhantö amangʼana ghayö,
ko bhoora,
örööbhö urwa Waryobha rono rököhönia abhantö bhonswe igho,
harabhu igho rörë.
12 Örööbhö ruyö,
nkutwörökërrya rörë igha,
twange amangʼana amaghogho na oronamba urwa ko-kebhara kono.
Ku bhuyö,
enkaagha eno tökërëngë ko-kebhara kono,
togheerenga ngʼora amangʼana,
tobhe abhantö abha heene,
na tobhe abhantö abha eteemo iya okosooka Waryobha.
13 Tokorenga igho enkaagha tukwitengʼera urusikö urwa obhongʼoore.
Urusikö roora Yëësu Kiristo arikyora,
amaahekane ku-bhuhika ubhwaye.
Uyö we Waryobha uwëëtö,
Omonene uwëëtö,
na m-Mötöörya uwëëtö.
14 Yaairuusiri ko okoghera iya bhëëtö,
okore atutunguri ukurwa mo-bhosarya ubhwëtö bhonswe igho.
Yaatunirë igha atosaabhuure,
okore tobhe abhantö abhaaye abha heene,
bhano bhairuusya okokora amangʼana amaiya.
15 Mbe,
bhoono wëëghinga abhantö amangʼana ghayö ghonswe igho.
Oona ubhwera bhwonswe igho ubhwa okotogheka na okokaania abhantö,
ku bhuyö,
otakaaserwa na ömöntö wowonswe oora.