4
Nkokoraghërrya ndë amangʼana ghano mbere iya Waryobha na mbere iya Kiristo Yëësu,
ono arebhotorra ikiina abhahöru na abhaku.
Uyö we ariisha atonge ko-Bhokama ubhwaye.
2 Bhoono oraarekenga engʼana iya Waryobha na eno wisëëmëri okokora emeremo ighya Waryobha,
ko-nkaagha eno amangʼana ghakughya bhuuya,
na enkaagha eno ukunyoora ghasarëkirë.
Okaaninga abhantö,
obhahamerenga na okobhatogheka.
Okorenga igho,
kö ököghömërrya bhököngʼu na örëëghya.
3 Nkökötëëbhya ndë ghayö ko bhoora iriihika-ho enkaagha,
eno abhantö bharyanga ukwitegherra amëëghyö agha obhoheene.
Mbaritunanga ukwitegherra amangʼana ghano ghakobhashomera agheene igho,
na ukwishaaghorra abhëëghya abhaaru abha ököbhëëghya ghano bhakutuna ukwitegherra.
4 Mbaritigha ukwitegherra obhoheene.
Mbarikërrya amaghano ghano ghataana ubhwera bhwobhwonswe bhoora.
5 Kasi uwe Timoteo,
wangarre ko amangʼana ghayö ghonswe igho.
Öghömërri inyaanyi,
okore emeremo ighya okoraareka Amangʼana Amaiya,
okore bhuuya kö-bhököri ubhwaho bhonswe igho,
ubhwa emeremo ighya Waryobha.
6 Nkökötëëbhya ndë ghayö,
ko bhoora igha,
öbhöhöru ubhwane,
haangʼë bhörë bhobhe ikimwenso ku-Waryobha.
a Enkaagha iya ukukwa ukwane haangʼë ërë.
7 Naitaini bhuuya riihë irya umukumo,
oroghendo urwa umukumo ndomarrë,
na ghwiki nnaghëri umukumo.
8 Bhoono keno kitighaayë,
no-kohaanwa ikirighi ikya heene.
Omonene Yëësu,
ono akobhotora ibhiina ubhwa heene,
narekengʼaana urusikö roora arikyora.
Tö-öni umwene igho hë,
kasi na abhandë bhonswe igho bhano bhakwitengʼera bhököngʼu ukukyora ukwaye.
Amasaasaamo agha Pauro ku-Timoteo
9 Timoteo,
kora omotono wangohe ukuusha,
10 ko bhoora Dema,
yaantigha.
Dema uyö,
yaahansha amangʼana agha ko-kebhara kono,
akamaaha igha aghende mu-mughi ughwa Tësarönikë.
Kiresike,
yaghëëyë mo-mokowa ughwa Gharatia,
na Tiito,
yaghëëyë mo-mokowa ughwa Darimatia.
11 Ruuka umwene igho we yatighara hamwë na öni hano.
Bhoono hano oraashe eno,
uushe na Maariko,
ko bhoora naingʼarëëyë ököntöörrya okokora emeremo ighya Waryobha.
12 Naatömirë Tikiiko Ëfësö iyö.
13 Hano uriisha,
ondeterani na rikööti iryane reno naatighirë wa Karipo eera,
mu-mughi ughwa Tiroa,
hamwë na ebhetabho ibhyane,
ekenene ibhya amaseero bheera.
14 Arekisanda umuturi uwa ibhyoma oora,
yaankorra amangʼana amaghogho bhököngʼu.
Omonene Yëësu Kiristo naaremobhotorra ikiina okorengʼaana na ghano yaakora.
15 Na uwe wonswe,
wiyangarre kö-möntö uyö,
ko bhoora igha,
yaarebherranga bhököngʼu amëëghyö aghëëtö.
16 Hano naaimërëëyë urwa mbere ukwikoorerra öni umwene mo-bharasa haara,
tiyaare-ho ömöntö kora ömwë,
ono yaarë orobhareka urwane,
bhonswe igho mbaantighirë.
Ndasabha Waryobha atakaabhagherra obhosarya ko engʼana iyö.
17 Kasi Omonene Yëësu yaarenga hamwë na öni,
akangʼaana singuru isya okoraareka Amangʼana Amaiya,
okore Abhakyaro bhonswe bhaighwe.
Akanhonia na ruku,
ko bhoora igha naarenga kya ono ndëngë mu-munywa ughwa ëndwë.
18 Nemanyirë igha Omonene Yëësu,
naraaghëndërri ököntöörya ko-maghogho ghonswe igho na okondenda,
okohekera ko-Bhokama ubhwaye ubhwa mu-ryobha.
Omonene Yëësu atöönibhwi amakora na amakora!
Amina.
Amangʼana agha okoragha
19 Ökëëri Akiira na Purisika mokaaye,
na abhantö abha Onesiforo.
20 Erasito yaatighaayë Körintö.
Turofimo naamutighirë Mireto,
m-mörööyë yaarë.
21 Bhoono ni-igha wangohe ukuusha eno,
enkaagha iya embeho itaraabha.
Eubhuro,
Pude,
Rino,
na Kiraudia,
hamwë na abhakumya bhonswe igho,
bharakökëërya.
22 Omonene Yëësu abhe hamwë na uwe.
Örööbhö urwaye,
robhe hamwë na bhëënyu bhonswe igho.