Sinsikö isya umuhiko ne-ngogho serebha
3
Bhoono Timoteo omanye igha,
ereebha-ho inyanko engogho bhököngʼu ku-sinsikö isya umuhiko ughwa ekebhara keno.
2 Senkaagha siyö,
abhantö mbariihansha,
mbarebha na oronamba urwa seehera,
mbarebha abhaihashi,
mbarebha na ikisiraani,
mbarebha abha amatöki,
tebharesookanga abhaibhöri abhaabho hë,
tebharebha na umukumo hë,
handë okosooka Waryobha.
3 Kora tebharehansha ömöntö wowonswe oora hë,
tebharitunanga ukwighwerrana hë,
mbarebha abhaghambi abha abhantö,
tebharirebherranga hë,
mbarebha abharörö,
tebharehanshanga amangʼana amaiya hë.
4 Abhantö bhayö,
mbarekorranga abhantö inikö,
mbarebhanga na emetwe ëmëköngʼu,
abha ikiheemere.
Mbarehansha oronamba urwa ko-kebhara kono,
okokera okohansha Waryobha.
5 Abhantö bhayö,
mbaremaahekananga igha nkwighwera bharë Waryobha,
kasi mo-senkoro isyabho,
nurinyoora bharanga obhotoro ubhwa Waryobha,
ubhwa okorera seteemo isya abhantö.
Abhantö kya bhayö,
obhaibhashe.
6 Mo-bhayö,
bhaamo bhano bhakwihira mu-mighi ighya abhantö kebhongʼaini ngʼaini,
na ököngʼënërrya abhakari abhakangi.
Abhakari bhayö,
m-bano bhaaritoherwa na ëbhëbhë,
bhararutwa na oronamba urwaru rwaru igho.
7 Abhakari bhayö,
nkwegha bharë sinsikö syonswe igho,
kasi tebhakotora okomanyërrya obhoheene röndë hë.
8 Abhantö bhayö bhakwihira mu-mighi ighya abhantö,
nkorebherra bharë obhoheene,
kya bhoora Yane na Yambure,
a bhaarebherranga Mosa.
Emetwe ighya abhantö bhayö ghyasareka,
bhaatigha ukukumya Waryobha.
9 Kasi tebharihika hasë hë,
ko bhoora ubhusheema ubhwabho mboremanywa na abhantö bhonswe igho,
kya igho yaarë ku Yane na Yambure.
Amaraghërryö agha Pauro ku-Timoteo
10 Kasi uwe waaghoota-ko amëëghyö aghaane,
eteemo iyaane,
ësëëmyö iyaane,
umukumo ughwane,
na ököghömërrya ukwane,
11 righonshe iryane na ököghömërrya ukwane.
Kora nomanyirë bhono abhantö bhaanyankyanga na okonteesa,
hano naarë mu-mighi gheera ghekobherekerwa igha Antiökia,
Iköniö na Risitira.
Ghwiki nomanyirë igha,
naaghömërrëëyi bhököngʼu amangʼana ghonswe igho ghano bhaankörëëyë,
kasi Omonene Yëësu akantöörya ko-ghonswe igho ghayö.
12 Mbe,
bhonswe igho bhano bhakukumya Kiristo Yëësu,
na bharatuna igha bhabhe na eteemo iya okosooka Waryobha,
bhonswe mbaranyankibhwinga.
13 Kasi abha ëbhëbhë na bhano bhakongʼaina abhantö,
mbarëghëndërrya bhököngʼu okokora ëbhëbhë,
mbarengʼainanga na okongʼainwa.
14 Kasi uwe,
noona obhoheene igha,
amangʼana ghano wëëghibhwa na-agha obhoheene.
Bhoono öghëndërri nagho,
ko bhoora nomanyirë bhano bhaakwëghëri.
15 Wamanya Amaandeko Amahörëëru ökërëngë moke.
Amaandeko ghayö,
nkokohaana gharë obhongʼaini bhono bhokoghera ömöntö ahönibhwa ku ukukumya Kiristo Yëësu.
16 Amaandeko Amahörëëru ghonswe igho nku-Waryobha ghaarwa.
Ku bhuyö amaandeko ghayö,
ngaingʼarëëyë ukwëghya abhantö obhoheene,
na okobhakaania okore bhatighe amangʼana amaghogho ghano bhakokora,
okobhakaania hano bhasarri,
na ököbhöörökya kera ëkëntö keno kingʼarëëyë Waryobha.
17 Amaandeko ghayö,
nkösëëmya gharë ömöntö uwa Waryobha okore atore okokora amangʼana amaiya ghyonswe igho.