Ritashandighi irya mbere irya Pauro
ku-Timoteo
Amakëërërryö
1
Ritashandighi reno nö-öni Pauro ndyandëkirë.
Öni no-motomwa uwa Kiristo Yëësu ndë.
Naanyoora obhotomwa bhuyö ko bhoora igha,
Waryobha Ömötöörya uwëëtö,
bhaana Kiristo Yëësu ono tukwesegha,
mbo bhaaraghërrëëyi igha,
mbe omotomwa uwa Kiristo Yëësu.
2 Timoteo nu-uwe nkwandekera.
Uwe m-maheene igha m-moona uwaane örë,
ku umukumo ghano tokosanga.
Örööbhö,
ikyabhera na omorembe ukurwa ko-Taata uwëëtö Waryobha na ku-Kiristo Yëësu Omonene uwëëtö,
bhebhe hamwë na uwe.
Ukwanga amëëghyö agha obhorongo
3 Hano naatanööyë ukurwa Ëfësö hayö nkaghya mo-mokowa ughwa Makedonia,
naakosaasaamirë igha wikare hayö,
okore okaani abhantö bhatighe ukwëghya amëëghyö agha obhorongo.
4 Obhakaani bhatakaaikërrya amaghano ghano ghataana ubhwera bhwobhwonswe bhoora,
na ököröndërrya amariina agha abhakörö,
nagho ghatakohwa röndë hë.
Amangʼana ghayö,
n-senkaani isyene igho ghakoreeta mo-bhantö.
Teghakötöörrya abhantö bhakumi Waryobha kya bhono ësëëmyö iyaaye iya ukutungurya abhantö ërë.
5 Ensonga iya amaraghërryö ghano ni-igha,
abhakumya bhahanshane,
kwa nkoro nshiiya,
amaitegherro amaiya na umukumo ughwa heene.
6 Kasi abhëëghya abhandë bhahaatëëyë ghayö,
bhaisyörri,
ghano bhakoghamba,
n-gano ghataana ubhwera.
7 Nkutuna bharë bhabhe abhëëghya abha amaraghërryö agha Mosa,
a nokaanyoora ghaara bhakoghamba na okokangʼasërrya,
tebhaghamanyërrëëyi hë.
8 Kasi bhëëtö ntomanyirë igha,
amaraghërryö agha Mosa m-buuya gharë,
hano ömöntö yakora bhwaheene kya bhono ghakutuna.
9 Ghwiki ni-igha ntomanyirë bhuuya igha,
amaraghërryö teghatöörëëywë-ho abhantö abha heene hë.
Kasi ghayö,
ngaatoorwa-ho ko okoghera iya abhantö bhano bhatakokora bhono amaraghërryö ghakutuna igha bhakore,
abhatëëyu,
abhamangarru,
abhasarya,
na ko bhano bhatakwighwera Waryobha,
abha ëbhëbhë,
abhaiti abha abhaibhöri abhaabho,
na abhaiti abha abhantö.
10 Amaraghërryö agha Mosa ghayö,
ngaatöörrwë-ho ko okoghera iya abhasooraare,
abhashaasha bhano bhakuturamya abhashaasha bharikyabho,
bhano bhakoghonyera abhantö,
bhabhaghoota,
bhaghya kobhaghörya,
abharongo,
na bhano bhakutyanera amangʼana agha obhorongo.
Amaraghërryö ngaatoorwa-ho ko okoghera iya amangʼana ghonswe igho ghano ghatakorengerrania na amëëghyö agha obhoheene.
11 Amëëghyö agha obhoheene,
gharëngë mo-Mangʼana Amaiya ghano ghakwörökya ubhuhika ubhwa Waryobha uwa obhongʼoore bhwonswe igho.
Amangʼana ghayö,
ngo naahaaywë na Waryobha igha,
ndaarekere abhantö.
Örööbhö urwa Kiristo Yëësu ko-Pauro
12 Nkukumya ndë Kiristo Yëësu Omonene uwëëtö.
Uyö we yaangʼaana singuru isya okoraareka Amangʼana Amaiya.
Keno kekoghera ndamukumya,
n-ko bhoora yaandööshë igha,
ningʼarëëyë okobha ömököri uwaaye uwa emeremo.
13 Nokaanyoora naamotokanga kora naateesanga abhantö abhaaye kare hayö,
na naarenga na ekeghaaka,
kasi Yëësu yaanyabhera.
Yaanyabhëëyë ko bhoora amangʼana ghayö naaghakörrë ko obhokangi ubhwane,
na ko bhoora ntaarë na umukumo.
14 Omonene Kiristo Yëësu yaansakërya örööbhö oronene,
kora akangʼaana umukumo na righonshe ko okobha hamwë nawe.
15 Engʼana eno nemanyekaini igha,
“Kiristo Yëësu yaaishirë ko-kebhara kono,
okore atööri abha ëbhëbhë.”
Obhoheene,
ni-igho amangʼana gharë,
ku bhuyö ni-igha abhantö bhaikërri.
Mo-bhantö abha ëbhëbhë,
öni wa ëbhëbhë ndë okokera bhonswe igho.
16 Kasi Yëësu Kiristo yaanyabhëëyë!
Yaanyöörökëri ököghömërrya ukwaye kya bhono körë ku-öni uwa ëbhëbhë okokera bhonswe igho.
Yaakörrë igho,
okore mbe ëkërëngyö ko-bhantö bhano bharaamukumi na ukunyoora öbhöhöru ubhwa amakora ghonswe igho.
17 Mbe,
Waryobha we Omokama ono ataana umuhiko,
takukwa hë,
takomaahekana hë,
taaho ono arëngë kya umwene uyö hë.
Asookwenga na ökötöönibhwa amakora na amakora.
Amina.
Pauro arahaana Timoteo amaraghërryö
18 Timoteo,
omoona uwaane ku-mukumo ghono tokosanga,
ndakoraghërrya ko okorengʼaana na amangʼana agha öbhörööti,
ghano ghaaghambirwë ku-uwe.
Amangʼana ghayö ghakötörri witane riihë irya emeremo ighya Waryobha bhuuya.
19 Onaghi umukumo ughwaho,
na obhe na amaitegherro amaiya.
Abhantö abhandë bhaasera okokora amangʼana ghano bhamanyirë igha n-ga heene,
ukwanga okokora ghayö,
kwaghera bhaatigha umukumo ughwabho.
20 Mo-bhantö bhayö,
bhaamo Himenayob na Arekisanda.
Naateghera Oghosambwac abhantö bhayö,
d okore bheeghe,
bhatakaatokanga Waryobha.