4
Ku bhuyö abhakumya bharikyëtö,
nembahanshirë,
kora nkwighomba ndë mbamaahe.
Bhëënyu mbo ukushomerwa ukwane,
na m-bëënyu ituho iyaane eno naahaanwa ko okoghera iya meremo gheno naakora.
Ni-igho ikutunwa igha bhaghonshe abhaane,
monaghe ko-Monene.
Pauro araraghërrya
2 Nkobhasaasaama ndë bhököngʼu Ewodia na Sintike igha,
mwighwerrane,
mobhe ikiina ëkëmwë,
ko bhoora bhëënyu bhonswe igho,
m-basoorani abha Omonene Yëësu mörë.
3 Kora uwe ömöntö uwa heene,
ömököri uwa emeremo murikyane,
ndakosabha ötöörri abhakari abhabhërë bhayö,
bhabhe ikiina ëkëmwë.
Bhayö bhonswe igho bhabhërë,
mbaarë na omotono bhököngʼu hamwë na öni ughwa okoraareka Amangʼana Amaiya agha Yëësu Kiristo ko-bhantö.
Ghwiki abhakari bhayö,
mbaakörrë emeremo hamwë na Kërëmënti na abhantö abhandë,
abhaköri abha emeremo bharikyane.
Amariina agha abhantö bhayö bhonswe igho,
ngaandëkirwë mo-Ketabho ikya Öbhöhöru.
4 Mushomerwenga nkaagha syonswe igho,
ko bhoora bhëënyu na-abha Omonene Yëësu mörë.
Ghwiki ndakyorra okoghamba igha,
mushomerwenga!
5 Obhohaabhu ubhwënyu bhomanyekane ko-bhantö bhonswe igho.
Omonene Yëësu haangʼë arë aashe.
6 Motakaanyankeranga engʼana yoyonswe eera,
kasi ko-ghonswe igho,
ni-igha mosaasaamenga na okosabha Waryobha keno mukutuna.
Hano mwamosaasaama,
mosangania ukumukumya.
7 Mbe,
hayö ho omorembe ukurwa ku-Waryobha ghono ghöhëtërëëyë obhongʼaini bhonswe igho ubhwa abhantö,
ghoraabhaikarre ghonaghi senkoro na sehakëri isyënyu,
ko bhoora bhëënyu,
m-bantö abha Kiristo Yëësu mörë.
8 Mbe,
bhoono abhakumya bharikyëtö,
amangʼana agha obhoheene,
amangʼana ghano ghaingʼarëëyi okosookwa,
amangʼana agha heene,
amangʼana ghano ghataraaishooghana na obhoghogho,
amangʼana ghano ghakushomera abhantö na amangʼana amaiya,
amangʼana ghano ghaingʼarëëyi,
na amangʼana ghano abhantö bhakukumya,
ghayö ngo amangʼana agha ukwitegherra mo-metwe ighyënyu.
9 Möghëndërri okokora amangʼana ghaara mweegha ku-öni,
mokaghaikërrya,
mokaghaighwa kora mokamaaha ndaghakora.
Hayö ho Waryobha ono akobhahaana omorembe,
araaghëndërri okobha hamwë na bhëënyu.
Pauro arakumya Abhafiripi
10 Mbe,
nshömëëywë bhököngʼu ko okoghootana ukwane na Omonene Yëësu,
ko bhoora ghwiki mokaambirë musimiri okontemera omotwe.
Nemanyirë igha,
sinsikö syonswe igho mwaantemeranga omotwe,
kasi mokabhorwa enshera iya okonhaheenera.
11 Motakaakanya igha,
obhohabhë bhono neenabho,
mbo bhokoghera ndaghamba amangʼana ghayö,
ti-igho hë.
Öni naamara ukwegha ukwiswa na keno ukunyoora neenakyo.
12 Keno nkoghamba ni-igha,
naamara ukwegha okomenya kinyabhötöbhu,
handë kinyabhwamë.
Neegha engʼana iya ukwiswa na amangʼana kya bhono gharë,
nekaabha enkaagha iya ukweghota handë okoramboka,
enkaagha iya okobha na ëbhëntö ibhyaru handë ukusuuhwa na ëbhëntö.
13 Nkotora ndë okokora ghonswe igho ghayö,
ko bhoora Kiristo we akongʼaana singuru isya okokora ghayö.
14 Nokaanyoora ni-igho ërë,
kasi m-buuya mwaakörrë okosanga na öni inyanko eno naarenga nayo.
15 Bhëënyu Abhafiripi momanyirë igha,
enkaagha eno mwaaighuurë urwa mbere Amangʼana Amaiya ghano naabharaarëkëëyë,
hano naaruurë mo-mokowa ughwënyu ughwa Makedonia,
ekanisa iyëënyu iyeene igho,
yo yaghootaini na öni ko amangʼana agha okohaahenerana.
16 Kora hano naarë mu-mughi ughwa Tësarönikë,
mwaandeteranga ëbhëntö ibhya ököntöörrya.
17 Motakaakanya igha nkobhatëëbhya ndë igho,
okore möghëndërri okondeetera ëbhëntö,
ti-igho hë.
Kasi keno nkutuna ni-igha,
Waryobha abhangʼoore okohetera ökösërëënia ukwënyu.
18 Bhoono ëbhëntö bhyonswe igho bheno mwaahaayë Epafurodito okondeetera,
naabhinyöörrë.
Kora ëbhëntö bhiyö m-byaru okokera obhohabhë ubhwane.
Ekehaheeno kiyö kyabha ikimwenso keno kikurumbaasa bhuuya,
keno kikwikërërribhwa na okongʼarra Waryobha.
19 Mbe,
Waryobha uwaane naraabhahaane ghonswe igho ghano moonagho obhohabhë,
okorengʼaana na ubhwamë ubhwaye obhonene.
Naraakore igho ko okohetera ku ubhuhika ubhwa Kiristo Yëësu.
20 Waryobha Taata uwëëtö,
atöönibhwi amakora na amakora!
Amina!
Amakëërërryö agha okomarërrya
21 Mökëëri abhantö abha Waryobha bhonswe igho bhano bhakukumya Kiristo Yëësu.
Abhakumya bhano bhakutighinkana hamwë na öni hano,
bhonswe bharabhakëërya.
22 Kora abhantö abha Waryobha bhonswe igho bhano bhamënyirë mu-mughi ghono,
bharabhakëërya,
ekenene m-baara abha yeeka wa Kaisaari.a
23 Örööbhö urwa Omonene uwëëtö Yëësu Kiristo robhe hamwë na bhëënyu bhonswe igho.