Pauro araitengʼera Kiristo
3
Mbe,
bhoono abhakumya bharikyëtö,
nkobhatëëbhya ndë igha,
mushomerwe ko bhoora m-bantö abha Omonene Yëësu mörë.
Tenkorosa ukukyorra amangʼana ghaara naabhandëkëëyë,
ko bhoora amangʼana ghayö,
ngo orobhagho urwa umukumo ughwënyu.
2 Mwiyangarre na abhantö abhaghogho bhano bhakösöhya amaraghërryö agha Mosa mo-kanisa iyëëtö,
ko bhoora bhakokangʼasërrya igha,
abhantö bhano bhakutuna okobha Abhakiristo ni-igha bhasaarwe.
3 Bhëëtö ko bhoheene m-bëëtö abhantö abha Waryobha ko bhoora Umwika Ömöhörëëru nkötötöörrya arë okosengerra Waryobha.
a Kiristo Yëësu we tukwikumirya na ukwesegha.
Titukwesegha amangʼana aghëëtö agha kinyamöbhërë igha ngo ghakotohaana öbhötöörya,
4 kora öni umwene,
neena engʼana iya ukwesegha kinyamöbhërë.
Kasi nyoore aaho ömöntö ono akwimaaha igha aana amangʼana agha kinyamöbhërë,
ghano ghaingʼarëëyi ukweseghwa,
öni nenagho amaaru agha ukwesegha okomokera.
5 Hano naibhööywë,
naamarrë sinsikö muhungatë,
urwa monaane nkasaarwa.
Öni nu-Mwisiraëri ndë,
uwa ekesaku ikya Bhenjamini,
Umwëbhuraania ekenaina.
Ko okoghoota amaraghërryö agha Mosa,
öni naaghaghöötirë bhuuya,
ko bhoora m-Mofarisaayob naarë.
6 Naarenga na omotono ko-mangʼana ghaara naakanyanga igha,
ngo Waryobha akutuna,
ku bhuyö nkateesa Abhakiristo.
Ko obhoheene ubhwa okoghoota amaraghërryö,
tenaarenga na risoro ryoryonswe igho hë.
7 Kasi,
ghonswe igho ghano naitengʼeranga igha ngaana ubhwera,
bhoono igho nkoghamaaha ndë igha teghaana ubhwera hë,
ko okoghera iya öbhömwë ubhwane na Kiristo.
8 Kora te-ghayö agheene igho hë,
kasi nkomaaha ndë igha,
kera ëkëntö tekeena ubhwera hë,
hano nakerengʼania na ehoorohooro iya okomanya Kiristo Yëësu,
Omonene uwaane.
Ko bhoora naahaatera ghonswe igho ghayö,
ko okoghera iyaaye.
Nkoghamaaha ndë igha,
ghayö n-kya amatokoore,
okore mbe ömöntö uwa Kiristo.
9 Ghwiki ni-igha ngootane nawe këmwë.
Tinkwitengʼera ghwiki ukunyoora obhoheene ubhwane ko okoghera iya ököröndërrya amaraghërryö,
kasi Waryobha yaamara okoghamba igha,
m-möntö uwa heene ndë ko okoghera igha,
neneena umukumo ku-Kiristo.
Obhoheene bhuyö,
nku-Waryobha bhukurwera,
bhuusha ko bhaara bhakukumya Kiristo.
10 Nkutuna ndë mmanye Kiristo bhököngʼu,
mbe na obhotoro ubhwa ukuryoka ukwaye.
Mbe na öbhömwë nawe,
nteseke na ukukwa kya igho ghaaikörrë ku-Kiristo.
11 Nkutuna ndë amangʼana ghayö,
okore mbe mo-bhantö bhaara Waryobha ariryökya ukurwa mo-bhaku.
Ököghömërrya okohekera umuhiko ughwa emeremo
12 Öni tinkwihasha igha naamara okokora ghonswe igho ghayö,
handë igha Waryobha yaamara okonkora igha m-möntö uwa heene ndë këmwë,
ti-igho hë,
kasi nkwiköngʼërrya ndë,
okore nnyoore ghayö.
Ko bhoora ghayö ngo Kiristo Yëësu yaamberekerra.
13 Abhakumya bharikyëtö,
tinkwibhara igha naamara koghoota amangʼana ghayö.
Ëkëntö ëkëmwë keno nkokora,
nu-kutigha ukwitegherra ghano ghaaheta,
kasi ndaiköngʼërrya,
okore nnyoore ghano gharëngë mbere.
14 Nkwiköngʼërrya ndë nhike ku-muhiko,
okore ntuhwe ituho iyaane.
Ituho iyö,
yo Waryobha akobherekerra abhantö mu-ryobha,
ko okohetera ku-Kiristo Yëësu.
15 Ku bhuyö bhëëtö bhonswe igho abhahangarru abha umukumo,
ni-igha twikererrani ko-mangʼana ghayö.
Nyoore moona amaitegherro ghano ghatanga kya ghayö ngambirë,
Waryobha naraabhahonyorre moghamanye bhono gharë.
16 Bhoono engʼana enene,
ni-igha toghoote amangʼana ghaara Waryobha yaatwörökya.
Abhakumya bheeghe eteemo iya Pauro
17 Abhakumya bharikyëtö,
mweghe eteemo iyaane.
Mosoorane bhano bhaana eteemo kya eno mwaamaaha kö-bhëëtö.
18 Naamara okobhatëëbhya hare kaaru engʼana eno nkutuna okoghamba,
tigha ghwiki ngikyorre na eno ndakuura amaisöri,
bhaaho abhantö abhaaru,
bhano bhakwanga amangʼana agha öbhötöörya ubhwa Kiristo,
bhono bhwaamaahekana ko-mosarabha.
19 Abhantö bhayö mbarekamba bhasikibhwi,
ko bhoora bhaakora igha,
oronamba urwabho ndwo waryobha uwaabho.
Amangʼana agha sënsöni ghano bhakokora igha ngo bhakwiheemera.
Amangʼana ghano bhakwitegherra na-agha ko-kebhara kono.
20 Kasi bhëëtö,
m-bantö abha mu-ryobha törë,
kora nkwitengʼera törë bhököngʼu ukuusha ukwa Ömötöörya,
Omonene uwëëtö Yëësu Kiristo.
21 We aana obhotoro ubhwa okotoora ëbhëntö bhyonswe igho,
bhebhe hansë iya öbhötöngi ubhwaye.
Ko obhotoro bhuyö,
narisyörya ëmëbhërë ighyëtö ëmëtëntëëru gheno,
ghebhe na ubhuhika kya bhoora ömöbhërë ughwaye ghörë.