Abhagharatia 3

Abhakumya nkohaanwa bharë Umwika Ömöhörëëru ku umukumo ughwene igho

Bhëënyu bhare Bhagharatia, m-bakangi mörë! Nawë yaabharogha? Rëndë mbe naabharaghërrëëyi bhuuya amangʼana agha Yëësu Kiristo kya igho yaahanëkirwë ko-mosarabha. 2 Bhoono tigha mbabhööri-ko engʼana. Mwaanyöörrë Umwika Ömöhörëëru ko okoghera iya okoghoota amaraghërryö agha Mosa kasi n-ko okoghera ukwa ukwitegherra Amangʼana Amaiya agha Yëësu na okoghakumya? 3 N-kwakë mokangëhirë igho? Bhëënyu mwaasyora rimenya iryënyu ku singuru isya Umwika Ömöhörëëru, kasi bhoono moratuna igha momarërri ku singuru isyënyu abheene! 4 Kasi, inyaanyi eera yonswe igho eno yaabhanyoora, nkokanya mörë igha ya bhosa yaarë? Tiyaarë iya bhosa hë! 5 Bhoono möntëëbhi, kanaa, Waryobha yaabhahaana Umwika Ömöhörëëru na okokora amakono mö-bhëënyu ko okoghoota amaraghërryö agha Mosa, kasi n-ko okoghera iya ukwitegherra Amangʼana Amaiya agha Yëësu na okoghakumya?

6 Mwitegherre ko amangʼana agha Ibhurahimu. Amaandeko Amahörëëru nkoghamba gharë igha, “Yaakumiri Waryobha, kiyö nkyo kyaaghërrë Waryobha akamobhara igha wa heene.” 7 Bhoono bhëënyu momanye igha, abhantö bhano bhakukumya Waryobha, mbo abhaana abha obhoheene abha Ibhurahimu! 8 Amaandeko Amahörëëru ghaaghambirë igha, Waryobha nakaabharrë igha, Abhakyaro m-bantö abha heene okohetera ku umukumo ughwabho. Waryobha yaatangatirë okoraareka amangʼana agha Ibhurahimu ukurwa kare igha, “Okohetera ku-uwe, abhantö abha ibhyaro bhyonswe igho, mbarengʼoorwa.” 9 Mbe, bhaara bhakukumya Waryobha, nkongʼoorwa bharë kya bhoora Ibhurahimu ono yaangʼöörrwë ko bhoora yaamukumiri.

Tötööriibhwi ukurwa ku-riragha irya amaraghërryö agha Mosa

10 Kasi bhonswe igho bhano bhakwesegha ökötööribhwa ko okokora ghano ghakutunwa na amaraghërryö, bhayö mbaana riragha. Ko bhoora Amaandeko Amahörëëru nkoghamba gharë igha, “Ömöntö wowonswe ono atakoghoota na okokora ghonswe igho ghano ghandëkirwë mo-ketabho ikya amaraghërryö, yaihiimwa.” 11 M-maheene, taaho ömöntö ono Waryobha akobhara igha, nu-uwa heene ko okoghera iya okoghoota amaraghërryö, ko bhoora Amaandeko Amahörëëru nkoghamba gharë igha, “Ömöntö uwa heene, naremenyanga mu-mukumo ughwaye ghono aanagho.” 12 Amaraghërryö agha Mosa, teghakwisegha umukumo hë, kasi nkwesegha gharë amangʼana agha ömöntö ghano akokora, kya bhono Amaandeko Amahörëëru ghakoghamba igha, “Ömöntö wowonswe igho, ono akoghoota amaraghërryö, ni-igha akore bhono ghakutuna kö-bhömënyi ubhwaye bhwonswe igho.”

13 Kiristo yaatutungurya ukurwa mu-riragha irya amaraghërryö, yaakörrë igho, ko okoghegha riragha riyö ko okoghera iya bhëëtö, ko bhoora Amaandeko Amahörëëru gharaghamba igha, “Ömöntö wowonswe igho ono ahanëkirwë ko-mosarabha, yaihiimwa.” 14 Yaatutungurya okore obhongʼoore bhono Ibhurahimu yaahaaywë, bhohekeere Abhakyaro okohetera ku-Kiristo Yëësu. Mbe, bhoono bhëëtö bhonswe igho nkotora törë kunyoora Umwika Ömöhörëëru, ono Waryobha yaaraghaini okotohaana ko enshera iya ukukumya Kiristo.

Amaraghërryö agha Waryobha ko-Mosa na riraghano irya Waryobha ku-Ibhurahimu

15 Abhakumya bharikyëtö, tigha mbarëngëri-ko engʼana. Toghambe igha bhaaho abhantö bhabhërë bhaikererraini ko engʼana nyabhorebhe. Hano oraanyoore bharëëyë imuuma na okotoorwa esaini, taaho ömöntö uwa ukwanga handë ukwëngërya engʼana nyabhorebhe ku-muuma iyaabho iyö hë. 16 Mbe, Waryobha yaaraghaini Ibhurahimu ghuuka uwëëtö, hamwë na umwebhorwa uwaaye. Amaandeko Amahörëëru teghakoghamba igha, “Na abheebhorwa abhaaye,” ensonga yaamo ni-igha, te-bhaaru hë, kasi ni-igha, “Na umwebhorwa uwaaye,” ensonga yaamo ni-igha nö-ömwë, we Kiristo. 17 Keno nkutuna mbatëëbhi ni-igha, Waryobha yaakörrë imuuma iyaaye imyoka maghana ane na merongo etatö amaraghërryö agha Mosa ghataraabha. Ku bhuyö amaraghërryö ghayö teghaatore okosarya imuuma iyö, handë ukusyörya riraghano reno yaaraghaini. 18 Singa umwandö ughwa Waryobha ghoraitengʼera amaraghërryö, ghwiki teghokaaitëngʼëëyë riraghano iryaye hë. Kasi Waryobha kö örööbhö urwaye, yaaraghaini okohaana Ibhurahimu umwandö okohetera ku-riraghano iryaye iryene igho.

19 Bhoono amaraghërryö n-ga moremo kë? Amaraghërryö ngaatöörrwë-ho, ko okoghera iya obhosarya, okohekera hano umwebhorwa Ibhurahimu ariisha, ono Waryobha yaaraghaini igha nariisha. Waryobha yaahaayë Mosa amaraghërryö okohetera ko maraika. Ku bhuyö Mosa akabha ghatëghatë ko okoghera iya ukwighwerrania abhantö na Waryobha. 20 Umwighwerrania nkutunwa arë hano waanyoora sembaara ibhërë serakora riraghano. Kasi Waryobha nö-ömwë igho, nu-mwene we yaakora riraghano na Ibhurahimu, umwighwerrania ataaho.

21 Kasi, amaraghërryö nkwangana gharë na ghano Waryobha yaaraghania? A a, ti-igho hë! Ko bhoora singa yaare-ho enshera eno ekohaana abhantö öbhöhöru, mbe, hayö bhoono ho Waryobha akaatobharrë igha, m-ba heene törë, okohetera ko-maraghërryö. 22 Kasi bhoono ti-igho ërë hë. Amaandeko Amahörëëru gharaghamba igha, abhantö bhonswe igho, mmö-bhötöngi ubhwa ëbhëbhë bharë. Ku bhuyö Waryobha yaaraghaini okobhahaana keno yaaraghaini okohaana bhonswe igho bhano bhakukumya Yëësu Kiristo.

23 Hano waanyöörrë abhantö bhataraabha na umukumo ughwa ukukumya Yëësu Kiristo, amaraghërryö ngaatökörrë kya abhaghorwa, twaaghanyanga okohonyorwa ukwa umukumo ghuyö. 24 Mbe amaraghërryö ghayö ghaatotangata na ukututugha kya umutughi, okohekera hano Kiristo yaaishirë. Ku bhuyö ko okohetera ku umukumo, tobharwe mö-bhöntö ubhwa heene. 25 Kasi ko bhoora bhoono umukumo ghoora ghuhikirë, ku bhuyö tëtökërëngë mo-mabhoko agha umutughi uwëëtö, amaraghërryö.

26 Ku bhuyö bhëënyu bhonswe igho m-baana abha Waryobha mörë okohetera ku umukumo, ko bhoora igha, moghootaini na Kiristo Yëësu. 27 Bhëënyu bhonswe igho bhano mwaabhatiisibhwa, mwaghootana na Kiristo, mwabha kya bhano mötöörrë Kiristo. 28 Mbe, Umuyahudi na ömöntö ono atarë Umuyahudi, bhonswe igho n-këntö këmwë, omoghorwa bhaana ömötöönööni, umushaasha na omokari, bhonswe igho n-këntö këmwë mörë, ko bhoora moghootaini na Kiristo Yëësu. 29 Hano oraanyoore igha, bhëënyu m-ba Kiristo mörë, mbe na-bheebhorwa Ibhurahimu mörë, murinyoora umwandö ghoora Waryobha yaaraghaini.