Abhatomwa abha Yërusarëëmu bharakumya amëëghyö agha Pauro
2
Hano imyoka ikömi na inye ghyaahëtirë,
nkatiira ghwiki ukughya Yërusarëëmu.
Naahinaini na Bharinaabha,
nkaghegha na Tiito wonswe tokahinana nawe.
2 Naatiirrë ukughya Yërusarëëmu ko-nkaagha iyö,
ko bhoora Waryobha yaanhönyörrëëyë igha ngende-yo.
Hano naahikirë-yo nkaikara righara na abhatomwa,
nkabhatëëbhya Amangʼana Amaiya ghano naaraarekanga ko-Bhakyaro.
Naakörrë igho,
okore emeremo ighyane ghiyö naakörrë,
na ghiyö naakoranga,
ghetakaaheta bhosa.
3 Bhakaikererrania na öni.
Kora tebhasingʼirriyi murikyane Tiito igha asaarwe,
nokaanyoora m-Muyunaani yaarë.
4 Engʼana iya okosaarwa iyö,
yaabhöriibhwi na abhantö bhano bhaaikoranga igha m-basoorani abha Yëësu,
kasi mbaaibhumburrë-mo kwa bhongʼaini,
okore bhaitaahe öbhötöönööni ubhwëtö bhono Kiristo Yëësu yaatohaana.
Keno bhaatunanga,
no-kotokora tobhe abhaghorwa abha amaraghërryö agha Mosa.
5 Tetwaikererraini nabho kora hake hë.
Twaakörrë igho,
okore torende obhoheene ubhwa Amangʼana Amaiya bhöghëndërri kobha kya igho bhörë kö-bhëënyu hayö.
6 Kasi abhatomwa bhaara bhaamanyekaini ko-bhantö,
tebhaarë na engʼana yoyonswe igho eehya iya ököntëëbhya hë.
M-boheene igha,
mbaasöökwanga bhököngʼu.
Nokaanyoora ni-igho yaarë,
kasi öni tëntöniibhwi hë,
ko bhoora Waryobha tatöniibhwi na ikyeo ikya möntö hë.
7 Mbe,
abhatangati bhakangʼura igha,
Waryobha yaantoma ndaarekere Abhakyaro Amangʼana Amaiya agha Yëësu,
kya bhono yaatoma Peetero araarekere Abhayahudi.
8 Mbe,
Waryobha ono yaakörrë Peetero abhe omotomwa ko-Bhayahudi,
we uyöuyö yaankörrë na öni wonswe nkabha omotomwa ko-Bhakyaro.
9 Mbe,
Yaakobho bhaana Peetero na Yohana,
bhano bhaamanyekaini igha mbo abhatangati abhanene,
bhakamanya bhuuya igha,
Waryobha we angʼaayë emeremo ghiyö kö örööbhö urwaye.
Ku bhuyö bhakatoghoota okobhoko öni na Bharinaabha,
ukwörökya igha ntoona öbhömwë nabho.
Ntwaaikererraini igha,
bhëëtö toghende okokora emeremo ko-Bhakyaro,
bho bhatighare ko-Bhayahudi hayö.
10 Abhatangati bhayö,
bhaatosabhirë engʼana ëmwë igha,
tuhiitenga abhatöbhu mo-bhakumya abha Yërusarëëmu haara.
Engʼana iyö,
nkoghetonerra ndë bhököngʼu.
Pauro arabheeha Peetero
11 Mbe,
hano Peetero yaaishirë Antiökia,
naamöbhëëhirë harabhu igho,
ko bhoora yaarenga asarri.
12 Peetero yaasanganga ibhyakorya hamwë na abhakumya Abhakyaro.
Urusikö urwöndë,
abhantö nyabhorebhe ukurwa ku-Yaakobho bhakaasha.
Hano abhantö bhayö bhaahikirë,
akaiyahora ukurwa mo-bhakumya Abhakyaro,
akakyora nyuma.
Yaakörrë igho ko bhoora yööbhöhirë abhantö bhaara bhaakangʼasërryanga igha,
abhakumya bhonswe igho,
ni-igha bhasaarwe tangata.
13 Mbe,
kora abhakumya abhandë nyabhorebhe abha Ikiyahudi,
bhakakora kya bhuyö Peetero yaakörrë,
kora Bharinaabha wonswe akaghootwa-ko na ubhwihunaania ubhwabho bhuyö.
14 Mbe,
hano naarööshë igha tebhakokora bhono obhoheene ubhwa Amangʼana Amaiya bhörë,
nkatëëbhya Peetero harabhu igho igha,
“Uwe nu-Muyahudi örë,
kasi nkokoranga örë amangʼana kya bhono Abhakyaro bhakokora.
N-kwakë bhoono ukusingʼirrya Abhakyaro igha bhaghoote seteemo isya Abhayahudi?”
Bhonswe igho nkötööribhwa törë// okohetera ukukumya Yëësu Kiristo
15 M-boheene igha bhëëtö m-Bayahudi törë,
tetonga kya Abhakyaro bhano tokobherekera igha “Abhaköri abha ëbhëbhë.”
16 Kasi bhëëtö ntomanyirë obhoheene igha,
taaho ömöntö ono akobharwa na Waryobha igha wa heene ko okoghera iya okoghoota amaraghërryö agha Mosa hë.
Kasi ukukumya Yëësu Kiristo ukwene igho,
nkwo kokoghera ömöntö abharwa na Waryobha igha,
nu-uwa heene.
Ku bhuyö na bhëëtö bhonswe ntwaakumya Yëësu,
okore tobharwe igha m-bantö abha heene törë ko okoghera iya ukukumya Yëësu,
te-ko okoghoota amaraghërryö agha Mosa hë.
Obhoheene ni-igha,
okohetera okoghoota amaraghërryö agha Mosa,
taaho ömöntö ono akobharwa igha uwa heene ku-Waryobha hë.a
17 Bhëëtö nkutuna törë Waryobha atobhare igha m-bantö abha heene törë okohetera ku-Kiristo,
kasi abhantö abhandë nkoghamba bharë igha,
bhëëtö m-baköri abha ëbhëbhë törë.
Mbe,
bhoono Kiristo nkotokora arë okobha abha ëbhëbhë?
A a,
ti-igho hë!
18 Kasi hano ndaakyorre ukukumya ësëëmyö eera iya kare,
iya okoghoota amaraghërryö,
ësëëmyö eera nanga,
hayö bhoono noraanyoore nsarri.
19 Ko bhoora naaghootanga amaraghërryö agha Mosa ghayö,
kasi bhoono igho,
tenkoghoota amaraghërryö ghayö hë.
Waryobha yaanduusya mo-kebhohe kiyö,
okore nkorenga bhono akutuna.
20 Esemoko iya öbhöhöru ubhwane bhoora ubhwa kare,
mbwaahanekwa hamwë na Kiristo ko-mosarabha.
Bhoono m-möhöru ndë,
kora tö-öni hë,
kasi Kiristo we öbhöhöru ubhwane bhono bhörëngë ku-öni.
Öbhöhöru bhono neenabho enkaagha eno,
nneenabho ku ukukumya Omoona uwa Waryobha.
b Omoona uwa Waryobha uyö yaanhanshirë,
akairuusya öbhöhöru ubhwaye,
akantöörya.
21 Tentore ukwanga örööbhö urwa Waryobha hë.
Nyoore ömöntö nkobharwa arë igha wa heene,
ko okoghoota amaraghërryö agha Mosa,
bhoono hayö toghambe igha,
ukukwa ukwa Kiristo n-kwa bhosa!