Ukushongerana ukwa abhakumya
6
Hano ömöntö mö-bhëënyu muyö yaabha na engʼana na umukumya murikyaye,
n-kwakë ahire ikiina ikyaye kiyö ko-bhantö bhano bhatarë abhakumya?
N-kwakë atakuhira ikiina kiyö ko-bhahörëëru abha Waryobha?
2 Kasi motamanyirë igha abhahörëëru abha Waryobha mbo bharebhotorra ikiina ekebhara keno?
Mbe,
hano okomaaha igha m-bëënyu morebhotorra ekebhara keno ikiina,
n-kwakë motakomara abheene ibhiina ibhyënyu ebheke bhiyö?
3 Temomanyirë igha morebhotorra ikiina abhamaraika?
Ku bhuyö ni-igha momarenga amangʼana aghëënyu bhëënyu abheene.
4 Mbe,
hano mwanga ukwighwerrana,
n-kwakë mukuhira ibhiina ibhyënyu ko-bhantö bhano bhatarëngë abha ekanisa igha bhabhaahokani,
kora tebhakosookwa na ekanisa hë?
5 Nengambirë igho,
okore mbasöökërri.
Nköbhöörya ndë igha,
mö-bhëënyu muyö,
taamo ömöntö uwa obhongʼaini kora ömwë hë,
ono akotora ukwahokania amangʼana agha ibhiina ibhya abhakumya bharikyaye hë?
6 N-kwakë motakwahokania ibhiina ibhyënyu abheene?
Nkoroghoora ndë igha nkughya mörë ukushongerana ko-bhantö bhano bhatakukumya Waryobha!
7 Ukushongerana kuyö nkwörökya körë igha,
mwakerwa këmwë.
Kasi temokomaaha igha,
nyakara utighe ömöntö akokorre obhoghogho,
handë akuruusi ëbhëntö ibhyaho?
8 Kasi bhoono bhëënyu,
mbo mokokorra obhoghogho na ukuruusya abhantö ëbhëntö ibhyabho,
moraruusya kora abhakumya bharikyënyu.
9 Kasi,
motamanyirë igha abhaköri abha amangʼana amaghogho,
tebharerya umwandö ughwa Obhokama ubhwa Waryobha hë?
Motakaingʼaina,
abhasooraare,
handë bhano bhakosengerra ëbhëtöndö,
abha sintwara,
abhashaasha bhano bhakuturamya abhashaasha bharikyabho,
10 abhaibhi,
abha oronamba,
abharëëbhi,
abha amatöki,
na abhasaki,
tebharerya umwandö ughwa Obhokama ubhwa Waryobha hë.
11 Abhandë mö-bhëënyu muyö,
ni-igho mwaarë.
Kasi bhoono mwoghibhwa obhoghogho ubhwënyu,
mwahorwa,
mokakorwa abha heene okohetera ku iriina irya Omonene uwëëtö Yëësu Kiristo,
na ku-Mwika uwa Waryobha uwëëtö.
Abhakumya bhatakaakora obhosooraare
12 Abhantö abhandë bharaghamba igha,
“Ëbhëntö bhyonswe igho m-buuya bhërë ku-öni,”
kasi öni ndaghamba igha,
te-bhyonswe igho bheena ehoorohooro hë.
Ghwiki nkoghamba bharë igha,
“Ëbhëntö bhyonswe igho m-buuya bhërë ku-öni,”
kasi öni tentore okobha omoghorwa uwa ëkëntö kyokyonswe igho hë.
13 Abhantö abhandë bharaghamba igha,
enda n-ko okoghera iya ibhyakorya,
na ibhyakorya n-ko okoghera iya enda.
a Kasi bhyonswe igho bhibhërë bhiyö,
enda na ibhyakorya,
Waryobha naribhiruusya-ho.
Kasi ömöbhërë te-ko okoghera iya obhosooraare hë,
kasi n-ko okoghera iya Omonene uwëëtö,
na Omonene n-ko okoghera iya ömöbhërë.
14 Waryobha narituryökya ko obhotoro ubhwaye kya bhono yaaryökëri Omonene Yëësu Kiristo ukurwa mo-bhaku.
15 Kasi temomanyirë igha ëmëbhërë ighyënyu,
ni-myaho ighya Yëësu Kiristo?
Mbe,
bhoono ngeghe imyaho ighya Yëësu Kiristo ngekore ghebhe imyaho ighya omosooraare?
A a,
ti-igho hë!
16 Temomanyirë igha ömöntö wowonswe igho ono yaghootana na omosooraare,
yaabha ömöbhërë öghömwë nawe?
N-kya bhono yandëkirwë mo-Maandeko Amahörëëru igha,
“Abhabhërë bhayö,
nkobha bharë kya ömöbhërë öghömwë.”b
17 Kasi ömöntö ono yaghootana na Omonene,
uyö nkobha arë enkoro ëmwë nawe.
18 Ku bhuyö ni-igha mongʼose obhosooraare.
Ëbhëbhë ibhyëndë bhyonswe igho bheno ömöntö akokora,
n-kebhara iya ömöbhërë ughwaye bhërë,
kasi ömöntö ono akokora obhosooraare,
uyö nö-möbhërë ughwaye umwene akokorra obhosarya.
19 Kasi,
temomanyirë igha,
ëmëbhërë ighyënyu ngyo inyumba iya Waryobha,
mono amënyirë Umwika Ömöhörëëru ono mwaahaanwa na Waryobha?
Tëghërëngë ighyënyu hë,
20 ko bhoora mmwaghörrwë öbhöghöri obhonene.
Ku bhuyö ni-igha mötööninga Waryobha okohetera kö-mëbhërë ighyënyu ghiyö.