Obhosooraare tibhukutunwa mo-kanisa hë
5
M-boheene,
amangʼana ghaatohekeera igha,
obhosooraare bhörëngë mö-bhëënyu muyö.
Obhosooraare bhuyö,
m-bono bhotakaamaahekaini kora ko-bhantö bhano bhatamanyirë Waryobha.
Obhosooraare ubhwa ömöntö okotaara na mokaa suwaabho.
2 Bhëënyu moraihashera engʼana iyö.
Nyakara mokaabhaabhayëëyë na mughire ömöntö uyö yaakora ghayö,
arwe mö-bhëënyu muyö.
3 Nokaanyoora ndëngë hare,
kasi enkoro iyaane hamwë ërë na bhëënyu.
Öni naamara okomobhotorra ikiina ömöntö uyö yaakora ghayö,
kya hano nkaabhaayë hamwë na bhëënyu hayö.
4 Hano mwaikomania hamwë ku iriina irya Omonene uwëëtö Yëësu Kiristo,
öni wonswe nkunyoora örë enkoro iyaane n-hamwë ërë na bhëënyu.
Kora na obhotoro ubhwa Yëësu Kiristo bhwonswe,
nkunyoora örë hamwë bhörë na bhëënyu.
5 Ni-igha mohaane Oghosambwaa ömöntö uyö,
okore esemoko iyaaye iya öbhököri ubhwa ëbhëbhë,
isikibhwi,
b kasi enkoro iyaaye ëtööribhwi urusikö urwa ukukyora ukwa Omonene Yëësu Kiristo.
6 Ikiheemere ikyënyu tekeena ubhwera hë.
Temomanyirë igha ehamiira enke igho,
nkötöndörya ërë ekerengo kyonswe igho ikya obhose?
7 Ku bhuyö mwisaabhuure,
ku ukuruusya ömöntö omoghogho uyö mö-bhëënyu,
kya hano ömöntö yaruusya-mo ehamiira iya kare.
Hayö bhoono ho moraabhe ekerengo ekehya,
kya bhono motaarenga-mo na ehamiira iya kare.
Ko bhoora Waryobha yaakörrë Yëësu Kiristo akabha Omoona Ringʼöndi uwa Epasakac iyëëtö,
yaamara ukuruusibhwa akabha ikimwenso ko okoghera iya bhëëtö.
8 Mbe,
totakaakora inyangi iya Epasaka na eno ehamiira iya kare eemo,
ensonga yaamo ni-igha,
obhoghogho na ëbhëbhë.
Kasi tobhenga torakora inyangi ko emekaate gheno ghetakotoorwa-mo ehamiira,
ghayö,
n-senkoro sendabhu bheena obhoheene.
9 Naabhandekera mu-ritashandighi iryane igha,
motakaaghootana hamwë na abhasooraare.
10 Tenkoghamba igha motakaaghootana na abhasooraare abha ko-kebhara kono,
handë abhahiti,
handë abhasaki,
handë abhasëngëri abha ëbhëtöndö.
Mbe,
hayö nekaabhaayë igha,
murwe ko-kebhara kono.
11 Kasi naabhandëkëëyë igha,
motakaaghootana na ömöntö ono okobherekerwa igha umukumya murikyënyu,
hano oraanyoore m-mosooraare,
umuhiti,
handë ömösëngërri uwa ëbhëtöndö,
handë ömötöki,
handë ömörëëbhi,
handë omosaki.
Ömöntö kya uyö,
motakaasanga nawe kora ibhyakorya.
12 Bhoono m-moremo ughwane okobhotorra ikiina abhantö bhano bharëngë kebhara?
Te-meremo ighyënyu okobhotorra ikiina bhayö moonabho muyö?
13 Bhayö bharëngë kebhara,
Waryobha umwene we arebhabhotorra ikiina.
Kasi bhëënyu mobhotorre ikiina abhantö bhano bharëngë mo-kanisa,
kya bhono Amaandeko Amahörëëru ghakoghamba igha,
“Muruusi ömöntö omoghogho uyö arëngë mö-bhëënyu muyö.”d