Waryobha taraatigha Abhaisiraëri hë
11
Bhoono nköbhöörya ndë igha,
Waryobha yaasendeka hayö abhantö abhaaye?
A a,
ti-igho hë!
Öni umwene m-Mwisiraëri ndë,
umwebhorwa uwa Ibhurahimu,
uwa ekabhira iya Bhenjamini.
2 Waryobha tiyasendeka hayö abhantö abhaaye bhano yaashaaghööyë kora ekebhara ketaraabhombwa.
Kanaa,
mmotamanyirë kya bhono Amaandeko Amahörëëru ghakoghamba ko amangʼana agha Ëriya,
agha ikikuuro ikyaye ku-Waryobha,
ko okoghera iya Abhaisiraëri?
3 Yaaghambirë igha,
“Omonene,
abhantö bhano,
bhaaita abharööti abhaaho,
bhakasarya ahasë aha ukukumwensera,
nö-öni umwene igho ntighaayë,
kora öni wonswe nkutuna bharë igha bhaanyite!”a
4 Kasi Waryobha iyakë yaamöhönshööyë?
Yaamöhönshööyë igha,
“Naisaaghërya abhantö ëbhëkwë muhungatë Isiraëri hano,
bhano bhatakosengerra Bhaari.”b
5 Kora bhoono igho honswe,
ni-igho ërë,
abhantö m-bake igho bhaatighara,
bhano Waryobha yaahora kö örööbhö urwaye.
6 Örööbhö urwa Waryobha ndo rwaaghërrë akabhaahora,
ku bhuyö tomanye igha,
tebhakötööribhwa na amangʼana aghaabho ghano bhakokora.
Ko bhoora hano okaanyöörrë igha amangʼana aghaabho ghano bhakokora ngo ghakobhatöörya,
hayö örööbhö urwa Waryobha terokaabhaayë na ubhwera hë.
7 Ku bhuyö amangʼana ngarëngë igha,
Abhaisiraëri bhaatunirë enshera iya okobharwa igha m-ba heene,
kasi tebhaghinyöörrë hë.
Bhano bhaanyöörrë enshera iya okobharwa igha m-ba heene,
m-baara Waryobha yaahööyë abheene igho.
Abhandë bhonswe igho bhano bhaatighaayë,
akabhakora bhabhe na emetwe ëmëköngʼu.
8 Amangʼana ghayö n-kya bhono Amaandeko Amahörëëru ghakoghamba igha,
“Waryobha yaabhakörrë bhakabha kya bhano bhaihiriibhwi,
yaabharibhirë amaiso,
okore bhatakaamaaha,
kora akabharibha na amatwë,
bhatakaighwa,
nanyabhoono ni-igho bharë.”c
9 Kora omokama Daudi yaaghambirë igha,
“Hano bharekora sinyangi isyabho,
Waryobha narisisyörya sebhaghashani
sebhe omotegho ughwa okobhaghöötya,
bhashibhibhwi.
10 Amaiso aghaabho ghamwame,
okore bhatakaamaaha,
emeghongo ighyabho ghëghëndërri ukwikumba
ko okoghera iya inyanko iyaabho.”d
Ukwanga ukwa Abhaisiraëri körëëtirë obhongʼoore ko-Bhakyaro
11 Bhoono ghwiki nköbhöörya ndë igha,
Abhaisiraëri mbaaituurrëtuurrë okore bhasike?
A a,
ti-igho hë!
Kasi ko okoghera iya ukwanga ukwabho Ömötöörya,
öbhötöörya bhongʼaanyëëyë ko-Bhakyaro,
okore Abhaisiraëri bhabhe na inyonta iya ökötööribhwa.
12 Bhoono hano okomaaha igha,
Abhakyaro bhaamëhirë bhököngʼu ko bhoora Abhaisiraëri bhaangirë Ömötöörya,
mbe,
nerebha-ho ehoorohooro enene,
hano Abhaisiraëri bhonswe,
bharikërrya Ömötöörya.
13 Bhoono m-bëënyu Abhakyaro nkötëëbhya.
Obhoheene ni-igha,
Waryobha yaantoma mbe omotomwa kö-bhëënyu.
Nkötöönia ndë emeremo ghiyö naahaanwa,
14 kasi ko okohetera ko-meremo ighyane ghiyö,
nkwitengʼera ndë igha,
Abhaisiraëri mbaraabhe na inyonta iya ukunyoora öbhötöörya kya bhono bhëënyu mwaanyoora,
okore abhandë mo-Bhaisiraëri muyö,
bhatööribhwi.
15 Ko bhoora igha,
hano Abhaisiraëri bhaangirë Ömötöörya,
Waryobha wonswe akabhanga,
akaighwerrana na Abhakyaro.
Ku bhuyö hano ghwiki Waryobha ariikërrya Abhaisiraëri,
nerebha igha,
n-kya hano abhaku bharyökirë!
16 Ko okorengʼaana na idiini iya Ikiyahudi,
hano ömöntö yaahiranga ku-Waryobha obhose obhoke igho ubhwa obhotongore,
hayö bhoono nkunyoora örë ibhyakorya ibhyaye bhyonswe igho,
bhebhaayë ibhya Waryobha.
Ghwiki ni-igha,
hano ömöntö yahira imiri ighya Ëmëzëituuni,
e na amasagharya aghaaghyo ghonswe igho,
na-agha Waryobha ghakobha.
17 Amasagharya aghandë ghaagheeshwa,
na bhëënyu bhano monga kya Ëmëzëituuni ighya mwi-sisi mokaroobhwa-ko,
okore mosange hamwë na amasagharya agha ömözëituuni ghono ghotarë ughwa mwi-sisi.
18 Ku bhuyö bhoono bhëënyu,
motakaashe mosere bhayö bhanga kya amasagharya ghano ghaagheeshwa.
Motakaiheema,
momanye igha,
imiri të-bhëënyu ghikwitengʼera hë,
kasi m-bëënyu mukwitengʼera imiri ghiyö.
19 Handë moratora okoghamba igha,
“Amasagharya ghayö ngaagheeshwa okore toroobhwe-ko.”
20 Bhuyö m-boheene.
Amasagharya ghayö ghaaghëëshirwë ko okoghera iya ukwanga kukumya,
uwe wonswe umukumo ughwaho ngwo ghokoghera örëngë igho.
Ku bhuyö ni-igha wiyangarre,
otakaiheema kasi ni-igha wobhohe.
21 Ko bhoora Waryobha yaashibhiri Abhaisiraëri bhano bhanga kya amasagharya agha esemoko iya ömözëituuni,
m-maheene igha,
kora uwe wonswe aratora ukukushibhya.
22 Maaha mbe kya bhono Waryobha akokorra abhantö abhandë öbhöntö ubhwa heene,
na kya bhono akushibhya abhandë,
ubhushibhu obhonene!
Yaashibhiri bhaara bhaangirë ukumukumya,
naraakokorre öbhöntö ubhwa heene hano oraaghëndërri ukumukumya.
Kasi hano oraange ukumukumya,
uwe wonswe noraagheeshwe.
23 Hano Abhaisiraëri bhayö bharaaihonshore bhakumi Waryobha,
mbaraaroobhwe kö-mözëituuni kuyö,
ko bhoora Waryobha naana obhotoro ubhwa okobharoobha-ko.
24 Uwe Umukyaro,
onga kya amasagharya agha Ëmëzëituuni ighya mwi-sisi,
waaghëëshirwë,
okaroobhwa kö-mözëituuni ghono ghwëmibhwa,
ëkëntö kiyö n-kehya.
Omanye bhuuya igha,
te-ngʼana nköngʼu ku-Waryobha okoroobha Abhaisiraëri,
bhano bhanga kya amasagharya agha ömözëituuni ughweneghwene!
Waryobha uwa ikyabhera ko-bhantö bhonswe igho
25 Abhakumya bharikyëtö,
keno nkutuna ni-igha momanye ësëëmyö iya Waryobha,
eno yaarenga ibhisirwë ukurwa kare,
okore motakaikumya igha,
mmomanyirë ghonswe igho.
Ekeghaaka ikya Abhaisiraëri n-kya ribhagha ike igho,
okohekera hano ekerengere ikya Abhakyaro keno Waryobha akutuna,
kirihika.
26 Bhoono hayö,
Abhaisiraëri bhonswe igho bharëtööribhwa.
Amangʼana ghano,
n-kya bhono Waryobha yaaghambirë mo-Maandeko Amahörëëru igha,
“Ömötöörya n-Sayuuni arirwera,
narekora urwebhoro urwa Yaakobho rwikërri Waryobha.
27 Hayö ho Imuuma iyaane nabho erehekerana,
hano ndebhaabhera ëbhëbhë ibhyabho.”f
28 Ko engʼana eera iya ukwanga Amangʼana Amaiya agha Yëësu Kiristo,
hayö Abhaisiraëri bhaabhaayë abhabhisa abha Waryobha,
okore bhëënyu Abhakyaro munyoore ehoorohooro.
Nokaanyoora ni-igho ërë,
kasi Waryobha nakehanshirë Abhaisiraëri,
ko bhoora igha,
yaashaaghööyë abhakörö abhaabho kora akakora nabho riraghano.
29 Ko bhoora Waryobha yaabhahööyë na okobhangʼoora,
tabhaigharanshore hë.
30 Bhëënyu kare temwaighweranga Waryobha hë,
kasi bhoono Waryobha akabha na amaabhë kö-bhëënyu,
ko bhoora Abhaisiraëri bhaangirë ukumwighwera.
31 Maaha mbe igha,
amangʼana ni-igho gharë igha,
bhoono tebhakumwighwera hë,
okore bhëënyu mwabherwe,
na abheene bhonswe bhaabherwe na Waryobha kya bhëënyu.
32 Waryobha yaabhatighirë bhaghëndërri na amangʼana aghaabho agha ukwanga ukumwighwera,
akabhaghoterra mö-bhötëëyu ubhwabho,
okore aashe okobha na amaabhë ko-bhantö bhonswe igho.
Tötööni Waryobha
33 Ubhwamë ubhwa Waryobha,
obhomanyi na obhongʼaini ubhwaye,
m-byaru bhököngʼu,
tebheena ekerengere kyokyonswe igho hë.
Taaho ömöntö ono akotora ukwitaaha amaitegherro agha Waryobha,
handë ësëëmyö iyaaye.
34 Amaandeko Amahörëëru gharaghamba igha,
“Taaho ömöntö ono amanyirë amaitegherro agha Omonene Waryobha hë,
handë uwa ökömötöörrya ukwitegherra.”g
35 “Nawë yaahaana-ko Waryobha isiirë yoyonswe eera
igha Waryobha areemohaka?”h
36 Ko bhoora Waryobha we yaabhomba ëbhëntö bhyonswe igho,
ëbhëntö bhyonswe nku-mwene bhikurwa,
ëbhëntö bhyonswe igho höbhërë ko okoghera iya obhotoro ubhwaye.
Ubhuhika nu-bhwaye amakora ghonswe igho.
Amina.