Abharuumi 10

Abhakumya bharikyëtö, ëkëntö ekenene keno nkutuna mo-nkoro iyaane, keno nkosaasaama ku-Waryobha, ni-igha Abhaisiraëri bharikyane bhatööribhwi.2 Nkobhaimererra ndë igha, abhantö bhayö, mbaana omotono ughwa ukutuna Waryobha, kasi obhongʼaini ubhwa ukumutuna, mbo bhataanabho.3 Tebhamanyirë enshera eno ekoghera Waryobha arabhara abhantö igha m-ba heene, ku bhuyö bhakaghoota enshera iyaabho, iya amaraghërryö agha Mosa. Mbaakörrë igho, ko bhoora yo bhaarööshë igha, nekaakörrë Waryobha abhabhare igha m-ba heene.4 Kiristo yaahekerania amaraghërryö agha Mosa, okore abhantö bhonswe igho bhano bhakukumya Yëësu Kiristo, bhabharwenga igha m-ba heene.

Waryobha aratora ökötöörya abhantö bhonswe igho

5 Ko amangʼana agha ömöntö okobharwa igha wa heene ko okoghera iya okoghoota amaraghërryö, Mosa yaaghambirë igha, “Ömöntö wowonswe igho, ono akoghoota amaraghërryö, ni-igha akore bhono ghakutuna kö-bhömënyi ubhwaye bhwonswe igho.” 6 Kasi ko okobharwa ömöntö igha wa heene ko okoghera iya umukumo, Mosa yaaghambirë igha, “Motakaibhöörya igha, ‘N-nawë akotora ukutiira aghi mu-ryobha?’” Igha, asabhe Yëësu Kiristo aashe ko-kebhara kono. 7 “Handë igha, ‘N-nawë akaika ukughya mu-kyaro ikya abhaku iyö?’” Igha, ukuryökya Kiristo. 8 Nokaanyoora ni-igho ërë, kasi Amaandeko Amahörëëru nkoghamba gharë igha, “Engʼana iya Waryobha haangʼë ërë na uwe, m-munywa ughwaho na mo-nkoro iyaaho ërë.” Ensonga iyaamo ni-igha, engʼana iyö, ni-iya öbhötöörya eno tokoraareka, ko okohetera umukumo ughwene igho. 9 Kora haangʼë ërë na uwe, ko bhoora hano oraaghambe na umunywa ughwaho uwe umwene igha, Yëësu m-Monene, na ukumi mo-nkoro iyaaho igha Waryobha yaamuryökëri ukurwa mo-bhaku, noraatööribhwi na Waryobha. 10 Ko bhoora hano ömöntö araakumi Yëësu Kiristo mo-nkoro iyaaye, ho bhoono akobharwa igha wa heene ku-Waryobha. Hano araaghambe ukurwa mu-munywa ughwaye amangʼana agha umukumo ughwaye, ho akötööribhwa. 11 Amaandeko Amahörëëru gharaghamba igha, “Kera ömöntö ono akumukumya, tarësökërribhwa hë.” 12 Ko bhoora Omonene taana ekeroterro ko-Bhayahudi, handë ko-bhantö bhano bhatarë Abhayahudi. Abhantö bhonswe igho, Omonene uwaabho nö-ömwë, ghwiki m-mösërëënia bhököngʼu uwa bhano bhakomosaasaama. 13 Engʼana iyö, nerengʼaini kya bhoora Amaandeko Amahörëëru ghakoghamba igha, “Kera ömöntö ono ukwitengʼera iriina irya Omonene Waryobha, uyö naraatööribhwi.”

14 Mbe, iyakë ömöntö araatore okosaasaama Waryobha na mbe tiyaakamukumiri hë? Iyakë ömöntö araatore ukumukumya na mbe tiyaakaaighuurë amangʼana aghaaye hë? Ghwiki iyakë ömöntö araatore ukwighwa engʼana eno ataraarëkëëywë? 15 Ghwiki iyakë abhantö bharaaghi okoraareka engʼana iyö igho bhatatömirwë? N-kya bhono Amaandeko Amahörëëru ghakoghamba igha, “Hano omoraarëki uwa Amangʼana Amaiya agha Waryobha ahikirë, abhantö nkushomerwa bharë!” 16 Nokaanyoora ni-igho ërë, kasi ti-igha Abhaisiraëri bhonswe igho, mbaaikërëëyi Amangʼana Amaiya agha Yëësu Kiristo, m-baaru bhaaghangirë. Ko bhoora ömörööti Isaaya yaaghambirë igha, “Omonene Waryobha, taaho ömöntö ono yaaikërëëyi amangʼana aghëëtö hë.” 17 Ku bhuyö abhantö nkobha bharë na umukumo hano bhaighwa amangʼana agha Yëësu Kiristo. Kasi hano bhataraarëkëëywë amangʼana ghayö, iyakë bharaakore bhabhe na umukumo?

18 Kasi tigha mbööri-ko engʼana igha, Abhaisiraëri mbataighuurë amangʼana ghayö? M-maheene igha, mbaaighwa, ko bhoora Amaandeko Amahörëëru nkoghamba gharë igha,

“Amangʼana aghaabho ghaaromaini ekebhara kyonswe igho,

na amangʼana aghaabho ghayö, ngaaghëëyë igho ghakahika kya bhono ekebhara këhëkëëyë.”

19 Tigha mbööri-ko ghwiki engʼana iyëndë, hano Abhaisiraëri bhaaighuurë, tebhaamanyërrëëyi hë? Ti-igho hë, mbaamanyirë, ko bhoora waanyöörrë Waryobha amarrë okoghamba ko-nkaagha iya Mosa eera igha,

“Nendaabhakore mokorre orongʼeera

abhantö bhano bhatarë abhaane,

abhantö bhano bhatamanyirë engʼana,

nendaabhakore mobharererrenga bhököngʼu.”

20 Ghwiki ömörööti Isaaya yaabhaayë na obhokarë ubhwa okoghamba amangʼana agha Waryobha igha,

“Abhantö bhano bhatakaantunirë,

mbo bhandööshë.

Abhantö bhano bhataköbhöörërya amangʼana aghaane,

mbo nihönyööyë-ko.”

21 Kasi ko amangʼana agha Abhaisiraëri Waryobha yaaghambirë igha,

“Urusikö urughima naatunanga nighwerrane na abhantö abhaane,

kasi m-bantö abha emetwe ëmëköngʼu

kora m-batëëyu.”