Umukumo ghwaaghërrë Ibhurahimu//akabharwa igha uwa heene ku-Waryobha
4
Bhoono toghambe iyakë ko-mangʼana agha ömökörö uwëëtö Ibhurahimu?
a N-kë kyaaghërrë Waryobha akamobhara igha n-wa heene?
2 Hano toraaghambe igha,
Ibhurahimu yaabharrwë igha nu-uwa heene,
ko okoghera iya amangʼana ghano yaakörrë,
hayö noraanyoore anyöörrë engʼana iya ukwikumirya.
Kasi obhoheene ni-igha,
taana engʼana iya ukwikumirya ku-Waryobha hë.
3 Amaandeko Amahörëëru gharaghamba igha,
“Ibhurahimu yaakumiri Waryobha,
kiyö nkyo kyaaghërrë Waryobha akamobhara igha wa heene.”b
4 Obhoheene ni-igha,
hano ömöntö akörrë emeremo,
ni-igha anyoore ehoorohooro,
iyö,
ti-tuho hë,
ko bhoora kiyö në-këntö keno aingʼarëëyë igha anyoore.
5 Ömöntö ono atakwesegha amangʼana aghaaye amaiya ghano akokora,
hano araakumi Waryobha umwene igho ono akobhara abhantö igha m-ba heene,
ömöntö kya uyö,
nokaanyoora igha m-möntö moghogho,
kasi Waryobha nkomobhara arë igha n-wa heene,
ko okoghera iya umukumo ughwaye.
6 Obhongʼoore kö-möntö ono Waryobha akobhara igha wa heene,
tërëngë igha n-ko okoghera iya amangʼana aghaaye ghano yaakora.
Omokama Daudi yaarëngëri ko engʼana iyö igha,
7 “Nyakara abhantö bhano Waryobha yaabhera obhosarya ubhwabho,
na okobharuusirya-ho ëbhëbhë ibhyabho.
8 Ömöntö ono Omonene Waryobha atakobharra ëbhëbhë ibhyaye,
uyö yaangʼoorwa.”c
9 Bhoono obhongʼoore bhuyö bhokoghambwa hayö na Daudi,
nko-bhasaarwa abheene igho?
Kasi hamwë na abhatasaarwa bhonswe?
Amaandeko Amahörëëru nkötötëëbhya gharë igha,
Waryobha yaabharrë Ibhurahimu igha wa heene ko okoghera iya umukumo ughwaye ku-Waryobha.d
10 Ne-nkaagha kë Ibhurahimu yaabharrwë igha wa heene?
N-hano waanyöörrë amarrë okosaarwa,
kasi ataraasaarwa?
Hano waanyöörrë ataraasaarwa.
11 Okosaarwa ukwaye,
nkwo kwaarë ekemanyërryö igha,
Waryobha yaamobharrë igha wa heene,
ko okoghera iya umukumo ughwaye ughwene igho,
ghono yaarë nagho kora ataraasaarwa.
Ku bhuyö Ibhurahimu akakorwa abhe suwaabho abhakumya,
nokaanyoora tuwaanyöörrë araasaarwa hë,
okore kora na abhatasaarwa bhonswe bhakorwe igha m-ba heene.
12 Ibhurahimu,
we yaakorwa abhe suwaabho abhatasaarwa,
kasi n-hano bharaakumi Waryobha.
Ibhurahimu n-suwaabho bhano bhakukumya Waryobha,
kya bhono umwene yaakumiri,
kora ataraasaarwa.
13 Waryobha yaaraghaini Ibhurahimu na abhantö abhaaye igha,
nakaabhahaayë ekebhara kebhe umwandö ughwabho.
e Waryobha tiyaaraghaini Ibhurahimu,
ko bhoora igha yaaghöötirë amaraghërryö agha Mosa.
Kasi n-ko bhoora yaarë na umukumo ku-Waryobha.
Umukumo ghuyö,
ngo ghwaaghërrë Waryobha akamobhara igha wa heene.
14 Maaha,
hano okaanyöörrë igha,
na-Bhayahudi abhaghööti abha amaraghërryö agha Mosa abheene igho,
igha mbo bhakohaanwa ghaara Waryobha yaaraghaini,
hayö bhoono ho umukumo ughwa ömöntö ku-Waryobha,
ghokaahëtirë bhosa.
Kora na riraghano irya Waryobha ndekaabhaayë igha,
m-borongo.
15 N-kwakë rekaabhaayë igha m-borongo?
N-ko bhoora ömöntö ono akosarya amaraghërryö agha Mosa,
nkushibhibhwa arë.
Kasi hano amaraghërryö ghayö ghatakaabhaaye-ho,
kora obhosarya ubhwa amaraghërryö bhwonswe,
tebhokaabhaayë-ho hë.
16 Kiyö nkyo kekoghera riraghano irya Waryobha reraitengʼera örööbhö urwaye,
na ukumukumya ibhyene igho.
Ko okoghera iya engʼana iyö,
ghonswe igho ghaara Waryobha yaaraghaini abhantö abha Ibhurahimu bhonswe igho,
n-ga bhoheene.
Ensonga iyaamo ni-igha,
tekobha igha nko-bhaghööti abha amaraghërryö abheene igho hë,
kasi nko-bhonswe igho bhano bhakukumya Waryobha kya bhono Ibhurahimu yaamukumiri.
Ibhurahimu we taata uwëëtö bhonswe igho bhano tukukumya Waryobha.
17 Amangʼana ghayö,
n-kya bhono Amaandeko Amahörëëru ghakoghamba igha,
“Nkötöörrë-ho,
obhe ömökörö uwa abhantö abha ibhyaro ibhyaru.”
f Ku bhuyö ni-igha,
hano waanyöörrë Ibhurahimu arëngë mbere iya Waryobha,
yaaighuurë amangʼana ghayö Waryobha yaaraghaini.
Akakumya Waryobha ono akohaana öbhöhöru abhantö bhano bhaakwa.
Uyö we akoghamba,
ëbhëntö bheno bhetaaho,
bhebhaho.
18 Hano Ibhurahimu yaatëëbhiibhwi amangʼana ghayö,
ghakamokongʼera.
Nokaanyoora ghaamököngʼëëyë,
kasi akaghëndërrya ukukumya Waryobha,
araitengʼera igha,
nakaamökörrë abhe ömökörö uwa abhantö abha ibhyaro ibhyaru.
Okanyoora Waryobha amötëëbhëri igha,
“Urwebhoro urwaho ndorebha urwaru kya sinyota.”g
19 Enkaagha iyö waanyöörrë Ibhurahimu ahikiri imyoka ighana imwë.
Umwene yaamanyirë igha,
yaamara okongʼateka,
na Saara mokaaye,
m-moghomba yaarë,
kasi umukumo ughwa Ibhurahimu,
teghwasuuhirë hë.
20 Kora tiyaabhaayë na entarëki yoyonswe eera hë,
ku-riraghano riyö Waryobha yaamoraghaini.
Kasi keno yaakörrë,
nu-kumukumya na ökömötöönia,
21 ko bhoora yaarë na obhoheene igha,
Waryobha naana obhotoro ubhwa okokora ghaara yaamoraghaini igha akaamökörëëyë.
22 Kiyö nkyo kyaaghërrë Waryobha akamobhara igha,
wa heene.h
23 Amaandeko ghano ghakoghamba igha,
“Waryobha yaamobharrë igha,
wa heene,”
teghaandëkirwë ko okoghera iya Ibhurahimu umwene igho hë,
24 kasi ngaandëkirwë ko okoghera iya bhëëtö bhonswe igho.
Nkötötëëbhya gharë obhoheene igha,
hano toraakumi Waryobha ono yaaryökya Omonene uwëëtö Yëësu Kiristo,
hayö ho na bhëëtö bhonswe toraabharwe igha,
m-ba heene törë.
25 Waryobha yaarëëtirë Yëësu okore akwe,
ko okoghera iya ëbhëbhë ibhyëtö.
Akamuryökya,
okore tobharwe igha,
m-ba heene törë.