Waryobha n-wa heene nkaagha syonswe igho
3
Bhoono m-bwera kë bhörëngë mu-Bhuyahudi ko okorengʼaana na amangʼana ghonswe igho ghayö ngambirë hayö?
Okosaarwa koona ubhwera?
2 M-maheene igha,
okobha Umuyahudi,
nkoona ubhwera ubhwaru.
Ekenene ni-igha,
Waryobha yaatëëbhëri Abhayahudi amangʼana aghaaye.
3 Kasi Abhayahudi abhandë,
tebhaabhaayë abha heene okokora kya bhoora amaraghërryö agha Mosa ghaatunanga bhakore.
Mbe,
toghambe igha engʼana iyö neghera Waryobha wonswe ange okobha uwa heene okokora ghaara yaaraghaini igha akaakörrë?
4 A a,
ti-igho hë!
Abhantö m-barongo,
kasi Waryobha nkwörökya arë igha,
nkokora arë keno aghambirë igha naraakore.
N-kya bhono Amaandeko Amahörëëru ghakumushumaashera igha,
“Hano oraatëëbhi abhantö abhaaho obhosarya ubhwabho,
hayö no-bhoheene oraanyoore oghambirë.
Hano oraabhabhotorre ikiina,
öbhöbhötöri ubhwaho ubhwa ikiina,
m-bwa heene.”a
5 Kasi abhantö abhandë bharatora okoghamba igha,
“Ëbhëbhë ibhyëtö bhëëtö Abhayahudi,
mbyo bhekoghera toramanya igha,
Waryobha wa heene kö-bhöbhötöri ubhwaye ubhwa ibhiina.
Kasi nyoore Waryobha nkutushibhya arë,
ku bhuyö toghambe igha Waryobha te-wa heene kora hake hë?”
6 A a,
ti-igho hë.
Okaanyöörrë igha ni-igho ërë,
iyakë Waryobha akaabhaayë na obhoheene ubhwa okobhotorra abhantö ibhiina ibhyabho?
7 Ghwiki bharatora okoghamba igha,
“Hano bhëëtö toraakore ëbhëbhë,
hayö ho abhantö abhandë bharaanyoore umweya ughwa okomaaha obhoheene ubhwa Waryobha.
Kora mbaraaghëndërri ökömötöönia.
Bhoono n-kwakë tokobhotorrwa ikiina igha m-baköri abha ëbhëbhë törë?”
8 Iyö n-kya hano oraaghambe igha,
“Tokorenga ëbhëbhë,
okore amangʼana amaiya ghaashe.”
Abhantö abhandë nkotohanga bharë igha,
kora bhëëtö bhonswe ni-igho tukwëghya.
Maaha mbe igha,
abhantö bhayö bhonswe igho,
mbarishibhibhwa ko okorengʼaana na obhoghogho ubhwabho.
Ömöntö uwa heene taaho hë
9 Bhoono iyakë tokaaghamba?
Toghambe igha bhëëtö Abhayahudi ntoona ubhwera okokera abhantö abhandë?
Ti-igho hë.
Ko bhoora mmarrë okobhatëëbhya igha,
Abhayahudi hamwë na abhantö bhano bhatarë Abhayahudi,
ëbhëbhë mbebhabhaahirë bhonswe igho.
10 Engʼana iyö,
nerengʼaini kya bhono Amaandeko Amahörëëru ghakoghamba igha,
“Ömöntö uwa heene ku-Waryobha,
taaho kora ömwë hë.
11 Taaho ömöntö wowonswe ono amanyirë amangʼana agha Waryobha hë.
Kora taaho ono akutuna okomomanya hë.
12 Abhantö bhonswe igho,
tebhakwighwera Waryobha hë,
bhonswe igho tebhaingʼarëëyë ku-Waryobha hë.
Taaho ömöntö ono akokora amangʼana amaiya hë.
Taaho kora ömwë hë.”b
13 “Iminywa ighyabho,
n-kya sembeehera seno syasamërrëëyë igho.
Sëndëmë isyabho no-bhorongo sekoghamba.
c
Mu-minywa ighyabho,
nkurwaghare-mo amangʼana agha öbhösöngö kya ubhwa inshoka.”d
14 “Iminywa ighyabho ngishööyë amaihiimo,
na amangʼana ghano ghakokorra abhantö öbhörrö.”e
15 “Amaghörö aghaabho,
m-mangö ku ukughya ukwita abhantö.
16 Hano honswe bhakoheta,
no-bhosarya bhakokora na ubhusikya ubhwa abhantö.
17 Tebhakwikarana kwa morembe na abhantö abhandë hë.”f
18 “Tebhakosooka Waryobha hë.”g
19 Ku bhuyö ntomanyirë igha,
hano Amaandeko Amahörëëru ghaghamba engʼana yoyonswe eera,
nkunyoora örë ghararaghërrya bhano bhaahaaywë amaraghërryö agha Mosa.
Amaraghërryö ngaatöörrwë-ho,
okore Abhayahudi bhatakaasha okobha na ikitamërryö,
hano Waryobha arebhotorra ekebhara keno ikiina ikyako.
Hayö ho eremaahekana igha abhantö bhonswe igho,
mbaingʼarëëyi okobhotorrwa ikiina na Waryobha.
20 Ko bhoora taaho ömöntö wowonswe ono akobharwa igha wa heene,
ko okoghera iya okoghoota amaraghërryö agha Mosa.
Omoremo ughwa amaraghërryö ghayö,
nu-kwörökya igha,
abhantö bhonswe igho,
m-baköri abha ëbhëbhë.
Enshera iya okobharwa igha wa heene örë
21 Kasi bhoono Waryobha,
atwörökëri enshera iyaaye iya okobhara abhantö igha m-ba heene igho,
kora bhataghöötirë amaraghërryö agha Mosa.
Kora Amaandeko agha Mosa bheena amaandeko agha abharööti,
ni-igho ghakoghamba.
22 Enshera iyö,
ne-eera iya ukukumya Yëësu Kiristo.
Abhantö bhonswe igho bhano bhakukumya Yëësu Kiristo,
Waryobha nkobhabhara arë igha,
m-ba heene.
Taana ekeroterro kö-möntö wowonswe oora hë.
23 Ko bhoora abhantö bhonswe igho bhaakora ëbhëbhë,
ku bhuyö amangʼana ghano bhakokora teghakötöönia Waryobha hë.
24 Kasi bhoono Waryobha kö örööbhö urwaye,
aikërëëyi okobhara abhantö igha m-ba heene ku-mwene,
bhatamohakirë kyokyonswe keera.
Bhatunguribhwa ukurwa mö-bhëbhë ibhyabho okohetera ku-Kiristo Yëësu
25 Waryobha yaakörrë Yëësu abhe ikimwensoh ikya ukwighwerrania abhantö na Waryobha.
Yaakörrë ghayö,
okore abhantö bhaabherwe ëbhëbhë ibhyabho,
ku ukukumya igha Yëësu Kiristo yaakuurë ko okoghera yaabho.
Ni-igho Waryobha yaakörrë,
okore ööröki abhantö igha,
wa heene,
ko bhoora yaaghömërrëëyi,
tiyaabhashibhiri kö ëbhëbhë bheno bhaakörrë.
26 Yaakörrë igho,
okore ööröki abhantö abha enkaagha eno igha,
nu-uwa heene,
ko okobhara abhantö bhonswe igho bhano bhakukumya Yëësu igha,
m-ba heene.
27 Ku bhuyö engʼana iyö,
nkotorebherra ërë okore totakaiheema,
ko bhoora tetokobharwa igha m-ba heene törë,
ko okoghera iya amangʼana aghëëtö amaiya ghano tokokora.
Kasi n-ko okoghera iya ukukumya Yëësu Kiristo ukwene igho.
28 Bhoono törööshë igha,
Waryobha nkobhara arë abhantö igha m-ba heene,
ko okoghera iya ukukumya Yëësu Kiristo,
kasi tërëngë igha n-ko okoghera iya okoghoota amaraghërryö agha Mosa.
29 Ndabhöörya igha,
Waryobha nu-uwa Abhayahudi abheene igho?
Tarëngë Waryobha uwa abhantö abhandë hë?
Obhoheene ni-igha,
Waryobha nu-uwa abhantö bhonswe igho.
30 Waryobha nö-ömwë igho.
Ghwiki enshera eno eeho iya okobharwa igha m-ba heene ku-Waryobha,
në-ëmwë igho.
Abhayahudi na Abhakyaro,
bhonswe igho bhayö,
nkobharwa bharë abha heene ko-nshera iya ukukumya Yëësu Kiristo ukwene igho.
31 Mbe,
hano twakangʼasërrya engʼana iya ukukumya,
n-kya hano toraaghambe igha,
amaraghërryö agha Mosa teghaana ubhwera hë?
A a,
ti-igho hë!
Kasi hano toraabhe na umukumo,
hayö ho oraanyoore tohekeraini ghonswe igho,
ghano amaraghërryö agha Mosa ghakoghamba.