Pauro arashongerwa kö-mötöngi Fëriki
24
Hano syaahëtirë sinsikö isaano,
Anania omonene uwa abhasëngëri akahika Kaisaaria.
Yaarë hamwë na abhaghaaka abhandë abha Ikiyahudi,
na ömököri uwa ibhiina ono yaabherekerwanga igha Tëriturö.
Bhonswe igho bhayö,
mbaashöngëëyë Pauro kö-mötöngi Fëriki.
2 Hano Pauro yaarëëtirwë,
Tëriturö akasimya ukumushongera araghamba igha,
“Omosookwa Fëriki,
obhotangati ubhwaho ubhuuya mbo bhokoghera toona omorembe ughwa ribhagha ritambë.
Ko bhoora noona obhongʼaini ubhwa okomaaha amangʼana agha mbere,
tukutigha amangʼana amaghogho,
ghasari ikyaro keno hë.
3 Abhantö bhonswe igho abha kera ahasë,
senkaagha syonswe igho,
Fëriki omosookwa uwëëtö,
nkukumya törë na ukwikërrya bhököngʼu,
amangʼana ghayö hasë honswe igho.
4 Tigha ntakakwora na amangʼana amaaru.
Ko bhono örëngë ömöntö uwa heene,
ndakosaasaama utwitegherre bhuuya ko amangʼana amake ghano toraakötëëbhi.
5 “Törööshë igha ömöntö ono,
m-moghogho bhököngʼu.
Arasëëghërrya Abhayahudi,
na ököghöötya riihë ko-kebhara kyonswe igho.
We omotangati uwa rikomo irya idiini iya obhorongo iya Abhanazarëëti.
6 Kora yaatunanga anyankuhi risengerro irya Waryobha,
hayö ho twaamöghöötëëyë.
[Tokatuna okomobhotorra ikiina ko okorengʼaana na amaraghërryö aghëëtö,
7 kasi Risia omonene uwa abhasirikare akaasha,
akamosaka ukurwa mo-mabhoko aghëëtö kwa nguru,
8 akahamera igha,
bhano bhaana engʼana na ömöntö ono,
bhaashe bhamushongere ku-uwe hano.]
a Hano uwe umwene oraamushamishi,
noraamanye obhoheene ubhwa amangʼana ghayö ghonswe igho tukumushongera ku-uwe hano.”
9 Abhayahudi bhakaikërrya igha,
ghayö ghonswe igho Tëriturö aghambirë m-maheene.
Pauro araikoorerra kö-mötöngi Fëriki
10 Mbe,
ho ömötöngi Fëriki akasömösya Pauro igha aghambe.
Pauro akaghamba igha,
“Öni nemanyirë igha,
imyoka m-myaru kerenga waabha umwahokania uwa abhantö bhano.
Kiyö nkyo kekoghera ndashomerwa ukwikoorerra ku-uwe hano.
11 Oratora okomanya uwe umwene bhuuya igha,
teseraaheta sinsikö ikömi na ibhërë,
kerenga naatiirrë ukughya Yërusarëëmu okosaasaama Waryobha.
12 Abhantö bhano bhakunshongera hano,
tebhaannyöörrë ndarya senkaani,
handë igha ndasëëghërrya ömöntö wowonswe oora mo-bhogho ubhwa risengerro irya Waryobha,
mu-sinyumba isya esango iya Abhayahudi,
handë ahasë hohonswe haara mu-mughi muyö.
13 Ghwiki tebhaana obhoheene ko amangʼana ghano bhakunshongera hano.
14 “Engʼana eno nkwikërrya ku-uwe hano ni-igha,
nkosaasaama ndë Waryobha uwa abhakörö abhëëtö ko enshera iya okosoorana Yëësu,
eno abheene bhakobherekera igha,
ni-iya amëëghyö agha obhorongo.
Nkukumya ndë amangʼana ghonswe igho agha amaraghërryö agha Mosa,
na agha ebhetabho ibhya abharööti.
15 Nkwitengʼera ndë Waryobha kya bhono abheene bhonswe bhakumwitengʼera igha,
nariryökya abhaku bhonswe igho,
abhantö abha heene hamwë na bhano bhatarëngë abhantö abha heene.
16 Ku bhuyö,
nkokora ndë omotono ughwa okokora amangʼana ghano nkukumya mo-nkoro iyaane igha,
m-maiya ko-bhantö na ku-Waryobha.
17 “Mbe,
hano imyoka imyaru ghyaahëtirë ntaraakyora Yërusarëëmu,
nkaghya-ho na ëbhëntö ibhya ekehaheeno ökötöörya Abhayahudi abhahabhë mu-kyaro ikyëtö,
hamwë na ikimwenso ikya ukumwensera Waryobha.
18 Ghayö ngo abhantö bhano bhaanyöörrë ndakora mo-bhogho ubhwa risengerro irya Waryobha,
mmarrë ukwisaabhuura.
Tenaarë na rikomo irya abhantö handë igha ndakora riihë hë.
Kasi mu-risengerro moora,
bhaare-mo Abhayahudi abhandë bhano bhaarwërëëyë mu-kyaro ikya Asia Enke.
19 Bhayö,
mbo yaarë igha bhaashe hano bhanshongere ku-uwe,
nyoore bhakaabhaaye na engʼana yoyonswe eera ku-öni.
20 “Tigha bhano bharëngë hano,
bhaghambe obhoghogho bhobhonswe igho bhono bhaarööshë hano naaimërëëyë mu-ribharasa iryabho.
21 Hanga mbaaighuurë bhoghogho hano naaghambirë engʼana eno bhököngʼu igha,
‘Keno kekoghera öni ndabhotorrwa ikiina kö-bhëënyu hano reero,
m-boora nkwitengʼera igha abhaku mbariryoka.’ ”
22 Ko bhoora Fëriki yaamanyirë bhuuya amangʼana agha abhasoorani abha Yëësu,
akakubhya ikiina kiyö,
akabhatëëbhya igha,
“Hano omonene uwa abhasirikare Risia arengʼaaraara ukuusha hano,
hayö ho ndebhotora ikiina ikyënyu.”
23 Ho Fëriki yaahamëëyë omonene uwa abhasirikare ono yaarë hayö igha,
“Orende Pauro,
kasi omohaanenga umweya,
kora otakakaania abhasaani abhaaye ökömösërëënia.”
Pauro bhöröngë ubhwa ömötöngi Fëriki na Durusira
24 Hano sinsikö nyabhorebhe syaahëtirë,
Fëriki akaasha na mokaaye ono yaabherekerwanga igha Durusira,
umusubhaati uwa Abhayahudi.
Akabherekera Pauro aashe.
Akamwitegherra ko amangʼana agha okobha na umukumo ku-Kiristo Yëësu.
25 Pauro akaghëndërrya okobhatëëbhya amangʼana ghano Waryobha akutuna bhakore,
na agha ömöntö ukwirebherra atakaakora amangʼana amaghogho na agha urusikö urwa umuhiko urwa okobhotora ibhiina.
Hano Fëriki yaaighuurë ghayö,
akoobhoha.
Akatëëbhya Pauro igha,
“Bhoono uwe kaghi,
hano ndinyoora umweya,
nendekobherekera ghwiki.”
26 Enkaagha iyö Fëriki yaakanyanga igha Pauro nakaamohaayë amasooya,
ku bhuyö akabha aramobherekera bherekera arashumaasha nawe.
27 Hano ghyaahööyë imyoka ëbhërë,
Fëriki akateghera Porikio Fesito öbhötöngi.
Kasi ko bhono Fëriki yaatunanga ukwihanshania ko-Bhayahudi,
akatigha Pauro mo-kebhohe.