23
Mbe,
Pauro akamoghorra amaiso abhanene abha ribharasa,
akabhatëëbhya igha,
“Bhëënyu bhahiiri abhaane,
öni mo-nkoro iyaane,
m-buuya ndë ku-Waryobha sinsikö syonswe igho.”
2 Hano omonene uwa abhasëngëri Anania yaaighuurë ghayö,
akatëëbhya bhano bhaimërëëyë haangʼë na Pauro igha,
bhamobhaatore rikööfi ku-munywa.
3 Mbe,
Pauro akatëëbhya Anania igha,
“Uwe,
ore mwihunaania,
Waryobha nakushibhya.
a Wikaayë igha ombotorre ikiina ko okorengʼaana na amaraghërryö,
kasi bhoono orakora engʼana eno amaraghërryö ghatakutuna ekorwe,
kasi uwe m-böndë igho okokora,
orahamera igha mbaatorwe!”
4 Abhantö bhano bhaimërëëyë haangʼë na Pauro,
bhakatëëbhya Pauro igha,
“Orakareha okotoka omonene uwa abhasëngëri abha Waryobha?”
5 Pauro akabhahonshora igha,
“Bhahiiri abhaane,
tinaarë manyirë igha we omonene uwa abhasëngëri,
ko bhoora yandëkirwë igha,
‘Otakaaghamba bhoghogho ömötöngi uwëënyu.’ ”
6 Mbe,
hano Pauro yaamanyirë igha mu-ribharasa muyö Abhasadukaayo na Abhafarisaayo bhaamo,
akakonga igha,
“Bhahiiri abhaane,
mutighe mbatëëbhi engʼana.
Öni m-Mofarisaayo ndë,
omoona uwa Omofarisaayo.
Keno kekoghera ndabhotorrwa ikiina mo-bharasa hano,
nu-bhweseghe ubhwane igha abhaku bhariiryoka.”
7 Bhuyö Pauro yaamarrë okoghamba ghayö igho,
Abhafarisaayo na Abhasadukaayo bhakasimya ukunyeerana senkaani,
kora bhakaahokana.
8 (Ikibhuno ikya ukwahokana kuyö ni-igha,
Abhasadukaayo bharaghamba igha,
abhaku tebhariryoka hë,
na abhamaraika tebhaaho hë,
kora amasambwa teghaaho hë.
Kasi Abhafarisaayo bho nkwikërrya bharë ghayö ghonswe igho.)
9 Mbe,
bhakanyeerana senkaani sëndörö kai abheene ko bheene.
Abhëëghya abhandë abha amaraghërryö agha Mosa na Abhafarisaayo,
bhakeemoka bhakakora senkaani bharaghamba igha,
“Tetokomaaha igha ömöntö ono aana risoro ryoryonswe reera hë.
Nyoore n-disambwa handë maraika we ashumaashirë nawe!”
10 Hano amangʼana ghaasöbhirë,
omonene uwa abhasirikare akoobhoha igha,
Pauro nanyaamuuribhwa.
Akatëëbhya abhasirikare abhaaye igha,
bhaibhumbure mo-Bhayahudi kwa nguru,
okore bharuusi muyö Pauro,
bhamuhire mo-bhogho ubhwa abhasirikare.
11 Ubhutikö ubhwa urusikö ruyöruyö,
Omonene Yëësu Yaabhööshökëëyë Pauro,
akaimerra haangʼë nawe,
akamötëëbhya igha,
“Terema!
Kya bhono waaimërërrëëyë amangʼana aghaane Yërusarëëmu hano,
mbo oraaghaimererre mu-mughi ughwa Ruumi honswe.”
Inikö iya ukwita Pauro
12 Hano bhwaakëëyë,
Abhayahudi nyabhorebhe bhakakora ikiina bhubhise.
Bhakaihiimirrya igha,
bhatakaarya,
handë ukunywa kyokyonswe keera,
okohekera hano bharaaite Pauro.
13 Abhantö bhayö bhaakörrë ikiina kiyö,
mbaaheteeranga merongo ene.
14 Ku bhuyö bhakaghya ko-bhanene abha abhasëngëri,
na ko-bhaghaaka abha Ikiyahudi,
bhakabhatëëbhya igha,
“Twihiimirriiyi igha,
tetomeene kyokyonswe keera hë,
totaraaita Pauro.
15 Mbe,
bhoono bhëënyu,
na abhanene abha ebharasa,
mosabhe omonene uwa abhasirikare abhareetere Pauro.
Mwikore kya bhano mukutuna ukwitaaha bhuuya amangʼana agha ikiina ikyaye,
bhëëtö ntoraamoghonyere ko-nshera,
okore hano araahete tumwite ataraahika hano.”
16 Kasi,
mwehwa uwa Pauro akaighwa inikö iyö!
Ku bhuyö akaghya mo-bhogho ubhwa abhasirikare,
akatëëbhya Pauro amangʼana agha inikö iyö.
17 Mbe,
Pauro akabherekera umwimërërri uwa abhasirikare bhayö,
akamötëëbhya igha,
“Tahira umumura ono ko-monene uwëënyu,
aana engʼana iya ökömötëëbhya.”
18 Këmwë umwimërërri uyö akahira mwehwa uwa Pauro ko-monene uwaabho.
Akamötëëbhya igha,
“Omobhohe ono akobherekerwa igha Pauro,
ambërëkëëyë akantëëbhya igha,
nkoreetere umumura ono,
igha aana engʼana iya ökökötëëbhya.”
19 Omonene uwa abhasirikare uyö,
akaghoota mwehwa uwa Pauro okobhoko,
akamuhira mbareka,
akamöbhöörya igha,
“N-kë ukutuna köntëëbhya?”
20 Mwehwa uwa Pauro akamohonshora igha,
“Abhayahudi bhakörrë ikiina igha mbaraakosabhe igha,
obhareetere Pauro isho mo-bharasa.
Mbaraakongʼaine igha bharatuna bhamanyërri bhuuya amangʼana agha ikiina ikya Pauro.
21 Kasi uwe otakaikërrya,
ko bhoora Abhayahudi koheteera merongo ene mbaraaghonyere Pauro ko-nshera,
okore hano areheta,
bhamwite!
Bhaihiimirriiyi igha,
tebhaaraaghere handë ukunywa kyokyonswe keera hë,
bhataraaita Pauro.
Bhaisëëmëri këmwëkëmwë,
nu-uwe bhakoghanya obhaikërërri.”
22 Omonene uwa abhasirikare uyö,
akatëëbhya mwehwa uwa Pauro igha,
“Otakaashe ötëëbhi ömöntö wowonswe oora igha unsimirë engʼana eno!”
Akamutigha aghi.
Pauro arahirwa kö-mötöngi Fëriki
23 Mbe,
omonene uwa abhasirikare uyö,
akabherekera abhaimërërri abhabhërë,
mo-bhano akwimererra,
akabhatëëbhya igha,
“Mösëëmi abhasirikare maghana abhërë,
bhano bharaaghende amaghörö,
hamwë na abhandë merongo muhungatë bhano bhaana sefaraasi,
na abhandë maghana abhërë abha amatimö.
Bheemoke ukurwa hano saa taatu isya ubhutikö.
Bhaghende Kaisaaria.
24 Pauro wonswe ahaanwe efaraasi iyaaye iya ukumuhira iyö,
okore ahike bhuuya kö-mötöngi Fëriki.”
25 Omonene uwa abhasirikare uyö,
akaandeka ritashandighi igha,
26 “Nö-öni Kiraudio Risia ono nkökökëërya Fëriki omosookwa uwëëtö,
ömötöngi.
27 Ömöntö ono,
yaaghöötirwë na Abhayahudi,
bhakatuna igha bhamwite.
Hano naamanyirë igha m-Muruumi,
nkahira-yo abhasirikare abhaane nkamötöörya.
28 Nkatuna mmanyërri keno kyaaghërrë Abhayahudi bhakamushongera.
Ku bhuyö nkamuhira mo-bharasa iyaabho.
29 Nkamaaha igha ikiina ikyabho,
ni-ikya amangʼana agha amaraghërryö aghaabho.
Ikiina kiyö,
tikyaarë na engʼana yoyonswe eno ekaaghirrë aitwe handë igha abhohwe hë.
30 Hano naasimirwë igha bhamunyëërëyë inikö iya ukumwita,
nkamaaha igha mmoreete bhöngö ku-uwe iyö.
Nkatëëbhya abhashöngëri abhaaye bhayö igha,
ikiina ikyabho ni-iyö keraakorrwe.”
31 Ku bhuyö abhasirikare bhayö,
bhakaghegha Pauro kya bhono bhaatëëbhiibhwi,
bhakamuhira ubhutikö bhuyö bhakahika mu-mughi ghono ghokobherekerwa igha Antipatiri.
32 Hano bhwaakëëyë,
abhasirikare bhano bhaaghendanga urwa amaghörö,
bhakakyora mo-bhogho ubhwabho.
Bhakatigha bharikyabho abha sefaraasi bhahire Pauro.
33 Hano bhayö bhaahikirë Kaisaaria,
bhakahaana ömötöngi ritashandighi reera,
bhakamöghöötya na Pauro.
34 Hano yaamarrë okosoma ritashandighi riyö,
akabhöörya igha,
“Ömöntö ono,
wa ikyaro kë?”
Hano yaatëëbhiibhwi igha Pauro nu-uwa ikyaro ikya Kirikia,
35 akatëëbhya Pauro igha,
“Ikiina ikyaho,
ndikitegherra hano abhashöngëri abhaaho bhariisha.”
Ömötöngi uyö akaraghërrya igha,
Pauro anaghibhwi mu-ghunyumba ughwa öbhötöngi ubhwa Herode.