Ökötööribhwa ukwa Sauri
9
Ku-ribhagha riyö ryonswe igho,
Sauri yaasëmërrëëyë na ibhyöbhöhërryö ibhyaye,
ibhya ukwita abheegha abha Omonene Yëësu.
Akaghya ko-monene uwa abhasëngëri,
2 akamosabha amohaane amatashandighi,
agha ukuhira ku-sinyumba isya esango iya Abhayahudi mu-mughi ughwa Damasiko.
Yaakörrë igho okore hano araanyoore-yo abhasoorani abha Yëësu,
mbakaabha abhakari handë abhashaasha,
abhareete Yërusarëëmu bhabhöhirwë.
3 Mbe,
Sauri akeemoka,
akaghya Damasiko.
Hano yaahikirë haangʼë na umughi ughwa Damasiko,
örömësyö oronene ukurwa kighörö mu-ryobha,
rokamömërëkërya mbaara syonswe igho,
kamwë igho.
4 Akaghwa hansë,
akaighwa engamba eramöbhöörya igha,
“Sauri!
Sauri!
N-kwakë ukunnyankya igho?”
5 Sauri akabhöörya igha,
“Kana Omonene,
nu-uwe wë?”
Engamba iyö ekamohonshora igha,
“Nö-öni Yëësu ono ukunyankya.
6 Bhoono emoka,
oghende,
osohe mu-mughi ghuyö,
muyö mo oraatëëbhibhwi keno oraakore.”
7 Abhashaasha bhano bhaarë ko-roghendo hamwë na Sauri,
bhakaimerra bhakakira kiri,
ko bhoora bhaaighuurë engamba,
kasi tebhaarööshë ömöntö wowonswe oora hë.
8 Sauri akeemoka ukurwa hansë hayö.
Hano yaashaashiri okoramökya amaiso,
okanyoora ahukurrë.
Mbe,
bharikyaye bhakamoghooterra okobhoko bhakamoraahuuna ukughya Damasiko.
9 Akaikara-mo sinsikö isatö atakomaaha.
Ku-ribhagha riyö ryonswe igho,
tiyaaryanga,
handë ukunywa ëkëntö kyokyonswe keera hë.
10 Yaare-ho umwegha uwöndë uwa Omonene Yëësu Damasiko hayö,
ono yaabherekerwanga igha,
Anania.
Omonene Yëësu akamobherekera mo-mamaaho igha,
“Anania!”
Anania akaitabha igha,
“Omonene uwaane,
hano ndë.”
11 Omonene akamötëëbhya igha,
“Bhoono uwe kaghi wa Yuuda,
ghörëngë ko-nshera eno ekobherekerwa igha,
enshera ëndöngë.
Hano oraahike ku-mughi kuyö öbhööri-ko ömöntö ono arwërëëyë mu-mughi ughwa Tariso,
iriina iryaye arabherekerwa igha Sauri.
Bhoono nkosaasaama arë Waryobha.
12 Kora akörööshë uwe Anania mo-mamaaho,
igha ösöhirë mu-nyumba,
oramotoorra amabhoko okore amaahe ghwiki.”
13 Kasi Anania akamohonshora igha,
“Omonene,
naighwa amangʼana ukurwa ko-bhantö abhaaru,
kya bhono Sauri uyö yaakorra abhantö abhaaho abhahörëëru amangʼana amaghogho Yërusarëëmu iyö!
14 Hayö arë,
naana ubhwera ukurwa ko-bhanene abha abhasëngëri,
okore aghoote abhakumya abhaaho bhonswe igho.”
15 Kasi Omonene akamohonshora igha,
“Uwe kaghi!
Ömöntö uyö,
nö-öni mushaaghööyë,
ankorre emeremo.
Uyö we araaraareke amangʼana aghaane,
ko-Bhakyaro,
abhakama abhaabho,
na ko-Bhaisiraëri.
16 Nendaamwöröki kya igho araatundësibhwi bhököngʼu,
ko okoghera iya iriina iryane.”
17 Anania akaghya igho,
akasoha mu-nyumba iyö.
Akatoorra Sauri amabhoko,
akamötëëbhya igha,
“Umukumya murikyane Sauri,
Omonene Yëësu ono yaaköbhööshökëëyë ko-nshera,
enkaagha eno waashanga hano,
antömirë ku-uwe.
Antömirë,
okore omaahe ghwiki,
kora wishöribhwi Umwika Ömöhörëëru.”
18 Kamwë igho ëbhëntö kya amaghambaraara,
bhekaghwa ukurwa ko-maiso agha Sauri,
akamaaha ghwiki.
Akeemoka,
akabhatiisibhwa.
19 Hano yaamarrë okorya ibhyakorya,
akanyoora ghwiki singuru.
Sauri arakora emeremo Damasiko
Sauri uyö,
yaaikaayë na abheegha abha Yëësu sinsikö nyabhorebhe Damasiko iyö.
20 Akasimya këmwë okoraareka mu-sinyumba isya esango iya Abhayahudi.
Yaaraarekanga igha,
“Yëësu m-Moona uwa Waryobha.”a
21 Abhantö bhano bhonswe igho bhaaighuurë bhono Sauri yaaraarekanga,
mbaaröghöörrë.
Bhakaibhöörya igha,
“Kana,
ömöntö ono to-oora yaatundësyanga abhakumya abha Yëësu Yërusarëëmu eera?
Te-we yaasha hano igha abhaghoote,
abhabhohe,
abhahire ko-bhanene abha abhasëngëri?”
22 Okoraareka ukwa Sauri nkwaabhaayë na singuru bhököngʼu,
kora akaröngëhërrya Abhayahudi abha Damasiko kohetera Amaandeko Amahörëëru igha,
Yëësu we Kiristo.
Bhakabhorwa engʼana iya okomohonshora.
23 Hano sinsikö syaahëtirë-ho këmwëkëmwë,
Abhayahudi bhakakora inikö iya ukwita Sauri.
24 Bhakabha bharamoghonyera ubhutikö na omobhasö mu-bhihiita ibhya umughi ghuyö,
okore hano araarishoke bhamwite.
Kasi Sauri akasimwa inikö iyö.
25 Mbe,
urusikö urwöndë ubhutikö,
abheegha abhaaye,
bhakamotoora mu-ritonga rinene,
reno bhaabhöhirë-ko sinsiri.
Bhakarëhëtya mu-ribhanga rinene irya ku-ndighi,
ko-bhogho ubhwa umughi ghuyö,
bhakamwikya kebhara iya umughi,
akaghya iyö akughya.
Sauri arakyora Yërusarëëmu
26 Mbe,
Sauri akaghya Yërusarëëmu.
Hano yaahikirë iyö,
akashaashya okoghootana na abheegha bha Yëësu.
Kasi abheegha bhonswe igho mbaamwöbhöhirë,
ko bhoora tebhaakumiri igha,
Sauri wonswe bhoono,
abhaaye umwegha uwa Yëësu.
27 Kasi Bharinaabha,
akamuhira ko-bhatomwa abha Yëësu,
akabharaghërrya kya igho Sauri yaasikaini na Omonene Yëësu ko-nshera,
enkaagha eno yaaghyanga Damasiko,
na kya bhono Omonene Yëësu yaashumaashirë na Sauri.
Kora akabhatëëbhya kya igho Sauri yaabhaayë na obhokarë ubhwa ukushumaasha amangʼana agha Yëësu na abhantö abha iyö.
28 Mbe,
Sauri uyö,
akaikara hamwë na abhatomwa Yërusarëëmu hayö.
Akainaaranaara Yërusarëëmu muyö,
arëëghya abhantö amangʼana agha Omonene Yëësu ko obhokarë.
29 Uyö we yaanyeeraini senkaani na Abhayahudi bhano bhaashumaashanga Ikiyunaani.
Abhayahudi bhayö,
bhakatuna igha bhamwite.
30 Hano abhakumya bharikyaye bhaangʼurrë engʼana iyö,
bhakangʼaaraara nawe ukughya mu-mughi ughwa Kaisaaria.
Bhakamotoma Tariso.
31 Mbe,
ekanisa ekabha na omorembe ahasë honswe igho,
Yudea,
mo-mokowa ughwa Ghariraaya na Samaaria.
Abhakumya bhakaghëndërrya okonagha,
na okosooka Omonene Yëësu.
Ko okoseghwa na Umwika Ömöhörëëru,
abhantö bhakaaruha mo-kanisa.
Ainea arahwënibhwa
32 Peetero akabha arainaaranaara ahasë honswe igho,
akakamba akahika ko-bhantö abha Waryobha bhano bhaarë mu-mughi ghono ghwaabherekerwanga igha Rida.
33 Akasikana-yo na ömöntö uwöndë ono yaabherekerwanga igha Ainea.
Ainea uyö,
m-mörööyë uwa risusu yaarë.
Tiyaabhookanga ukurwa kwi-shambi,
ku-ribhagha irya imyoka monaane.
34 Peetero akamötëëbhya igha,
“Ainea,
Yëësu Kiristo akuhwëni!
Bhooka waari rishambi iryaho.”
Ainea akaimerra kamwë igho.
35 Mbe,
abhantö bhonswe igho bhano bhaamënyirë Rida na mu-ribhate reno ryaabherekerwanga igha Saröni,
bhakaisyörrya Omonene Yëësu,
ko bhono bhaarööshë Ainea araghenda.
Peetero araryökya Dorikaasi
36 Yaare-ho omokari uwöndë mu-mughi ghono ghwaabherekerwanga igha Yafa,
omokari uyö,
m-mwegha uwa Omonene Yëësu yaarë.
Yaabherekerwanga igha Tabhita,
(mu-Kiyunaani ni-igha Dorikaasi,
ensonga iyaaryo ni-igha ënsöku).
Yaakorranga abhantö ubhwa heene na yaatöörryanga abhatöbhu.
37 Ekahika-ho enkaagha,
Tabhita uyö akaroora,
akakwa.
Abhantö bhakööghya ömöbhërë ughwaye,
bhakaghoraarya mu-kinyumba keno kyaarë ko-ghorofa.
38 Abheegha abha Yafa hayö,
bhakaighwa igha Peetero arëngë Rida.
Umughi ughwa Rida,
n-haangʼë ghwaarë na umughi ughwa Yafa.
Ku bhuyö bhakatoma abhashaasha bhabhërë ko-Peetero,
bhamötëëbhi igha,
“Torakosaasaama,
utwangohere otakaategheta!”
39 Ku bhuyö Peetero akatanora,
akahinana nabho.
Hano bhaahikirë Yafa,
bhakamuhira mu-kinyumba ikya ko-ghorofa.
Mu-kinyumba muyö,
bhaare-mo abhasinö abhaaru,
bhakamwinaara,
bharakuura na eno bharamwörökya sengansho,
na singibho isyëndë seno Dorikaasi yaakörrë akërëngë ömöhöru.
40 Peetero akabharishökya kebhara bhonswe igho.
Akatema hansë ibhiru,
akasaasaama Waryobha.
Akaisyörrya ikihundughu kiyö,
akakëtëëbhya igha,
“Tabhita,
bhooka!”
Hano Tabhita yaaramökëri amaiso akamaaha Peetero,
akaikara.
41 Peetero akamoghooterra okobhoko,
akamötöörrya aimerre.
Akabherekera abhasinö bhayö hamwë na abhantö abhandë abha Waryobha.
Akabhahërrya Tabhita arëngë möhöru.
42 Amangʼana ghayö,
ghakaromaana bhököngʼu mu-mughi ghuyö ghonswe igho.
Abhantö abhaaru bhakakumya Omonene Yëësu.
43 Peetero akaikara Yafa hayö sinsikö sinsharu këmwë.
Yaaikaayë mu-nyumba iya omobhambi uwa amaseero,
ono yaabherekerwanga igha Simööni.