Amangʼana agha Abhatomwa 8

1-2 Sauri wonswe yaaikererrraini na ukwitwa ukwa Sitefaano. Mbe, abhantö bhano bhaaighweranga Waryobha, bhakabheeka Sitefaano, bhakamokoorra bhököngʼu.

Urusikö roora Sitefaano yaaitirwë, abhantö abha ekanisa iya Yërusarëëmu, bhaanyankiibhwi bhököngʼu, kora bhakanyaraghana. Abhaaru mbaangʼösirë, kasi abhatomwa abha Yëësu abheene igho, mbo bhaatighaayë Yërusarëëmu hayö. Bhano bhaangʼösirë, mbaangʼösëëyë mo-mokowa ughwa Yudea na Samaaria. 3 Sauri wonswe yaarenga asimiri ukusikya abhantö abha ekanisa. Yaasohanga mu-sinyumba isyabho, arabhahorotora-mo kwa nguru, abhakari na abhashaasha bhano yaanyooranga-mo, abhahira mu-nyumba iya ekebhohe.

Firipö araghya Samaaria

4 Abhakumya bhayö bhaanyaraghaini, ahasë honswe igho hano bhaaghyanga, mbëëghyanga-yo abhantö Amangʼana Amaiya agha Yëësu. 5 Firipö wonswe hano yaangʼaararrë ukughya mu-mughi ghono ghwaabherekerwanga igha Samaaria, akasimya okoraarekera abhantö abha iyö amangʼana agha Kiristo. 6 Abhantö abhaaru bhaamwitegherranga bhuuya ko okoghera iya ebhemanyërryö ibhya amakono bheno bhaamaahanga arakora. 7 Yaatanga amasambwa ukurwa ko-bhantö abhaaru. Hano amasambwa ghaarwanga ko-bhantö bhayö, ngaakoranga ikituri. Yaahwënianga abhantö abhaaru, amatengʼo na abha amasusu. 8 Ku bhuyö, abhantö abha mu-mughi ughwa Samaaria, bhakashomerwa bhököngʼu.

Peetero arahamera Simööni umuturutumbi

9 Mbe, mu-mughi ughwa Samaaria muyö, yaare-mo ömöntö ono yaabherekerwanga igha Simööni. Simööni uyö, m-muturutumbi yaarë. Yaaröghööryanga abhantö abha mu-mughi muyö ku-ribhagha ritambë, ko okokora amakono agha ubhuturutumbi, na eno araihasha igha, m-möntö omonene. 10 Abhantö bhonswe igho, abhake na abhanene, mbaamwitegherranga bhuuya. Bhakaghamba igha, “Ono we obhotoro ubhwa Waryobha, bhono bhomanyekaini igha, ‘Nu-bhuhika Obhonene ubhwa Waryobha.’” 11 Abhantö bhayö Mbaaghëndërryanga ukumwitegherra, ko bhoora yaabharöghöörri ku-ribhagha ritambë, ko-makono agha ikiturutumbi ghano yaakoranga.

12 Kasi hano Firipö yaabharaarëkëëyë Amangʼana Amaiya agha Obhokama ubhwa Waryobha, na iriina irya Yëësu Kiristo, bhakakumya bhonswe igho. Bhakabhatiisibhwa abhakari na abhashaasha. 13 Simööni umwene wonswe akakumya Yëësu, akabhatiisibhwa. Akabha arasoorana Firipö. Hano yaarööshë ebhemanyërryö na amakono amanene ghano Firipö yaakoranga, akaroghoora.

14 Hano abhatomwa abha Yëësu abha Yërusarëëmu eera bhaaighuurë igha, abhantö abha mu-mughi ghono ghwaabherekerwanga igha Samaaria, bhaakumiri engʼana iya Waryobha, bhakatoma-yo Peetero bhaana Yohana. 15 Hano abhatomwa bhayö bhaahikirë-yo, bhakasabhera abhakumya abhahya, okore bhanyoore Umwika Ömöhörëëru, 16 ko bhoora mo-bhakumya bhayö, tiyaare-mo ömöntö kora ömwë, ono yaarenga aitöömëëywë na Umwika Ömöhörëëru. Mbaabhatiisiibhwi ko okohetera iriina irya Omonene Yëësu iryene igho. 17 Peetero na Yohana mbaatorranga abhakumya abhahya amabhoko, bhaitoomerwa na Umwika Ömöhörëëru.

18 Hano Simööni yaarööshë igha, abhatomwa nkotoorra bharë abhantö amabhoko bhanyoora Umwika Ömöhörëëru, akashaashya okohaana Peetero bhaana Yohana seehera. Akabhatëëbhya igha, 19 “Motangʼana-ko öni wonswe obhotoro bhuyö, okore hano ndatorrenga ömöntö amabhoko, anyoora Umwika Ömöhörëëru.”

20 Peetero akamohonshora igha, “Otataaniina ukughya iyö na seehera isyaho siyö, ko bhoora nkokanya örë igha, ituho iya Waryobha nköghöribhwa ërë! 21 Uwe, tosange kyokyonswe keera ko-meremo gheno hë, ko bhoora enkoro iyaaho, ti-iya heene ku-Waryobha hë. 22 Ku bhuyö ni-igha ohongore obhoghogho ubhwaho bhuyö, osabhe Omonene akwabhere. Handë aratora ukukwabhera amaitegherro amaghogho ghayö onagho mo-nkoro yaaho. 23 Ndööshë igha, noona rikenge rinene, kya öbhörrö ubhwa endorwe. Kora noona ibhiriisha ibhya ëbhëbhë ibhyaho.” 24 Simööni akamohonshora igha, “Monsaasaamere ko-Monene, okore ntakaanyoorwa na engʼana kora ëmwë iya ghayö moghambirë!”

25 Hano Peetero na Yohana bhaamarrë ukwimererra Omonene Yëësu, na ukwëghya abhantö abha mu-mughi muyö amangʼana aghaaye, bhakakyora Yërusarëëmu. Mbaaraarekeranga abhantö Amangʼana Amaiya ghayö, mu-bhishishi ibhyaru ibhya Abhasamaaria, bheno bhaaheteranga-mo ko-roghendo urwabho urwa ukukyora Yërusarëëmu.

Firipö na omonene uwöndë uwa Ëtiöpia

26 Urusikö urwöndë, maraika uwa Omonene Waryobha yaatëëbhëri Firipö igha, “Tanora obhate orobhareka urwa syömya, ko-nshera eno ikurwera Yërusarëëmu, erangʼaaraara okohetera ku-riköngö eraghya Ghaza.” 27 Firipö akatanora, akaheta ko-nshera iyö, akasikana-ko na omonene uwöndë ono yaatabhuta umuhyö mo-ketende uwa ikyaro ikya Ëtiöpia. Omonene uyö, mu-waziri uwa seehera yaarë, uwa Kandake omokama omokari uwa ikyaro ikya Ëtiöpia. Omotabhuti uwa umuhyö mo-ketende uyö, waanyöörrë aghëëyë Yërusarëëmu okosaasaama-yo Waryobha. 28 Enkaagha iyö, yaakyoranga yeeka aikaayë mo-keghaari ikyaye, keno kyaarutwanga na sefaraasi, arasoma eketabho ikya ömörööti Isaaya.

29 Umwika uwa Waryobha, akatëëbhya Firipö igha, “Suntarra ekeghaari kiyö, uhinane nakyo.” 30 Firipö akakekenyerra, akakehekeera. Akaighwa omonene oora arasoma eketabho ikya ömörööti Isaaya, akamöbhöörya igha, “M-maheene igha nkomanyërrya örë amangʼana ghayö okosoma muyö?” 31 Omotabhuti uwa umuhyö mo-ketende uyö, akamohonshora igha, “Iyakë ndaaghamanyërri ömöntö atanyörökërrëëyi?” Akamösërëënia ariine, aikare nawe hamwë mo-keghaari muyö. 32 Amaandeko Amahörëëru ghano omonene uyö yaasomanga, n-gaara ghandëkirwë igha,

“Yaatangatiibhwi kya ringʼöndi reno rikughya ukushinshwa.

Akakira kiri, kora tiyaamurri engʼana hë.

Akabha kya ekemaanwa ikya ringʼöndi bhono kikukira hano kyakebhwa amashuurëërya.

33 Bhaamösërrë, kora tebhaamöbhötörrëëyë ikiina ikyaye ubhwa heene hë.

Taaho ömöntö ono akaatörrë ukushumaashera amangʼana agha rekora ryaye,

ko bhoora nko-kebhara kono yaaitëëywë.”

34 Ömöntö uyö yaatabhuta umuhyö mo-ketende akabhöörya Firipö igha, “Ömörööti ono, n-kë akushumaashera hano? Nu-mwene akwishumaashera, kasi m-möntö wöndë akushumaashera?” 35 Mbe, Firipö akasimirya ko-Maandeko Amahörëëru ghayöghayö, akaghëndërrya okomoraghërrya Amangʼana Amaiya agha Yëësu.

36 Hano bhaaghendanga ko-nshera kuyö, bhakahika ahasë hano haarenga na amanshë. Omotabhuti uwa umuhyö mo-ketende uyö, akatëëbhya Firipö igha, “Maaha, amanshë n-gaayö hayö! Otambatiisya ndarra amanshë n-gaayö hayö?” [ 37 Firipö akamohonshora igha, “Nendaakobhatiisi hano oraakumi Yëësu Kiristo ko nkoro iyaaho yonswe igho.” Umwene wonswe akamohonshora igha, “Nkukumia ndë igha, Yëësu Kiristo, m-Moona uwa Waryobha.”] 38 Omonene uyö akahamera ekeghaari kyemerre. Mbe, bhonswe igho bhabhërë bhakaika ukurwa mo-keghaari, bhakaghya mo-manshë. Firipö akamobhatiisya. 39 Hano bhaaruurë mo-manshë, Umwika uwa Omonene Waryobha, akasakörya Firipö. Omotabhuti uwa umuhyö mo-ketende uyö, tiyaamarrë ghwiki amaahe Firipö röndë hë. Akaghëndërrya na oroghendo urwaye na eno ashömëëywë. 40 Mbe, Firipö akatookera arëngë mu-mughi ghono ghwaabherekerwanga igha Azoto. Akaheta mu-mighi ghyonswe igho, araraarekera abhantö Amangʼana Amaiya, akahika mu-mughi ghono ghwaabherekerwanga igha Kaisaaria.