Yohana 1

Amangʼana Amaiya agha Yëësu Kiristo

kya igho ghaandëkirwë na

Yohana

Engʼana yaaishirë akabha ömöntö

Bhosemoka hayö, yaare-ho Engʼana. Engʼana iyö, yaarenga hamwë na Waryobha, ghwiki yo yaarë Waryobha. 2 Ukurwa obhosemoka, Engʼana yaarenga hamwë na Waryobha. 3 Ëbhëntö bhyonswe igho, mbyaabhömbirwë ko okohetera ku-uyö akobherekerwa igha Engʼana, kora tekeeho ëkëntö kora ëkëmwë keno ketaabhömbirwë okohetera ku-uyö. 4 Uyö we yaarë esemoko iya öbhöhöru bhwonswe igho, na öbhöhöru bhuyö, mbo bhokoreeta obhorabhu ko-bhantö. 5 Obhorabhu bhuyö, nkömërëkya bhörë mu-kisuntë, kora ikisuntë tekekobhokera hë.

6 Yaaishirë ömöntö, ono yaatömirwë na Waryobha, ömöntö uyö yaabherekerwanga igha, Yohana. 7 Yohana uyö, yaaishirë kya umwimërërri, aimererre obhorabhu bhuyö, okore abhantö bhonswe igho, bhakumi ko okohetera ubhwimërërri ubhwaye. 8 Yohana umwene, te-we yaarë obhorabhu bhuyö hë, kasi yaaishirë ukwimererra amangʼana agha obhorabhu bhuyö. 9 Obhorabhu ubhwenebhwene, bhono bhokohaana abhantö bhonswe igho obhorabhu, nko-nshera bhwaarë bhoraasha ko-kebhara kono.

10 Uyö we yaarë ko-kebhara kono, kora ekebhara nkyaabhömbirwë okohetera ku-uyö, kasi abhantö tebhaamomanyërrëëyi hë. 11 Yaaishirë ko-bhantö abhaaye, kasi bho tebhaamwikërëëyi hë. 12 Kasi abhantö bhonswe igho bhano bhaamukumiri, yaabhakörrë bhabhe abhaana abha Waryobha. 13 Abhaana abha Waryobha bhayö, te-bhano bheebhorwa kinyamöbhërë, handë ko okohansha ukwa ömöntö, handë bhono ömöntö akutuna, kasi no-kohansha ukwa Waryobha umwene.

14 Mbe, uyö akobherekerwa igha Engʼana, yaabhaayë ömöntö, kora akaikara mö-bhëëtö. Tokamaaha ubhuhika ubhwaye, ubhuhika ubhwa Omoona umumwëmwë ono akurwa ko-Taata, aishööyë örööbhö na obhoheene.

15 Yohana akaimererra amangʼana agha Yëësu, akakonga aratëëbhya abhantö bhayö igha, “Ono we naabhatëëbhyanga igha, ‘Araasha ömöntö nyuma yaane, omonene konkera, ko bhoora ho yaarë kora öni ntareebhorwa.’”

16 Ko okorengʼaana na obhohekeranu ubhwaye, abhantö bhonswe igho twaanyoora örööbhö, kö rööbhö urwöndë. 17 Ko bhoora Waryobha yaarëëtirë amaraghërryö aghaaye ko okohetera Mosa, bhoono arëëtirë örööbhö na obhoheene ubhwaye ko okohetera ku-Yëësu Kiristo. 18 Taaho ömöntö ono yaamaaha Waryobha hë. Kasi Omoona umumwëmwë, ono ghwiki ërëngë igha we Waryobha, ono aana öbhömwë na Taata Waryobha, uyö we yaaghërrë tokamanya Waryobha.

Ubhwimërërri ubhwa Yohana Omobhatiisya

(Mataayo 3:1-12; Maariko 1:1-8; Ruuka 3:1-18)

19 Urusikö urwöndë, abhatangati abha Abhayahudi bhaatömirë abhasëngëri na Abharaawi ukurwa Yërusarëëmu, bhabhööri Yohana igha, “Nu-uwe wë?” 20 Akabhatobhorra, tiyakaanirë hë. Akabhatobhorra igha, “Öni tëndëngë Kiristo hë.” 21 Mbe, bhakamöbhöörya ghwiki igha, “Bhoono nu-uwe wë? Nu-uwe ömörööti Ëriya?” Akabhahonshora igha, “A a, tö-öni Ëriya hë.” Bho bhakabhöörya ghwiki igha, “Nu-uwe ömörööti oora tokoghanya ukurwa ku-Waryobha?” Yohana akabhahonshora igha, “A a, tö-öni hë.” 22 Bhakamöbhöörya ghwiki igha, “Kana nu-uwe wë? Tötëëbhi okore toherre amangʼana bhano bhatötömirë igha nu-uwe wë. Bhoono uwe umwene, iyakë ukwishumaashera?” 23 Yohana akabhahonshora ko okorengʼaana na amangʼana agha ömörööti Isaaya ghano yaaghambirë igha, “Öni no-oora

‘akokonga ku-riköngö iyö igha,

“Mösëëmëri Omonene Waryobha enshera,

mokore bhuuya, ahasë hano araahete! ”’”

24 Mo-bhantö bhano bhaatömirwë bhaghende ku-Yohana, Abhafarisaayo mbaarenga-mo. 25 Mbe, bhakabhöörya Yohana igha, “Nyoore otarëngë Kiristo, handë ömörööti Ëriya, handë ömörööti oora tokoghanya ukurwa ku-Waryobha, n-kwakë okobhatiisya?” 26 Yohana akabhahonshora igha, “Öni na-manshë nkobhabhatiisirya, kasi aaho ömöntö mö-bhëënyu mono, ono motamanyirë. 27 Uyö we akuusha nyuma iyaane. Kora öni tiningʼarëëyi okotashora siinuugha isya ebheraatö ibhyaye.”

28 Amangʼana ghayö ngaaikörrë mu-kishishi ikya Bhetania, orobhareka urwa röghörö urwa omooro ughwa Yorodani, ahasë hano Yohana yaabhatiisiryanga-ho abhantö.

Yëësu no-moona Ringʼöndi uwa Waryobha

29 Urusikö rono rwaarööbhëëyë, Yohana yaarööshë Yëësu araasha ko-we. Akatëëbhya abhantö bhano bhaarenga haara igha, “Maaha, uyö we Omoona Ringʼöndi uwa Waryobha, ono akuruusya-ho ëbhëbhë ibhya ko-kebhara kono! 30 Ono we naarë kobhatëëbhyanga igha, ‘Araasha ömöntö nyuma yaane, omonene konkera, ko bhoora ho yaarë kora öni ntareebhorwa.’ 31 Tenamomanyërrëëyi bhuuya hë, kasi öni naasha okobhatiisya abhantö, okore amanyekane ko-Bhaisiraëri.” 32 Mbe, Yohana akabhatëëbhya igha, “Naarööshë Umwika Ömöhörëëru aramwitoomera kya ikighuuti ukurwa mu-ryobha na akamwikarra. 33 Öni tenaamomanyirë hë, kasi Waryobha ono yaantömirë okobhatiisya, we yaantëëbhëri igha, ‘Ömöntö ono oraamaahe Umwika uwaane aramwitoomera na ukumwikarra, omanye igha, uyö we akobhatiisya abhantö ku-Mwika Ömöhörëëru.’ ” 34 Mbe, Yohana akaghëndërrya okoghamba igha, “Öni namaaha amangʼana ghayö, ku bhuyö nkwimererra ndë igha, uyö we Omoona uwa Waryobha.”

Abheegha abha mbere abha Yëësu

35 Ghwiki urusikö rono rwaarööbhëëyë, Yohana okanyoora aimërëëyë hayö, hamwë na abhabhërë abha abheegha abhaaye, 36 akamaaha Yëësu araghenda haangʼë nabho. Akaghamba igha, “Maaha, uyö we Omoona Ringʼöndi uwa Waryobha!” 37 Mbe, hano abheegha abhabhërë bhayö abha Yohana bhaaighuurë araghamba igho, bhakasoorana Yëësu. 38 Mbe, Yëësu akaisyörya, akamaaha abheegha bhayö bharamosoorana. Akabhabhöörya igha, “N-kë mukutuna?” Bho bhakamohonshora igha, “Raabhi, kana hai ömënyirë?” Ensonga iya engʼana iyö “Raabhi,” ni-igha, umwëghya. 39 Yëësu akabhahonshora igha, “Muushe mbe mohamaahe.” Ku bhuyö bhakaghya, bhakamaaha hano amënyirë, bhakaikara nawe urusikö ruyö. Enkaagha iyö, yaarenga kya saa ikömi isya omoghoroobha.

40 Mo-bheegha abhabhërë bhano bhaaighuurë ghano Yohana yaaghambirë bhakasoorana Yëësu, yaabherekerwanga igha Anderea, mura uwaabho Simööni Peetero enda ëmwë. 41 Kamwë igho, akaghya ukutuna Simööni, mura uwaabho. Hano yaamunyöörrë, akamötëëbhya igha, “Törööshë Mesiya!” Ensonga iyaamo ni-igha, Kiristo. 42 Mbe, Anderea akareeta Simööni ku-Yëësu. Yëësu akamaaherra Simööni, akamötëëbhya igha, “Iriina iryaho nu-uwe Simööni, omoona uwa Yohana. Kasi bhoono noraabherekerwenga igha, Keefa.” Ensonga iya iriina riyö ni-igha Peetero, handë igha, ritare.

Yëësu arashaaghora abheegha abhandë abhabhërë

43 Urusikö rono rwaarööbhëëyë, Yëësu akamaaha igha aghende mo-mokowa ughwa Ghariraaya. Akamaaha-yo Firipö, akamobherekera igha, “Nshö onsoorane.” 44 Firipö yaarenga ömöntö uwa umughi ughwa Bhëtisaida, mono Anderea na Peetero bhaamënyirë.

45 Mbe, Firipö akamaaha Natanaëri, akamötëëbhya igha, “Törööshë ömöntö ono Mosa yaandëkirë amangʼana aghaaye mo-ketabho ikya Amaraghërryö, kora ömöntö uyö, we abharööti bhonswe bhaandëkirë amangʼana aghaaye. Iriina iryaye ni-igha Yëësu uwa Nazarëëti, omoona uwa Yusufu.” 46 Kasi Natanaëri akabhöörya Firipö igha, “Ëkëntö ikiiya keratora ukurwera Nazarëëti?” Firipö akamohonshora igha, “Nshö omaahe.”

47 Hano Yëësu yaarööshë Natanaëri araasha, akaghamba igha, “Momaahe Umwisiraëri ekenaina, ono ataana obhoghashaghasha.” 48 Natanaëri akabhöörya Yëësu igha, “Hai waamanyera amangʼana aghaane?” Yëësu akamohonshora igha, “Nënkörööshë hano waarë ku-mutiini haara, kora Firipö ataraakobherekera.” 49 Natanaëri akamohonshora igha, “Raabhi, uwe m-Moona uwa Waryobha örë! Nu-uwe Omokama uwa Isiraëri!” 50 Yëësu akamöbhöörya igha, “Nkukumya örë ko bhono nkötëëbhëri igha, nkörööshë hano waarë ku-mutiini haara? Nomaaha amangʼana amarito okokera ghano!” 51 Ho yaamarrë akamötëëbhya igha, “No-bhoheene nkobhatëëbhya igha, moremaaha mu-ryobha hahönyökirë, abhamaraika abha Waryobha bharariina na ukwika ku-öni Omoona uwa Ömöntö.”