Ukuryoka ukwa Yëësu
24
Hano öröghörö rwaasambirë,
urusikö urwa Jumapiri,
abhakari bhayö,
bhakaghegha amaghuta ghano ghakurumbaasa,
ghano bhaarenga bhasëëmëri,
bhakaghya ko-mbeehera.
2 Ryaare-ho reghena rinene,
reno ryaarenga risiikirë ko-mbeehera hayö.
Hano bhaahikirë,
bhakanyoora rihingirrwë,
rëtöörrwë mbareka.
3 Bhakasoha-mo,
kasi bhakanyoora ikihundughu ikya Omonene Yëësu te-keemo hë.
4 Hano waanyöörrë bhakeeroghoorra engʼana iyö,
hake igho,
abhashaasha bhabhërë bhakaimerra haangʼë nabho.
Abhashaasha bhayö,
bhaarenga bhatöörrë singibho seno sekomekameka,
sendabhu shaa!
5 Abhakari bhayö bhakoobhoha bhököngʼu.
Bhakahiinya ubhusyö hansë.
Kasi abhashaasha bhayö bhakabhatëëbhya igha,
“Ndarra nkutuna mörë ömöhöru mo-bhaku?
6 Ta-hano hë,
aryökirë.
Kora timukuhiita amangʼana ghaara yaabhatëëbhëri hano yaarenga hamwë na bhëënyu mo-mokowa ughwa Ghariraaya haara?
7 Yaabhatëëbhëri igha,
‘Omoona uwa Ömöntö,
ni-igha ahirwe ko abha ëbhëbhë,
ahanekwe ko-mosarabha,
na ghwiki urusikö urwa katatö,
nariryoka.’ ”
8 Hayö ho bhaahiitirë amangʼana ghano Yëësu yaaghambirë.
9 Hano bhaakyörrë ukurwa mo-mbeehera,
bhakatëëbhya abhatomwa ikömi na ömwë bhaara,
na abhantö abhandë bhano bhaare-ho,
amangʼana ghayö.
10 Abhakari bhayö,
m-baabho Maryamu uwa Maghidara,
Yoana,
Maryamu nyakuwaabho Yaakobho,
na bhano bhaarë hamwë nabho.
11 Kasi bhayö bhaaitegherranga amangʼana ghayö bhaatëëbhiibhwi na abhakari bhayö,
tebhaakumiri hë,
bhakamaaha igha,
m-busheema.
12 Kasi Peetero akeemoka,
akakenya kughya ko-mbeehera,
hano yaahikirë,
akaihiinya ukusyömërrya,
akamaaha-mo esanda iyeene igho.
Akakyora araibhöörya igha,
“Kana nkë kebhaayë?”
Oroghendo urwa ukughya Emau
13 Ekabha igha,
omoghoroobha ughwa urusikö ruyöruyö urwa Jumapiri,
abheegha abhabhërë abha Yëësu,
bhaarenga ko-roghendo,
urwa ukughya mu-kishishi keno kyaabherekerwanga igha,
Emau.
Ukurwa Yërusarëëmu ukughya Emau,
n-kya sikiromiita ikömi na ëmwë.a
14 Na amangʼana ghayö ghaaikörrë,
ngo bhaashumaasheranga.
15 Enkaagha iyö bhaarenga bhakiishumaasha,
Yëësu akabheeshera,
akaghendania nabho.
16 Bhakamomaaha,
kasi Waryobha akakora bhaange komomanyërrya.
17 Akabhabhöörya igha,
“Kana m-mangʼana kë ghayö mukushumaashera ko-nshera kono?”
Bhakaimerra na eno bhasorombaayë.
18 Ömwë uwaabho ono yaabherekerwanga igha Kireopa,
akamohonshora igha,
“Kana hai urwërëëyë,
kora tomanyirë amangʼana ghano ghaikörrë Yërusarëëmu bhöngö hano?”
19 Wonswe akamöbhöörya igha,
“N-ghaahë ghayö?”
Bhakamohonshora igha,
“Amangʼana agha Yëësu uwa Nazarëëti.
Yëësu uyö,
yaarë ömörööti uwa obhotoro ko obhoghambi ubhwaye,
na ko-mangʼana aghaaye ku-Waryobha na ko-bhantö bhonswe igho.
20 Kasi abhanene abha abhasëngëri,
na abhatöngi abhëëtö,
bhakamuhira,
okore ashibhibhwi,
ubhushibhu ubhwa ukwitwa,
bhakamohaneka ko-mosarabha.
21 Kasi bhëëtö,
ntwaaitengʼeranga igha,
we Kiristo ono akaatutunguuyi Abhaisiraëri.
Na reero,
nu-rusikö urwa katatö,
ukurwa rono ghayö ghaaikörrë.
22 “Tohaatere ghayö,
abhakari abhandë ukurwa mu-rikomo iryëtö mono,
mbatöröghöörri reero,
hano bhaarë bhamutirë ukughya ko-mbeehera nyinkyo shiri,
23 bhaanyoora ikihundughu te-keemo hë.
Bhakakyora bhakaghamba igha,
bharööshë amamaaho agha abhamaraika bhano bhabhatëëbhëri igha,
Yëësu aryökirë.
24 Kora na bharikyëtö abhandë bhonswe bhakaghya ko-mbeehera,
bhakanyoora amangʼana,
n-kya bhoora abhakari bhayö bhaghambirë.
Kasi Yëësu umwene,
tebhaamörööshë hë.”
25 Yëësu akabhatëëbhya igha,
“Ë!
Bhëënyu mbe mwakangiha!
N-kwakë motakukumya mo-senkoro isyënyu amangʼana ghano ghaaghambirwë na abharööti?
26 Kasi tiyaarë igha,
Kiristo ateeswe,
na asohe mu-bhuhika ubhwaye?”
27 Hayö ho yaabharaghërrëëyi amangʼana agha Kiristo,
ghano yaandëkëëywë,
akasimirya mo-Maandeko Amahörëëru ghano ghandëkirwë na Mosa,
akaghëndërrya mo-Maandeko Amahörëëru ghonswe igho,
na agha abharööti.
28 Hano bhaahikirë haangʼë na ikishishi keno bhaaghyanga-mo,
Yëësu akaikora kya ono akaaheterania.
29 Kasi,
abheene bhakamosaasaama bhököngʼu aikare nabho hayö,
bhakamötëëbhya igha,
“Otaikara na bhëëtö hano,
tokomaaha bhwirrë,
kora ikisuntë keraasha.”
Bhoono mbe akasoha mu-nyumba,
akaghösörya nabho.
30 Hano bhaikaayë okorya,
Yëësu akaghegha omokaate,
akakumya Waryobha,
akaghongʼoora,
akaghobhotora,
akabhatwenania.
31 Hayö ho Waryobha yaabhasësëmööyë,
bhakamomanyërrya.
Mbe,
hayö na hayö igho,
akabhasira-ko.
32 Bhakabhoorania igha,
“N-kë kyaaghërrë tokashomerwa igho kora tokanga okomanyërrya,
enkaagha eno yaarë kushumaasha na bhëëtö,
aratorahorra Amaandeko Amahörëëru ko-nshera haara?”
33 Bhakeemokera-mo këmwë,
ukukyora Yërusarëëmu.
Hano bhaahikirë,
bhakanyoora abhatomwa abha Yëësu ikömi na ömwë,
bhaikomaini hamwë na abhandë.
34 Abhatomwa bhayö,
bhakabhatëëbhya igha,
“Bhamurë abhëëtö,
m-maheene,
Omonene uwëëtö aryökirë,
kora abhööshökëëyë Simööni.”
35 Ho abheegha abhabhërë bhayö,
bhakatëëbhya bharikyabho,
ghonswe igho ghano ghaaikörrë ko-nshera.
Bhakabhatëëbhya kya bhono bhaamomanyërrëëyi,
hano yaabhabhötörrëyë omokaate.
Yëësu arabhooshokera abheegha abhaaye
36 Enkaagha iyö waanyöörrë abheegha bhakishumaashera amangʼana ghayö,
Yëësu akabhimerra-mo ghatë,
akabhatëëbhya igha,
“Morembe bhamurë.”
37 Bhakaitakya,
bhakoobhoha,
ko bhoora bhaakanyanga igha,
në-këhwë bharööshë.
38 Kasi akabhatëëbhya igha,
“N-kwakë motakukumya mo-senkoro isyënyu,
na kora mobhaabhayëëyë?
39 Momaahe amabhoko na amaghörö aghaane,
ho moraamanyërri igha nö-öni.
Mombaabhaate,
mwimaahere bhëënyu abheene,
ko bhoora momanyirë igha,
ëkëhwë tekeena amaghuha na ömöbhërë ghoghonswe igho hë,
kya bhono mokomaaha öni neenabhyo.”
40 Hano yaamarrë okoghamba ghayö,
akabhöörökya amabhoko na amaghörö aghaaye.
41 Nokaanyoora bhaarööshë ghayö,
kasi tebhaakumiri hë.
Ko bhoora mbaashömëëywë igho kora bhakaroghoora.
Mbe,
akabhabhöörya igha,
“Mokaabha na ibhyakorya bhyobhyonswe igho hano?”
42 Bhakamohaana ribhaara irya inswë eno yöömibhwi.
43 Akareghegha ribhaara riyö,
akarerya bharamomaaherra.
44 Akabhatëëbhya igha,
“Ghano na-mangʼana ghaara naabhatëëbhyanga hano twaarë hamwë.
Naabhatëëbhëri igha,
ghonswe ghano naandekerwa ngarikora,
ngakaabha amangʼana agha amaraghërryö ighya Mosa,
amaandeko agha abharööti,
hamwë na agha mo-Zabhuri.”
45 Bhoono akabharemora,
bhakamanya Amaandeko Amahörëëru ghano yaandëkëëywë.
46 Akabhatëëbhya igha,
“Yandëkirwë igha,
Kiristo narinyankibhwa igho akwe.
Na urusikö urwa katatö,
nariryoka ukurwa mo-bhaku.
47 Ko-maraghërryö aghaane,
na ku ubhwera ubhwane,
amangʼana ghano,
ngareraarekwa ko-bhantö abha ibhyaro bhyonswe igho,
ukusimirya Yërusarëëmu.
Amangʼana ghayö,
na-agha abhantö okohongora ëbhëbhë ibhyaho,
okore bhaabherwe.
48 Bhëënyu,
mbo abhaimërërri abha amangʼana ghayö ko-bhantö.
49 “Taata yaamara okobharaghania,
na bhoono nendaabhareetere ekeraghanio ikyaye.
Kasi mwikare Yërusarëëmu mono,
okohekera hano murinyoora obhotoro ubhwa Umwika Ömöhörëëru ukurwa mu-ryobha ono Taata yaaraghaini.”
Yëësu araghya mu-ryobha
50 Hano yaamarrë,
akatangata abheegha abhaaye,
bhakaghya mu-kishishi ikya Bhetania.
Hano bhaahikirë-yo,
akainyökya amabhoko aghaaye,
akabhangʼoora.
51 Enkaagha iyö yaabhangʼooranga,
akabhatigha.
Akagheghwa ukughya mu-ryobha.