Maariko 15

Yëësu arashongerwa ku-Piraato

(Mataayo 27:1-2, 27:11-14; Ruuka 23:1-5; Yohana 18:28-38)

Bhuyö bhwaakëëyë igho, ribharasa ryonswe igho, rekakora ikiina. Ribharasa riyö, na-bhanene abha abhasëngëri abha Waryobha, abhaghaaka abha Ikiyahudi, na abhëëghya abha amaraghërryö agha Mosa. Bhakabhoha Yëësu, bhakamuhira ku-Piraato Umuruumi, ono yaatangatanga omokowa ughwa Yudea.

2 Piraato akabhöörya Yëësu igha, “Uwe no-mokama uwa Abhayahudi örë?”

Yëësu akamohonshora igha, “Uwe, oghamarrë.”

3 Abhanene abha abhasëngëri bhayö, bhaashongeranga Yëësu ko-mangʼana amaaru. 4 Piraato akamöbhöörya ghwiki igha, “Tokohonshora engʼana hë? Maaha amangʼana ghano bhakukushongera, m-maaru.” 5 Kasi, Yëësu tiyaamumurri hë. Piraato akaroghoora!

Piraato arabhotorra Yëësu ikiina

(Mataayo 27:15-26; Ruuka 23:13-25; Yohana 18:39–19:16)

6 Mbe hano inyangi iya Epasaka yaahikanga, Piraato yaabhatashorranga omobhohe ömwë ono abhantö bhaatunanga. 7 Enkaagha iyö, waanyöörrë bhaaho abhantö bhano bhaarenga mo-kebhohe, ko okokora öbhötëëyu na ubhwiti ubhwa abhantö. Ömwë uwa abhantö bhayö, yaabherekerwanga igha Bharaabha. 8 Mbe, rikomo irya abhantö rekaghya ku-Piraato, rekamosabha igha, abhatashorre omobhohe ömwë, kya bhono yaabhakorranga.

9 Piraato akabhabhöörya igha, “Bhoono, nkutuna mörë mbatashorre omokama uwa Abhayahudi?” 10 Keno kyaaghërrë akabhabhöörya igho, n-ko bhoora yaamanyirë igha, rikenge ndyo ryaaghërrë abhanene abha abhasëngëri abha Waryobha, bhakahira Yëësu ko-we. 11 Mbe, abhanene abha abhasëngëri bhayö, bhakasëëghërrya rikomo irya abhantö, okore resabhe Piraato abhatashorre Bharaabha, atakaabhatashorra Yëësu. 12 Piraato akabhabhöörya ghwiki igha, “Bhoono iyakë mukutuna nkore ömöntö ono mokoghamba igha m-mokama uwa Abhayahudi?”

13 Abhantö bhonswe igho bhakakora ikituri igha, “Mohaneke ko-mosarabha!”

14 Piraato akabhabhöörya igha, “N-kë asarri?”

Kasi bho bhakashaghana bhököngʼu bharakora ikituri ghwiki igha, “Mohaneke ko-mosarabha!”

15 Piraato yaatunanga aishömi ko-bhantö bhayö, ku bhuyö akabhatashorra Bharaabha. Akaraghërrya abhasirikare abhaaye igha, bheeghose Yëësu imishariti, bhamare bhamohaneke ko-mosarabha, mbe, bhakamweghosa imishariti.

Abhasirikare bharashabhura Yëësu

(Mataayo 27:27-31; Yohana 19:2-3)

16 Abhasirikare bhakaghegha Yëësu, bhakaghya nawe mu-ghunyumba ughwa Piraato, ghono ghokobherekerwa igha, Puraitöriö. Bhakaikomania muyö abhasirikare bhonswe igho. 17 Bhakaibhöhya Yëësu ingibho iya ekekama iya erangë këësërö. Bhakakora ikirighi ikya amahwa, bhakamotoorra ko-motwe. Iyö ni-nshabhura bhaamökörëëyë iya ukwörökya igha m-mokama. 18 Bhakasimya okomokorra inshabhura iya ökömökëërya igha, “Ore Omokama Uwa Abhayahudi, waraayë!” 19 Mbe, bhakabha bharamotema ko-motwe na umunyaamunsi, bharamutwera amate, bharamotemera hansë ibhiru na okomosengerra ku ukumushabhura. 20 Hano bhaamarrë ukumushabhura, bhakamongʼaabhora ingibho iya këësërö eera, bhakamwibhöhya ghwiki singibho isyaye. Bhakaghya okomohaneka ko-mosarabha.

Yëësu arahanekwa ko-mosarabha

(Mataayo 27:32-44; Ruuka 23:26-43; Yohana 19:17-27)

21 Hano bhaarenga ko-nshera, bhakasikana na ömöntö ono yaarwanga mu-kishishi. Ömöntö uyö, yaabherekerwanga igha Simööni, uwa umughi ughwa Kirene. Uyö we yaarë suwaabho Arekisanda na Rufo. Abhasirikare bhakamusingʼirrya aiteeke omosarabha ughwa Yëësu. 22 Bhakahira Yëësu ahasë hano haabherekerwanga igha Ghorighoota, ensonga yaamo ni-igha, ëkëhöörë ikya ömöntö. 23 Bhakahaana Yëësu idivai eno bhaishooghaini-mo iryogho anywe, kasi akaghyanga. 24 Mbe, bhakamohaneka ko-mosarabha, bhakatwenana singibho isyaye, ko okosekorra ekekoobhwe. 25 Mbaamohanëkirë ko-mosarabha saa taatu isya nyinkyo.

26 Bhakandeka ko-mosarabha kuyö amangʼana agha ikiina ikya obhosarya ubhwaye igha, ono no-mokama uwa abhayahudi. 27 Mbaamohanëkirë ko-mosarabha hamwë na abhasaki bhabhërë. Ömwë bhakamohaneka ko-mosarabha ghono ghwaarë bhoryo ubhwa Yëësu, na uwöndë ghono ghwaarë bhömösi. [ 28 Ho ghaahekeraini Amaandeko Amahörëëru ghano ghakoghamba igha, “Yaabharëëywë hamwë na abha ëbhëbhë.”]

29 Abhantö bhano bhaahetanga hayö, mbaasingisyanga emetwe ighyabho, eno bharamushabhura. Bhaamötëëbhyanga igha, “Kanaa, tu-uwe waaihashanga igha nokaatëmööyë inyumba iya Waryobha, omare oghehaghaashe ku-sinsikö isatö igho? 30 Itöörya mbe umwene tomaahe, iika urwe ko-mosarabha kuyö.”

31 Kora abhanene abha abhasëngëri hamwë na abhëëghya abha amaraghërryö agha Mosa, bhonswe bhakashabhura Yëësu ighoigho. Bhakamokaara igha, “Yaatööryanga abhandë, kasi takotora ukwitöörya umwene hë. 32 Araibherekera igha, we Kiristo, Omokama uwa Abhaisiraëri. Aike mbe ukurwa ko-mosarabha tomaahe, okore tumukumi.” Kora abhantö bhaara bhaahanëkirwë ko-mesarabha hamwë nawe, bhonswe bhakamotoka.

Yëësu arakwa

(Mataayo 27:45-56; Ruuka 23:44-49; Yohana 19:28-30)

33 Ukusimirya saa isansabha omobhasö, okohekera saa kenda, bhokabha ubhwira kabhërë ku-kyaro kyonswe igho. 34 Mbe, hano yaahikirë saa kenda, Yëësu akakuura bhököngʼu igha, “Ëröi, Ëröi, rama sabhakitani?” Ensonga iyaamo ni-igha, “Waryobha uwaane, Waryobha uwaane, n-kwakë ukuntigha?”

35 Hano abhantö nyabhorebhe bhano bhaarenga bhaimërëëyë hayö, bhaaighuurë amangʼana ghayö Yëësu yaaghambirë, bhakaghamba igha, “Mwighwe bhamurë, arabherekera Ëriya.” 36 Ömöntö ömwë akakenya bhöngöbhöngö, akashabhya mu-divai ëndörö, ëkëntö kenga isipönji, akakebhoherra ku-munyaamunsi omontambë. Akainyökya kighörö, akahaana Yëësu igha anywe eno araghamba igha, “Tigha tomaahe nyoore Ëriya naasha ukumwikya ko-mosarabha!”

37 Yëësu akakuura bhököngʼu, akamara akakwa. 38 Mbe, ripazia reno ryaarebherranga mu-nyumba iya Waryobha, rekatandoka ukurwa kighörö rekahekera hansë, rekabha amabhaara abhërë. 39 Omonene uwa abhasirikare ono yaarenga aimërëëyë hayö, hano yaarööshë kya bhono Yëësu yaakuurë, akaghamba igha, “Obhoheene ömöntö ono m-Moona uwa Waryobha yaarë!”

40 Bhaare-ho abhakari bhano bhaimërëëyë hare, bharamaaherra. Mo-bhayö yaare-mo Maryamu uwa Maghidara, Sarome, Maryamu nyakuwaabho Yoose na Yaakobho omoke. 41 Abhakari bhayö, mbaasoorananga Yëësu bharamutighinkanera enkaagha eno yaarë mo-mokowa ughwa Ghariraaya. Bhaare-ho abhakari abhandë abhaaru, bhano bhaahinaini nawe Yërusarëëmu.

Yëësu arabheekwa

(Mataayo 27:57-61; Ruuka 23:50-56; Yohana 19:38-42)

42 Hano omoghoroobha ughwa urusikö urwa ësëëmyö iya urusikö urwa Obhotooro ghwaahikirë, 43 akaasha ömöntö ono yaabherekerwanga igha Yusufu, Omoarimatea. Yaasookwanga bhököngʼu mo-bharasa iya Abhayahudi, ghwiki yaaitengʼeranga ukuusha ukwa Obhokama ubhwa Waryobha. Akakareha ukughya ku-Piraato okomosabha igha, amwikërërri agheghe ikihundughu ikya Yëësu, akebheeke.

44 Hano Piraato yaaighuurë igha Yëësu akuurë, akaroghoora! Akabherekera omonene uwa abhasirikare, okore amanye obhoheene nyoore m-maheene igha Yëësu amarrë ukukwa. 45 Omonene uwa abhasirikare akaikërrya igha m-maheene Yëësu akuurë, ku bhuyö Piraato akaikërërrya Yusufu agheghe ikihundughu kiyö, aghi okobheeka. 46 Mbe, Yusufu akaghora ishuuka iya eketani iya öbhöghöri obhonene. Akaghya ko-mosarabha haara, akaikya ikihundughu ikya Yëësu, akakikundikirya ishuuka iyö. Akakeghegha, akaghya okobheeka ikihundughu kiyö mo-mbeehera eno yaabhaashirwë ku-ritare, akahingira reghena rinene, akaribha ku-munywa ughwa embeehera. 47 Maryamu uwa Maghidara, na Maryamu nyakuwaabho Yoose mbaarööshë ahasë hano Yëësu yaabhëëkirwë.