Sitaanniŋi à pwɔ mà yyee kampwoo pyi
20
Lire kàntugo ka mii i Kile mɛ̀lɛkɛŋi wà ɲya u à yîri nìɲyiŋi i na ntîri,
kacyewyicuguŋke tirikyaanni ná yɔ̀rɔyɔ nitabaaya mpyi u cye e.
2 Wwòlyɛge ku mpyi tèecyiini i,
ná pi maha ku pyi jínabii ɲùŋufooŋi,
lire ɲyɛ mɛ Sitaanniŋi ke,
ka pi i kuru cû a pwɔ fo yyee kampwoo (1.000)
3 maa ku wà kacyewyicuguŋke e,
maa ku shwɔ̂hɔ,
maa fyè bwɔ̀n ku ɲwɔtoŋke na,
bà li si mpyi,
kʼàha núru sʼa sùpyire wuruge ɲcyii yyee kampwooni funŋke e mɛ.
Cyire ká ntòro,
kʼà yaa ku yige ku tère nimbilere pyi.
4 Ɲyɛ ka mii i saanra yatɛɛnyɛ ɲya.
Mpii pi mpyi a tɛ̀ɛn yi ɲuŋʼi ke,
fànhe mpyi a kan pirʼá,
pi a yoge kyáali.
Mpii ɲùmbogigii pi mpyi a kwɔ̀n Yesu kani ɲjwuŋi ná Kile jwumpe ɲjwuŋi kurugo ke,
mii à pire múnahigii ɲya.
Pi mpyi a ɲɛnʼa sige yapege,
lire ɲyɛ mɛ ku nàɲjaŋi pêe mɛ,
pi mú mpyi a ɲɛɛ fyèŋi u bwɔ̀n pire byahigii,
lire ɲyɛ mɛ pire cyeyi na mɛ.
Pire mpyi a ɲɛ̀,
maa ntɛ̀ɛn ná Kirisita e saanre e mà yyee kampwoo pyi.
5 Shincyiibii pi ɲyɛ pire mà ɲɛ̀ a fworo kwùŋi i.
Kwùubii sanmpii ɲyɛ a ɲɛ̀ mà ta yyeegii sàha fûnŋɔ kampwoo na mɛ.
6 Mpii pi à pyi niɲcyiibilʼe mà ɲɛ̀ ke,
pire wuunʼà ɲwɔ,
pi à pyi Kile wuu.
Pi saha sì kwùzhɔnwuu kwû mɛ.
Pi sí n‑pyi Kile ná Kirisita sáragawwuu,
si ntɛ̀ɛn ná Kirisita e saanre e si yyee kampwoo pyi.
Fànha à ta Sitaanniŋi na
7 Yyee kampwooni (1.000) ká fûnŋɔ,
Sitaanniŋi sí n‑yige u tatoŋke e.
8 U sí n‑kàre si sà supyishiŋi puni wurugo diɲyɛŋi yyaha kurugo.
Uru supyishiŋi puni mɛge ku ɲyɛ Gɔgi ná Magɔgia.
U sí supyishiŋi puni bínni kàshige mɛɛ na.
Pirʼà ɲyaha bà suumpe lwɔhe ɲwɔge nticyɛnŋi ɲyɛ mɛ.
9 Mii mpyi a li ɲya na pi à pa cyage puni shwɔ a ta,
maa Kile wuubii cyage kwûulo,
kuru ku ɲyɛ kànhe tàange woge.
Mà pi yaha puru na,
nage kà à yîri nìɲyiŋi na mà pa pi puni súugo.
10 Ɲyɛ Sitaanniŋi u mpyi maha sùpyire wuruge ke,
ka pi i uru cû,
ŋkìrigiŋi na ɲyɛ kacyewyige nage ŋkemu i ke,
maa u wà kurʼe sige yapege ná tùnntunŋi kafiniviniŋi kurugo.
Pi sí raa ŋkyaali wani pìlaga bâra canŋa na fo tèekwombaa.
Kile yoge nizanŋke
11 Ɲyɛ ka mii i núrʼa saanre yatɛɛnŋke kà nimbwɔhɔ nivyinge ɲya,
wà u à tɛ̀ɛn kʼe.
Ka nìɲyiŋi ná ɲìŋke si fê a yîri u yyaha na,
wà saha ɲyɛ a yi ɲya mɛ.
12 Mpii pi à kwû ke,
ka mii i pire ɲya,
shinbwo bâra shinbilere na,
pi puni mpyi a yyére saanre yatɛɛnŋke yyaha yyére.
Ka sémɛbii pìi si múgo.
Lire kàntugo ka wà si núrʼa múgo,
shìŋi niŋkwombaaŋi tafeebii mɛyi tasemɛge ku mpyi ure.
Ka Kile si kwùubii sâra a tàanna ná pi kapyiiŋkilʼe ɲcyiimu cyi à sémɛ sémɛbilʼe ke.
13 Suumpe lwɔhe mpyi a sùpyire ntemu lyî ke,
kʼà tire núruŋʼa yige.
Mpii pi à kwû mà kàre ɲìŋke ɲwɔhɔ shiinbii cyage e ke,
pire mú à fworo,
ka shin maha shin si sâra mà tàanna ná u kapyiiŋkilʼe.
14 Ɲyɛ ka kwùŋi ná ɲìŋke ɲwɔhɔ shiinbii cyage si wà kacyewyige nage e,
kuru ku ɲyɛ kwùŋi shɔnwuŋi.
15 Shin maha shin u ɲyɛ u mɛge ɲyɛ a ta kʼà sémɛ shìŋi niŋkwombaaŋi tafeebii mɛyi tasemɛge e mɛ,
pire punʼà wà kacyewyige nage e.