Babilɔnni kànbwɔhʼà jya
18
Lire kàntugo ka mii i Kile mɛ̀lɛkɛŋi wabɛrɛ ɲya u à yîri nìɲyiŋi i na ntîri.
Ɲùŋufente mpyi u á sèlʼe,
u sìnampe mpyi bɛ̀ɛnmɛ ɲìŋke cyeyi puni i.
2 Ka u u ŋkwúulo fànha na:
«Kʼà jya!
Babilɔnni kànbwɔhʼà jya!
Kʼà pyi numɛ jínabii tatɛɛngɛ,
maa mpyi múnapegigii puni ná màpɛngɛ saɲcyɛnɲwɔhɔyi puni taŋwɔhɔgɔ.
3 Lirʼà pyi,
ɲaha na yɛ kʼà supyishiŋi puni pyi pi à jacwɔɔre pyi ku fiige,
ka lire si mpyi mu à jwo pi à ku ɛrɛzɛn sinmpe bya.
Ɲìŋke saanbilʼà jacwɔɔre pyi ná kʼe,
ɲìŋke cwɔ̀hɔmpilʼà pa mpyi kàmpyaafee ku pùcyage yaare cye kurugo.»
4 Ɲyɛ ka mii i mɛjwuuni labɛrɛ lógo nìɲyiŋi i na:
«Mii shiinbii,
yii fworo Babilɔnni kànhe e,
lire e kapegigii kʼà pyi ke,
yii nàzhan sì n‑pyi cyire e mɛ.
Amuni li mú ɲyɛ,
yyefuyi yi sí nɔ ku na ke,
yii nàzhan sì n‑pyi yire e mɛ.
5 Yii li cè na ku kapegigilʼà bínni cyiye e,
mà dùgʼa nɔ fo nìɲyiŋi na.
Kile funŋɔ ɲyɛ a wwɔ̀ ku ntiimbaaŋi karigii na mɛ.
6 Nde kʼà pyi pi sanmpii na ke,
yii lire fiige pyi ku na.
Yii ku nimpyiini fiigii shuunni pyi ku na.
Kʼà yaage ŋkemu kan yii à bya ke,
ŋkemu fànhe kʼà ɲyaha kuru woge na tooyo shuunni ke,
yii kuru le ku byabya ceni i.
7 Bà kʼà yasinayi ná nàfuuŋi tɛ̀gʼa kuye pêe mɛ,
yii kyaage ná nàvunŋke pyi ku nɔ ku na amuni,
ɲaha na yɛ kʼà kuye pyi saancwo,
na kuru ɲyɛ leŋkwucwo mɛ,
na kuru sì n‑sìi yamɛɛ sú mɛ.
8 Lire kurugo,
yyefuyi yi ɲyɛ ku mɛɛ na ke,
yire yi ɲyɛ:
kwùŋi ná yamɛɛni ná katege.
Yire sí nɔ ku na canŋa niŋkin.
Nage sí ku súugo,
ɲaha na yɛ Kafooŋi Kile u ɲyɛ na yoge kwùun ku na ke,
fànhe na ɲyɛ urʼe.»
9 Ɲyɛ ɲìŋke saanbii pi à jacwɔɔre pyi ná kʼe,
maa ku pùcyage loŋgara yaayi ta ke,
pire ká ku súugo súugo naŋguruge ɲya,
pi sí raa ŋkwúuli sʼa yamɛɛni súu sèe sèlʼe.
10 Pi sí n‑yyére tatɔɔnge e,
ɲaha na yɛ pi sí raa fyáge ku yyefuge kà ŋkwɔ̀ nɔ pire na mɛ,
sʼa ŋko:
«Kànbwɔhe Babilɔnni wuunʼà kɛ̀ɛge!
Lʼà kɛ̀ɛge!
Nàmbaa kànhe!
Yoge ku kwɔ̀n mu na,
lire ɲyɛ a pyi kamɔnɔ mɛ,
tère nimbilere kanna.»
11 Diɲyɛŋi cwɔ̀hɔmpii mú sí raa ŋkwúuli sʼa yamɛɛni súu ku kurugo,
mà li ɲùŋke pyi pi yapɛrɛyi saha ɲyɛ na shuu mɛ.
Yire yaayi yi ɲyɛ:
12 sɛɛnŋi ná wyɛ́rɛfyinŋi ná loŋgara kafaare ná loŋgara kɔ́ɔnŋi ná shire vàanɲyi ná vàanɲyɛyi nisinaɲyi ná vàanntufagare loŋgara woore ná nùguntanga cire ná ntàsuuŋi ŋkyaangilʼà tɛ̀gʼa yaayi ɲjemu yaa ke,
ná loŋgara cirʼà tɛ̀gʼa yaayi ɲjemu yaa ke,
ná dàɲyɛŋi wuyi ná tɔɔnnte wuyi ná kafaayi loŋgara wuyʼà te mà pyi yaayi ɲjemu ke,
13 ná cyangayaare nùguntanga woore ná làtikoloŋi ná miri nùguntanga sìnmpe ná wusunaŋi ná ɛrɛzɛn sinmpe ná sìnmpe ná farini mbyìmpe ná mɔ̀ɔŋi ná nìiyi ná mpàabii ná shɔnyi ná wòtoribii,
ali bilibii mú.
14 Pi sí raa ŋko:
«Yaayi mu mpyi a cya ke,
yire punʼà fworo mu cye e.
Uru nàfuuŋi ná yire kakyanhala yaayi punʼà pînni mu na,
mu saha sì n‑sìi yi ta mɛ.»
15 Cwɔ̀hɔmpii pi à nàfuuŋi ta ku cye kurugo ke,
pire sí laaga tɔɔn ku na,
ku yyefuge kà ŋkwɔ̀ nɔ pire na mɛ.
Pi sí raa mɛɛ súu sʼa ŋkwúuli,
16 sʼa ŋko:
«Kànbwɔhe wuunʼà kɛ̀ɛge!
Lʼà kɛ̀ɛge!
Ku sí mpyi a yalʼa ɲwɔ ná shire vàanɲyi ná vàanɲyɛyi ná sɛɛnŋi ná kafaare loŋgara woore ná kɔ́ɔnŋi loŋgara wuŋi i.
Yire puni yʼà kɛ̀ɛge amɛ tère niŋkin!»
17 Bakwooyi ɲùŋufeebii puni ná yi kùsheebii ná mpii pi ɲyɛ na báare yi e ke,
ná shin maha shin u ɲyɛ na u ɲwɔlyiŋi taa suumpe lwɔhe ɲuŋʼi ke,
pire punʼà pa yyére tatɔɔnge e,
18 maa kànhe wíi tasogoge e,
maa jwo fànha na:
«Kànha mpyi a sàa pêlʼa ŋke kànbwɔhe kwɔ̀ mɛ.»
19 Pi à cwɔɔnre wu pi ɲùmbogigilʼe,
maa yamɛɛni kwuuni wà,
maa jwo:
«Kànbwɔhe wuunʼà kɛ̀ɛge!
Lʼà kɛ̀ɛge!
Ku loŋgara yaayi yi mpyi a bakwooyi feebii puni pyi yaarafee ke,
tère niŋkin funŋʼi kurʼà pînni.
20 Nìɲyiŋi,
ta múgure ku ɲjyaŋi kurugo!
Kile wuubii ná Yesu tùnntunmpii ná Kile tùnntunmpii,
yii a múgure mú,
ɲaha na yɛ Kile à yogo kwɔ̀n ku na,
maa yii ŋkooŋi wwû ku na.»
21 Ɲyɛ ka Kile mɛ̀lɛkɛŋi wà si kafaabwɔhɔ lwɔ́ mu à jwo tiraga,
maa ku wà suumpe lwɔhe e,
maa jwo:
«Amɛ Babilɔnni kànbwɔhe sí n‑wà fànha na,
wà saha sì ku ɲya mɛ.
22 Ŋkɔ̀nnɔ ná mɛceeŋkuruŋɔ ná tìinmpire ná mpurugo mɛɛ saha sì n‑sìi n‑lógo wani mɛ.
Cyebaarapyi saha sì ɲya wani mɛ,
tiraga mɛɛ saha sì n‑fworo wani mɛ.
23 Fùkina bɛ̀ɛnmɛ saha sì n‑fworo wani mɛ,
tacwokwɔngɔ ná ku poo jwumɔ saha sì n‑lógo wani mɛ,
ɲaha na yɛ mu cwɔ̀hɔmpii pi mpyi diɲyɛ shinbwoobii,
mu sìŋkanma karigilʼà diɲyɛ sùpyire puni wurugo.
24 Mà bâra lire na,
Kile tùnntunmpii ná Kile wuubii ná sùpyire puni tʼà bò ɲìŋke na ke,
mu yyére pire puni sìshangʼà ɲya.»