Ŋkunahigii baashuunniŋi cyi ɲyɛ na Kile lùyirini kyaa yu ke
16
Lire kàntugo ka mii i mɛjwuu lógo fànha na Kileɲaarebage e,
li i ŋko Kile mɛ̀lɛkɛɛbii baashuunniŋʼá na:
«Kile lùyirini na ɲyɛ ŋkunahigii baashuunniŋi ɲcyiimu i ke,
yii sà cyi sùguro ɲìŋke na.»
2 Ɲyɛ ka Kile mɛ̀lɛkɛŋi niɲcyiiŋi si sà u ŋkunaani sùguro ɲìŋke na.
Lirʼà pyi ke,
sige yapege fyèŋi mpyi mpiimu na,
pi sí i ku nàɲjaŋi pêre ke,
ka nɔwapiye si fworo pire na.
3 Ka Kile mɛ̀lɛkɛŋi shɔnwuŋi si sà u ŋkunaani sùgoro suumpe lwɔhe e,
ka lwɔhe si ŋkɛ̂ɛnŋʼa pyi mu à jwo supyikwugo sìshan.
Ɲyii yaayi yi mpyi kʼe ke,
ka yire puni si ŋkwû.
4 Ka Kile mɛ̀lɛkɛŋi tanrewuŋi si sà u ŋkunaani sùgoro baŋi lwɔhe ná lùbilibilʼe,
ka yire puni si ŋkɛ̂ɛnŋʼa pyi sìshan.
5 Kile mɛ̀lɛkɛŋi u ɲyɛ lwɔhe ɲùŋɔ na ke,
ka mii i uru ɲya u à jwo:
«Mu u ɲyɛ niɲcɛnŋi,
mu u ɲyɛ,
ná mu mpyi ke,
mu à tíi,
ɲaha na yɛ amuni mu ɲyɛ na yoge kwùun.
6 Pi à mu shiinbii ná mu tùnntunmpii sìshange wu,
ka mu u sìshange kan pi a byii,
pi ná lirʼà yaa.»
7 Lire kàntugo ka mii i mɛjwuu lógo sárayi tawwuge e na:
«Sèeŋi na,
Kafooŋi Kile,
Siŋi Punifoo,
mu yoge kwɔ̀nŋkannʼà tíi.»
8 Ka Kile mɛ̀lɛkɛŋi sicyɛrewuŋi si u ŋkunaani sùgoro canŋaɲyiini ɲuŋʼi,
bà li kafuge si mpyi si mpêe sʼa sùpyire súuge na fiige mɛ.
9 Kuru kafugʼà sùpyire súugo sèlʼe.
Ka pi i wá na Kile mɛge kɛ̀ɛge,
uru cye e cyire yyefuge karigii ɲyɛ.
Pi ɲyɛ a ɲɛnʼa pi toroŋkanni kɛ̂ɛnŋɛ si u pêe mɛ.
10 Ka Kile mɛ̀lɛkɛŋi kaŋkuro wuŋi si u ŋkunaani sùgoro sige yapege saanre yatɛɛnŋke e.
Ku mpyi na ku saanre pyi cyeyi ɲjemu ɲùŋɔ na ke,
ka numpini si jyè yire puni i,
ka sùpyire si wá na ti ɲjirigii nɔni yyefuge cye e.
11 Yyefuge ná nɔwapiyi kurugo,
ka pi i wá na nìɲyiŋi Kileŋi mɛge kɛ̀ɛge,
ŋka pi ɲyɛ a pi toroŋkanni kɛ̂ɛnŋɛ mɛ.
12 Ka Kile mɛ̀lɛkɛŋi baani wuŋi si u ŋkunaani sùgoro Efirati baŋi i,
ka baŋi lwɔhe si waha maa tatorogo kan saanbilʼá,
pire mpyi a yîri canŋafyinmpe e.
13 Lire kàntugo ka mii i múnapegii taanre ɲya ntàsɛɛn fiige,
là à fworo wwòlyɛge ɲwɔge e,
ka là si fworo sige yapege ɲwɔge e,
ka là sí fworo tùnntunŋi kafiniviniŋi ɲwɔge e.
14 Jínahii pi mpyi cyire múnahigii,
cyi maha kakyanhala karigii pyi.
Cyi sí n‑shà diɲyɛŋi saanbii puni bínni,
bà pi si mpyi si kàshige kwɔ̀n Kile Siŋi Punifoo canmbwɔhe e mɛ.
15 Kafooŋi à jwo:
«Lógo,
mii sí n‑pa mu à jwo nàŋkaawa.
Ŋgemu u à kwôro ɲyii na,
maa mpyi u ɲyɛ a u vàanɲyi wwû sùpyire ti kwɔ̀ tʼa u silege cyeyi ɲaa mɛ,
urufoo wuunʼà ɲwɔ.»
16 Ɲyɛ ka jínabii si sà saanbii bínni cyage kʼe,
pi maha kuru mɛge pyi Eburubii shɛɛnre e:
«Arimagedɔna».
17 Ɲyɛ ka Kile mɛ̀lɛkɛŋi baashɔnwuŋi si u ŋkunaani sùgoro kafɛɛge e.
Ka mɛjwuu si fworo Kileɲaarebage e saanre yatɛɛnŋke e na:
«Yʼà kwɔ̀ numɛ.»
18 Ka kileɲini ná tùnmpe ná kiletinni si mpyi,
ka ɲìŋke si ɲcyɛ̂ɛnnɛ sèlʼe.
Mà lwɔ́ sùpyire ɲyɛ ɲìŋke na ke,
ku mpyi na saha ɲcyɛ̂ɛnnɛ lire cyɛ̀ɛnnɛŋkanni na mɛ.
19 Ka Babilɔnni kànbwɔhe si jya mà pyi taanre.
Ka kìrigii puni kànyi si ɲcwo.
Kile funŋɔ ɲyɛ a wwɔ̀ kuru kànbwɔhe na mɛ,
maa u lùyirini tîrige ku shiinbii ɲuŋʼi,
lire li ɲyɛ mu à jwo u à ɛrɛzɛn sintanhampe kan pi a bya.
20 Kìripyɛɛre ti mpyi suumpe lwɔhe niŋke e ke,
ka tire puni si mpînni,
wà saha ɲyɛ a ɲaɲyi saha cè mɛ.
21 Ka zànhafunɲcɛɛnyɛ nitabaaya si wá na ɲcwo sùpyire ɲuŋʼi.
Yi puni niŋkin niŋkinŋi mpyi a dùgo sèe sèlʼe.
Ka sùpyire si wá na Kile mɛge kɛ̀ɛge kuru yyefuge mpèeŋi kurugo.