Ndemu cye kurugo Kile tùnntunŋi maha ɲcè ke
4
Mii ntàannamacinmpyiibii,
mpii puni pi ɲyɛ na ma yii á,
na pire na ɲyɛ Kile tùnntunmii ke,
yii àha ndá pi puni na mɛ,
yii a pi zòompii shuu yii a wíi,
yii i ɲcè kampyi Kile u à pi tun,
ɲaha na yɛ shinɲyahara na fini diɲyɛŋi yyaha kurugo na pire na ɲyɛ Kile tùnntunmii.
2 Ndemu cye kurugo Kile tùnntunŋi maha ɲcè ke,
lire li ɲyɛ:
shin maha shin u à tɛ̀ɛn li taan na Yesu Kirisita à pa mpyi sùpya ke,
urufoo na ɲyɛ Kile tùnntunŋɔ.
3 Ŋka shin maha shin u à jwo na uru na ɲyɛ Kile tùnntunŋɔ,
maa Yesu cyé ke,
urufoo ɲyɛ Kile tùnntunŋɔ mɛ.
Kirisita zàmpɛnŋi tùnntunŋɔ u ɲyɛ urufoo,
u kyaa sʼà jwo yii á na u sí n‑pa,
u sʼà pa a kwɔ̀ diɲyɛŋi i.
4 Yii pi ke,
mii pyìibii,
yii na ɲyɛ Kile wuu.
Yii à fànha ta pire kafinivinibii na,
ɲaha na yɛ Munaani lʼà tɛ̀ɛn yii e ke,
lirʼà fànha tò diɲyɛŋi sùpyire wuuni na.
5 Pire kafinivinibii pi ke,
pire na ɲyɛ diɲyɛŋi wuu,
lire kurugo pi maha yu mà tàanna ná diɲyɛŋi jwuŋkanni i,
diɲyɛŋʼa sì wá na núru pi ɲwɔ na.
6 Wuu pi ke,
wuu na ɲyɛ Kile wuu.
Shinŋi u à Kile cè ke,
urufoo maha núru wuu ɲwɔ na.
Ŋgemu u ɲyɛ u ɲyɛ Kile pyà mɛ,
urufoo ɲyɛ na núru wuu ɲwɔ na mɛ.
Lire cye kurugo,
wuu maha tùnntunmpii sèe wuubii cè a wwû kafinivinibilʼe.
Kile à wuu kyaa táan uyʼá, wuu wuu shinɲɛɛbii kyaa táan wuyʼá mú
7 Mii ntàannamacinmpyiibii,
wuu wuye kyaa táan wuyʼá,
ɲaha na yɛ tàangʼà fworo Kile e.
Shin maha shiin u à u cìnmpyiibii kyaa táan uyʼá ke,
urufoo na ɲyɛ Kile pyà,
maa u cè.
8 Shinŋi u ɲyɛ u ɲyɛ a u cìnmpyiibii kyaa táan uyʼá mɛ,
urufoo ɲyɛ a Kile cè mɛ,
ɲaha na yɛ Kile na ɲyɛ tàanga.
9 Pyiŋkanni na Kile à li cyêe wuu na na wuu kyalʼà táan urʼá ke,
lire li ɲyɛ:
u à u Jyaŋi niŋkinŋi tun u à pa diɲyɛŋi i,
bà wuu si mpyi si shìŋi sèe wuŋi ta u cye kurugo mɛ.
10 Kuru tàange ku ɲyɛ:
wuu bà pi à Kile kyaa táan wuyʼá mà dɛ!
Ŋka Kile u à wuu kyaa táan uyʼá,
maa u Jyaŋi tun u à pa mpyi sáraga maa wuu kapegigii tugure lwɔ́ maa Kile lùuni tìŋɛ.
11 Ɲyɛ mii ntàannamacinmpyiibii,
ná Kile à wuu kyaa táan uyʼá lire pyiŋkanni na,
lire e wuu mú à yaa wuu wuye kyaa táan wuyʼá.
12 Sùpya ɲyii ɲyɛ a tɛ̀gʼa ɲya Kile na mɛ,
ŋka wuu aha wuye kyaa táan wuyʼá,
wuu sí n‑kwôro Kile wwoɲɛɛge e,
u tàange mú sí raa ɲaa wuu shwɔhɔlʼe sèeŋi na.
13 Ndemu cye kurugo wuu à li cè na wuu à wwɔ̀ ná Kile e,
Kile mú sʼà wwɔ̀ ná wuu e ke,
lire li ɲyɛ:
u à u Munaani le wuu e.
14 Tufooŋi à Jyafooŋi tun u à pa mpyi diɲyɛŋi Shwofooŋi,
wuu à lire ɲya wuu ɲyiigii na,
maa mpyi lire kani shɛɛnre jwufee.
15 Shinŋi u à tɛ̀ɛn li taan na Yesu u ɲyɛ Kile Jyaŋi ke,
Kile à wwɔ̀ ná urufolʼe,
urufoo mú à wwɔ̀ ná Kile e.
16 Táanŋkanni na Kile à wuu kyaa táan uyʼá ke,
wuu à lire cè,
maa dá li na.
Kile na ɲyɛ tàanga,
shinŋi u à kwôro tàange e ke,
urufolʼà wwɔ̀ ná Kile e,
ka Kile sí wwɔ̀ ná urufolʼe.
17 Wuu kyalʼà táan Kile á sèeŋi na,
lire kurugo canŋke u sí sùpyire puni sâra si ntàanna ná pi kapyiiŋkilʼe ke,
wuu yákilitɛɛnrɛ wuu pi sí n‑pyi kuru canŋke.
Ɲaha kurugo yɛ bà Yesu Kirisita mpyi ŋge diɲyɛŋi i mɛ,
amuni wuu mú ɲyɛ.
18 Shinŋi u à Kile ná u cìnmpyiibii kyaa táan uyʼá ke,
urufoo yákiliŋi maha ntɛ̀ɛn,
ɲaha na yɛ tàange sèe woge maha fyagare kwɔ̀.
Yii li cè na mu aha sùpyaŋi ɲya u u fyáge,
u kapegigii sí ndemu nɔ u na ke,
lire yyaha na u maha fyáge.
Lirʼà li cyêe shinŋi u ɲyɛ na fyáge ke,
tàange ɲyɛ a ndìre wà urufolʼe mɛ.
19 Wuu pi ke,
Kile u à fyânha a wuu kyaa táan uyʼá,
lire kurugo wuu à Kile ná wuu cìnmpyiibii kyaa táan wuyʼá.
20 Wà ha jwo na Kile kyalʼà táan urʼá,
mà li ta urufolʼà u cìnmpworoŋi kyaa pɛn uyʼá,
urufoo na ɲyɛ kafiniviniwe,
ɲaha na yɛ mu ɲyii ɲyɛ ma cìnmpworoŋi ŋgemu na ke,
mu aha uru kyaa pɛn mayʼá,
Kile u ɲyɛ mu ɲyii ɲyɛ uru na mɛ,
di uru kyaa sí n‑jà n‑táan mu á n‑jwo yɛ?
21 Nde Kile ɲyɛ na ɲcaa wuu á ke,
lire li ɲyɛ:
uru kyalʼà táan ŋgemu á ke,
urufoo u u cìnmpworoŋi kyaa táan uyʼá mú.