3
Táanŋkanni na wuu kyalʼà táan Tufooŋi á ke,
yii lire kàanmucya kɛ!
U à wuu kyaa táan uyʼá fo wuu na yire Kile pyìi.
Kile pyìi pi à sìi wuu.
Nde lʼà diɲyɛŋi sùpyire pyi ti ɲyɛ a wuu cè mɛ,
lire li ɲyɛ:
pi ɲyɛ a Kile cè mɛ.
2 Mii ntàannamacinmpyiibii,
numɛ kɔni,
wuu à pyi Kile pyìi.
Wuu sí n‑pa n‑pyi yaage ŋkemu ke,
kuru sàha ŋkwɔ̀ a cyêe wuu na mɛ.
Ŋka wuu kɔnʼà cè,
canŋke Yesu Kirisita sí n‑cyêe ke,
pyiŋkanni na u ɲyɛ ke,
wuu sí n‑pyi amuni.
Lire ea,
pyiŋkanni na u ɲyɛ ke,
wuu sí u ɲya amuni.
3 Shin maha shin u à u sɔ̀nŋɔre taha li na na uru sí n‑pyi Yesu fiige ke,
urufoo maha uye fíniŋɛ bà u à fíniŋɛ mɛ.
4 Shin maha shin u ɲyɛ na kapegigii pyi ke,
urufoo maha Kile Saliyaŋi tùnni,
ɲaha na yɛ kapegigii cyi ɲyɛ Kile Saliyaŋi kafuunŋkii.
5 Yii sʼa li cè na Yesu Kirisita à pa si kapegigii shi kwɔ̀.
Uru yabiliŋi ɲyɛ a kapii pyi mà ɲya mɛ.
6 Lire e ke shin maha shin u ɲyɛ Yesu Kirisita wwoɲɛɛge e ke,
urufoo sì ɲɛɛ n‑kwôro kapegigii mpyiŋi na mɛ.
Shin maha shin u à kwôro kapegigii mpyiŋi na ke,
urufoo ɲyɛ a Yesu Kirisita ɲya mɛ,
u mú ɲyɛ a u cè mɛ.
7 Mii pyìibii,
yii àha ŋkwɔ̀ wà yaha u yii le kumpiini i mɛ.
Shin maha shin u ɲyɛ na katiigii pyi ke,
urufolʼà tíi bà Yesu Kirisita à tíi mɛ.
8 Shin maha shin u ɲyɛ na kapegigii pyi ke,
urufoo na ɲyɛ Sitaanniŋi wu,
ɲaha na yɛ mà lwɔ́ fo tasiige e,
Sitaanniŋi na kapegigii pyi.
Kile Jyaŋi kapani sí li ɲyɛ si Sitaanniŋi kapyiiŋkii shi bò.
9 Shin maha shin u ɲyɛ Kile pyà ke,
urufoo ɲyɛ na ŋkwôroli kapegigii mpyiŋi na mɛ,
ɲaha na yɛ Kile fànhe maha mpyi urufolʼe.
Ná urufoo sí ɲyɛ Kile pyà,
lire kurugo u sì n‑jà n‑kwôro kapegigii mpyiŋi na mɛ.
10 Nde lʼà Kile pyìibii ná Sitaanniŋi pyìibii wwû piye e ke,
lire li ɲyɛ:
shin maha shin u ɲyɛ u ɲyɛ na katiigii pyi,
maa u cìnmpworoŋi kyaa táan uyʼá mɛ,
urufoo ɲyɛ Kile pyà mɛ.
Pyiŋkanni na wuu à yaa wuu wuu cìnmpyiibii kyaa táan wuyʼá ke
11 Yii li cè na jwumpe pʼà jwo yii á mà lwɔ́ fo yii tèejyiini i Kile kuni i ke,
puru pu ɲyɛ:
wuu wuye kyaa táan wuyʼá.
12 Wuu àha mpyi Kanɲi fiige mɛ,
uru na mpyi Sitaanniŋi wu,
u à u sìɲɛɛŋi bò.
Kanɲi kapyiiŋkii mpyi a pi,
lire kurugo u à u sìɲɛɛŋi bò,
mà li ta u sìɲɛɛŋi wogigii mpyi a tíi.
13 Cìnmpyiibii,
yii kyaa ká mpɛn diɲyɛŋi sùpyirʼá,
lire kà mpâa yii e mɛ.
14 Wuu à li cè na tèni lʼe shìŋi sèe wuŋi mpyi wuu á mɛ.
Ŋka numɛ u ɲyɛ wuu á,
ɲaha na yɛ wuu à wuu cìnmpyiibii kyaa táan wuyʼá.
Shinŋi u à u cìnmpyiibii kyaa pɛn uyʼá ke,
urufoo na ɲyɛ kwùŋi i.
15 Shin maha shin u à u cìnmpworoŋi kyaa pɛn uyʼá ke,
urufoo ná supyiboŋʼà tàanna.
Yii sʼà li cè na supyiboŋɔ sì n‑jà n‑kwôro supyibuuni na,
si shìŋi niŋkwombaaŋi ta mɛ.
16 Ndemu cye kurugo wuu à tàange shi cè ke,
lire li ɲyɛ:
Yesu Kirisita à u múnaani kan wuu kurugo.
Lire e wuu mú à yaa wuu wuu múnahigii kan wuu cìnmpyiibii kurugo.
17 Nàfuufoo ká u cìnmpworoŋi wà ɲya kanhare e,
maa mpyi u ɲyɛ a ɲɛnʼa u tɛ̀gɛ mɛ,
tá Kile tàange ɲyɛ urufolʼe?
18 Mii pyìibii,
wuu tàange ɲyɛ a sàa yaa ku pyi ɲwɔjwumɔ kanna mɛ.
Kʼà yaa ku pyi tàange yabiliŋi,
ŋkemu ku sí raa ɲaa wuu kapyiiŋkilʼe ke.
19 Lire cye kurugo,
wuu sí li cè na wuu na ɲaare sèeŋi ɲuŋʼi,
wuu yákilibii mú sí n‑tɛ̀ɛn Kile yyahe taan.
20 Ali wuu zòmpyaagii mɛ́ɛ ká sìi na wuu cɛ̂ɛge karigii cyìlʼe,
wuu li cè na Kile à fànha tò wuu zòmpyaagii na,
u à karigii puni cè.
21 Mii ntàannamacinmpyiibii,
wuu zòmpyaagii ká mpyi cyi ɲyɛ na wuu cɛ̂ɛge mɛ,
wuu yákilibii sí n‑tɛ̀ɛn Kile yyahe taan.
22 Lire ká mpyi,
wuu aha yaaga maha yaaga ɲáare u á ke,
u sí kuru kan wuu á,
ɲaha na yɛ wuu na u toŋi kurigii ɲaare,
maa u ɲyii karigii pyi.
23 Nde u à cya wuu á uru toŋi funŋke e ke,
lire li ɲyɛ:
wuu dá u Jyaŋi Yesu Kirisita na,
wuu u wuye kyaa táan wuyʼá bà u à li cya wuu á mɛ.
24 Shinŋi u ɲyɛ na Kile toŋi kurigii ɲaare ke,
urufoo ná Kile maha mpyi wwoɲɛɛ,
Kile ná urufoo mú maha mpyi wwoɲɛɛ.
Ndemu cye kurugo wuu maha li cè na wuu ná Kile ɲyɛ wwoɲɛɛ ke,
lire li ɲyɛ:
u à u Munaani le wuu e.