1 Pyɛri 2

Lire e ke yii láha pege karigii shiŋi puni ná nàɲwɔhɔre karigii shiŋi puni na. Yii àha fyìnmɛ tò wwomɔ na mɛ, yii i láha ɲyipɛɛnni ná jwoore shiŋi puni na. 2 Bà jirimpe lage maha mpyi pìnmpinɲyɛge na mɛ, yii Kile Jwumpe lage yaha ku pyi yii na amuni, puru jwumpe na ɲyɛ yii á mu à jwo jirimpe yabiliŋi, bà yii si mpyi sʼa sì yyaha na Kile kuni i yii zhwoŋi mɛɛ na mɛ, 3 ɲaha na yɛ yii à li cè ɲwɔŋkanni na Kafooŋi à ɲwɔ ke.

Yesu u ɲyɛ bage kafaage sèe woge bage mbìini na

4 Yii file Kafooŋi na, uru u ɲyɛ kafaage ɲyii woge, sùpyirʼà cyé ŋkemu na ke. Ŋka Kile à ku tayyérege ɲya kʼà pêe, maa ku cwɔɔnrɔ. 5 Yii yabilimpii na ɲyɛ kafaaya ɲyii wuyo, lire e yii wà yiye na, yii i mpyi baga, sí n‑tɛ̀ɛn ŋkemu i ke, yii i mpyi kuruŋɔ, Kile Munaani sí ŋkemu pyi kʼa nintanyi wwû Kile á Yesu cye kurugo ke. 6 Yii li cè na yʼà sémɛ Kile Jwumpe Semɛŋi i na:

«Yii wíi, mii à kafaaga cwɔɔnrɔ,

ku tayyéregʼà pêe sèlʼe.

Mii sí ku pyi kànhe e.

Shinŋi u à dá ku na ke,

urufoo sì n‑sìi n‑sílege mɛ.»

7 Yii pi à dá ku na ke, yii ɲùɲyi sí n‑yîrige. Ŋka mpii pi ɲyɛ pi ɲyɛ a dá ku na mɛ, yʼà sémɛ Kile Jwumpe Semɛŋi i na:

«Bafaanribilʼà cyé kafaage ŋkemu na ke,

kuru kʼà pa mpyi bage kafaage sèe woge bage mbìini na.»

8 «Kafaaga ku ɲyɛ ku ki, sùpyire maha búruge ŋkemu na ke,

fáaga ku ɲyɛ ku ki, ŋkemu ku maha sùpyire pyi ti i ɲcwo ke.»

Pi ɲyɛ na Kile Jwumpe kurigii ɲaare mɛ, lire kurugo pi maha ɲcwu. Lire yahare e Kile mpyi a pi yaha.

9 Ŋka yii pi ke, yii na ɲyɛ supyishi, Kile à ŋgemu cwɔɔnrɔ ke, Saanŋi Kile sáragawwuubii kuruŋke ku ɲyɛ yii, maa mpyi Kile kìni shiin, maa mpyi sùpyii, Kile à mpiimu ɲùŋɔ wwû, bà yii si mpyi sʼa u kakyanhala karigii nimpyiiŋkii shɛnrɛ yu mɛ. Uru u à yii yyerʼa yige numpini i, maa yii le u bɛ̀ɛnmpe e, puru pu ɲyɛ bɛ̀ɛnmpe sèesee wumpe. 10 Tèni lʼe, yii mpyi na sàha ŋkwɔ̀ a pyi Kile shiin mɛ, ŋka numɛ, yii à pyi Kile shiin. Tèni lʼe, Kile mpyi na sàha ŋkwɔ̀ a ɲùɲaara ta yii na mɛ, ŋka numɛ, u à ɲùɲaara ta yii na.

Dánafeebilʼà yaa pi piye ɲaaraŋkanni cè

11 Mii ntàannamacinmpyiibii, yii na ɲyɛ ŋge diɲyɛŋi i mu à jwo nàmpwuun, kùshee fiige, lire kurugo mii na li caa yii á, yi raa yiye kàanmucaa sùpyaŋi ɲyii karigii nimpegigii na, cyire karigii maha yii tùnni Kile kuni i. 12 Mpii pi ɲyɛ pi ɲyɛ Kile kuni i ná yii e mɛ, yii yii ɲaaraŋkanni cè pire shwɔhɔlʼe. Lire e pi mɛ́ɛ ká a fini na ntare yii na na yii à kapii pyi, pi sí raa yii kacɛnŋkii ɲaa si Kile pêe canŋke u sí n‑pa fworo pi na ke.

13 Kafooŋi kurugo, yii yiye tîrige ɲùŋufeebii punʼá: yii yiye tîrige saanbwɔhʼá, uru u ɲyɛ pi puni ɲùŋɔ na, 14 yii yiye tîrige fànhafeebilʼá, pire mpiimu pi à tìŋɛ saanbwɔhe cye kurugo, bà pi si mpyi sʼa kapimpyiibii tùnni sʼa kacɛnmpyiibii kêre mɛ. 15 Yii li cè na Kile ɲyii wuuni li ɲyɛ yii a kacɛnŋkii pyi, bà yii si mpyi si supyikuuyi funŋɔ baa wuyi ɲwɔyi tò yi funŋɔ jwumpe na mɛ. 16 Yii ɲyɛ bilere e mɛ. Yii a ɲaare yii a ntàanni ná lire e, ŋka yii àha lire tɛ̀gɛ fyìnmɛ tò wwomɔ na sʼa kapegigii pyi mɛ. Yii pyi Kile bilii. 17 Yii a sùpyire puni pêre, yii yii cìnmpyiibii kyaa táan yiyʼá, yii raa fyáge Kile na, yii raa saanbwɔhe pêre.

Bilibilʼà yaa pi Kirisita pyiŋkanni lwɔ́ yyefuge tèrigilʼe

18 Bilibii, yii yiye tîrige yii ɲùŋufeebilʼá Kile yyaha fyagare funŋke e. Mpii pi à ɲwɔ maa mpyi ná sùpyigire e ke, yii àha yiye tîrige pire kannʼá mɛ. Ali mpii pi à kyán ke, yii yiye tîrige pirʼá, 19 ɲaha na yɛ yyefuge ku ɲyɛ yii ná kuru ɲyɛ a yaa mɛ, pi aha kuru tɛ̀gɛ yii ɲuŋʼi, ka yii i ntɛ̀ɛn kʼe, maa li pwɔ Kile na, lire na ɲyɛ kacɛnnɛ. 20 Ŋka lʼaha nta kapyimbaala yii à pyi, ka yyefugo si nɔ yii na, ka yii i ku kwú yiye e, pèente ntire yii sí n‑ta lire e yɛ? Ŋka yii kacɛnmpyiini kurugo, yyefugo ká yii ta, ka yii i ku kwú yiye e, lire na ɲyɛ kacɛnnɛ Kile á. 21 Yii li cè na kuru yyefuge shinŋi mɛɛ na Kile à yii yyere. yabiliŋʼà kyaala yii kurugo, maa lire kuni le yii taan, bà yii si mpyi sʼa ɲaare u fyèŋi i mɛ. 22 U ɲyɛ a kapiini là tufiige pyi mɛ, kafinara jwumɔ ɲyɛ a fworo u ɲwɔge e mà ɲya mɛ. 23 Pi à u cyahala, u ɲyɛ a cyàhii ŋkoo láha pi na mɛ, pi à u kyérege, u ɲyɛ a pi fùguro mɛ, ŋka ŋge u sí n‑pa sùpyire puni sâra si ntàanna ná pi kapyiiŋkilʼe ntìiŋi funŋke e ke, u mpyi a u wuuni yaha uru cye e. 24 U à wuu kapegigii tugure lwɔ́ u cyeere e kworokworocige na, bà wuu si mpyi si ŋkwû kapegigii kàmpanŋke na, si shìfɔnŋɔ ta, sʼa ɲaare ntìiŋi i mɛ. Kyaage tooyʼe u à tabannayi ɲjemu ta ke, yire cye kurugo yii à cùuŋɔ. 25 Yii li cè na yii mpyi mu à jwo mpàa mpiimu pi mpyi piye ɲùŋɔ kurugo ke, ŋka numɛ yii à núrʼa pa yii nàhafooŋʼá, uru u ɲyɛ na yii múnahigii saɲcwɔnŋi sigili.