Mɛlikisedɛki à fànha tò Ibirayima na
7
Uru Mɛlikisedɛki mpyi Salɛmu kànhe saanŋi,
maa mpyi sáragawwu Kileŋi nìɲyi wuŋʼá.
Ɲyɛ Ibirayima à kàshige kwɔ̀n saanbii na maa jà pi na,
maa núru na ma tèni ndemu i ke,
Mɛlikisedɛki à fworʼa sà u ɲùŋɔ bɛ̂,
maa jwó le u á.
2 Yaayi Ibirayima à ta kàshige e ke,
u à yire puni yáhaŋi kan Mɛlikisedɛki á.
Ɲyɛ Mɛlikisedɛki mɛge ɲwɔhe ku ɲyɛ:
«ntìiŋi saanŋi».
Mà bâra lire na,
Salɛmu saanŋi u ɲyɛ u wi,
puru ɲwɔhe ku ɲyɛ:
«yyeɲiŋke saanŋi».
3 U tuŋi mɛge ɲyɛ a yyere mɛ,
u nuŋi mɛge ɲyɛ a yyere mɛ,
u tayirige mú ɲyɛ a jwo mɛ,
Kile Jwumpe Semɛŋi wà tufiige ɲyɛ a sìi na u siŋkanni,
lire ɲyɛ mɛ na u kwùŋkanni kyaa yu mɛ.
U na ɲyɛ mu à jwo Kile Jyaŋi,
ɲaha na yɛ u sí n‑kwôro sáragawwu tèrigii puni i.
4 Yii ɲyɛ a li ɲya na Mɛlikisedɛki tayyéregʼà pêe mà?
Puru funŋke e,
wuu tulyɛge Ibirayima à kàshige kwɔ̀n mà yaayi ɲjemu ta ke,
u à yire puni yáhaŋi kan u á.
5 Levi tùluge shiinbii pi ɲyɛ sáragawwuubii ke,
Musa Saliyaŋi mpyi a fànhe cyán pi na pi à pi cìnmpyiibii Izirayɛli shiinbii cyeyaayi yáhaŋi shuu,
ali mà li ta pi ná pire puni na ɲyɛ Ibirayima tùluge shiin.
6 Mɛlikisedɛki mpyi Levi tùluge shin mɛ,
ŋka uru u à Ibirayima cyeyaayi yáhaŋi ta.
Mà bâra lire na,
uru u à jwó le Ibirayima á,
mà li ta Ibirayima á Kile mpyi a ɲwɔmyahigii lwɔ́.
7 Nàkaana baa,
jwóŋi lefooŋʼà fànha tò u tafooŋi na.
8 Sáragawwuubii pi maha yáhaŋi shuu sùpyirʼá ke,
pire na ɲyɛ sùpyii mpiimu pi sí n‑kwû canŋka ke.
Mɛlikisedɛki mú mpyi na yáhaŋi shuu,
ŋka uru sí n‑kwôro ɲyii na bà yʼà sémɛ Kile Jwumpe Semɛŋi i mɛ.
9 Levi tùluge shiinbilʼá yáhaŋi maha ŋkaan ke,
wuu bá sí n‑jà n‑jwo na pire mú à yáhaŋi wwû,
ɲaha na yɛ pi tulyɛge Ibirayima à u wwû mà kan Mɛlikisedɛki á.
10 Tèni i Mɛlikisedɛki à Ibirayima ɲùŋɔ bɛ̂ maa yáhaŋi ta ke,
Levi mpyi na sàha si mɛ,
ŋka u mpyi u tulyɛge Ibirayima sìshange e,
lire e ke u mú à wwû yáhaŋi i.
11 Ma tàanna ná Izirayɛli shiinbii Saliyaŋi i,
Levi tùluge shiinbii kanni pi mpyi a yaa pi jà a pyi sáragawwuu.
Kampyi pi sáragawwuuni mpyi na sí n‑jà Kile ɲyii wuuni pyi li fûnŋɔ,
ɲùŋɔ sàha mpyi na sì n‑pyi sáragawwuŋi wabɛrɛ u pa mà ta u ɲyɛ a pyi Arɔn fiige mɛ,
fo Mɛlikisedɛki fiige.
12 Ɲyɛ sáragawwuuni ká fáa,
fànha ki Saliyaŋi mú u fáa.
13 Ná wuu Kafooŋi i,
mpe jwumpʼà yyaha tíi ke,
urʼà fworo tùluge ŋkemu i ke,
pire wà ɲyɛ a sáragawwubaaraŋi pyi mà ɲya sárayi tawwuge e mɛ.
14 Sùpyire punʼà cè na wuu Kafooŋi à fworo Zhuda tùluge e,
ŋka Kile tùnntunŋi Musa à jwo sáragawwuubii kyaa na ke,
u ɲwɔge ɲyɛ a nɔ Zhuda tùluge na mɛ.
Yesu ɲyɛ Mɛlikisedɛki fiige
15 Wuu Kafooŋi à pyi sáragawwu bà Mɛlikisedɛki mpyi mɛ,
lire lʼà li fíniŋʼa cyêe na u ná Levi tùluge ɲyɛ piye kurʼe mɛ.
16 Tùlugo karii cye kurugo bà u à pyi sáragawwu mɛ,
shìŋi niŋkwombaaŋi fànhe ku ɲyɛ u e ke,
kuru cye kurugo u à pyi u wi.
17 Yʼà jwo Kile Jwumpe Semɛŋi i na:
«Mu à pyi tèrigii puni sáragawwu Mɛlikisedɛki fiigea.»
18 Lire pyiŋkanni na,
Saliyaŋi niɲjyeŋʼà yîrige,
ɲaha na yɛ fànha ɲyɛ a mpyi u e mɛ,
kaɲwɔɔ mú ɲyɛ a mpyi u na mɛ.
19 Musa Saliyaŋi ɲyɛ a kyaa yaa ndemu lʼà fûnŋɔ mɛ,
ŋka numɛ sɔ̀nŋɔrɔ tatahaga sèe wogʼà kan wuu á.
Kuru cye kurugo,
wuu à tabaraga ta Kile na.
20 Mà bâra lire na,
Kile à kâa Yesu á,
pi sanmpii sʼà pyi sáragawwuu mà ta Kile ɲyɛ a kâa pirʼá mɛ.
21 Yesu wi ke,
urʼà le sáragawwubaaraŋi i tèni ndemu i ke,
Kile à kâa u á na:
«Mii Kafooŋi Kile à kâa,
mii sì na ntilwɔhe niɲcyange lwɔ́ sahaŋki mɛ:
“mu na ɲyɛ sáragawwu fo tèekwombaab.”»
22 Lire kurugo tunmbyaare Kile à le ná wuu e numɛ ke,
tirʼà fànha tò niɲjyɛɛre na.
Yesu cye kurugo,
wuu à tɛ̀ɛn ná lire e.
23 Ɲyɛ kani là saha na ɲyɛ,
ndemu lʼà u ná pi wwû piye e ke.
Sáragawwuubii niɲyahamilʼà tòro mà li ɲùŋke pyi,
pi mpyi na ŋkwûu.
24 Ŋka Yesu wi ke,
uru na ɲyɛ ɲyii na fo tèekwombaa,
sùpya saha sì n‑pyi sáragawwu u cyaga mɛ.
25 Lire lʼà li ta,
mpiimu pi à bâra Kile na u cye kurugo ke,
u sí n‑jà pire shwɔ numɛ fo tèekwombaa,
ɲaha na yɛ u na ɲyɛ ɲyii na tèrigii puni i,
maa Kile ɲáare pirʼá.
26 Sáragawwuɲuŋufembwɔhe kurugo wuu mpyi ke,
kuru ku ɲyɛ Yesu.
U à fíniŋɛ,
ɲcɛ̀ɛgɛ cyaga ná ɲwɔhɔmɔ cyaga ɲyɛ u na mɛ.
Kile à u láha kapimpyiibii na,
maa u dùrugo fo nìɲyiŋi tɛgɛni na.
27 Yesu ɲyɛ sáragawwuubii ɲùŋufembwoyi sanɲyi fiige mɛ,
u kuro ɲyɛ canŋa maha canŋa sáragawwuuni i uye kapegigii yàfaŋi kurugo si nta sùpyire sannte wogigii yàfaŋi sárayi wwû mɛ.
U à uye pyi sáraga tɔɔgɔ niŋkin tèrigii puni mɛɛ na.
28 Yii li cè,
Musa Saliyaŋi mpyi a mpiimu tìŋɛ mà pyi sáragawwuubii ɲùŋufembwoyo ke,
pire mpyi a fûnŋɔ mɛ.
Ŋka Musa Saliyaŋi kàntugo,
Kile à kâa maa jwumpe mpemu jwo ke,
purʼà pyi kaɲuŋɔ mà u Jyaŋi tìŋɛ mà pyi sáragawwuɲuŋufembwɔhɔ,
uru u à fûnŋɔ tèrigii puni i.